II Samuel 20 - Sră Goh 2018

Seba bơtào tòmdră mơ Dabit

¹ Tŭ hơ̆ gơs dô nă cau ală alai sơnđan la Seba, kòn klau Bikri, cau Benjamin. Khai uh kơlwòk mơ hòi driau dờng lah: “Bol he ò gơs pơnah lơi mơ Dabit, kung ò gơs phan lơi mơ kòn klau Jese. Ơ Israel, jơh tơl nă rê wơl tĕ hơ sàl he dê!”

² Behơ̆, jơh làng bol Israel lik lòt bơh Dabit nàng jat Seba, kòn klau Bikri. Mơya ală cau Juda gen kư̆ jat cau bơtau dô bă kơ̆ dơn bơh Jordan tus hơ Jerusalem.

³ Dabit neh rê wơl hơ gơlang khai dê tòm Jerusalem, khai kup jơt nă bau ùr cồng mơ khai neh lòi wơl nàng sền gàr gơlang, mơ ơn bol khai tòm dô nơm hìu gơs cau kơp gàr, mơ ai phan ròng siam bol khai, mơya ò lòt tus mơ bol khai; bol khai gơkòl krơ̆ jơl tus di ngai chơt, mơ kis be ùr bơnrau.

⁴ Gen bơtau đơs mơ Amasa lah: “Pơjum tơrgòm tĕ ală cau Juda tus mơ añ tòm pe ngai; mơ să tòm mê kung pal gơs mat tềng do.”

⁵ Behơ̆ Amasa lòt pơjum tơrgòm cau Juda, mơya khai neh lơh òbat rlau mơ tơngai cau bơtau neh lơh nền mơ khai.

⁶ Gen Dabit đơs mơ Abisai lah: “Tŭ do, Seba kòn klau Bikri rơp lơh iơh di bol he rlau mơ Apsalôm. Cèng tĕ ală cau tòm mpồl ling cau tòm mê dê mơ ting jat Seba, rngòt khai tòmpìt ai ală ƀòn dờng kơ̆ cê mơ geh klàs bơh di bol he mòn.”

⁷ Behơ̆, mpồl ling Jôap, cau Keret mơ cau Phelet bal mơ jơh ală cau ling pràn kơldang lik lòt hơđơm gơnoar at bồ Abisai dê. Bol khai lik lòt bơh di Jerusalem nàng ting jat Seba, kòn klau Bikri.

⁸ Tòm tŭ bol khai tus di pơnai lŭ dờng Gabaôn dê gen Amasa lòt tus tòm mat mơ bol khai. Jôap soh ào ling, đah bơdìh ào gơs đào tòm sơmprồm kơt di wĕ khai dê. Tòm tŭ khai lòt hơđap gen đào gơrung bơh di sơmprồm.

⁹ Jôap đơs mơ Amasa lah: “Ơ bi añ jê, bi niam să sơl?” Lồc behơ̆ Jôap pò tê ma at di sơnò tềp Amasa dê nàng cum khai.

¹⁰ Mơya Amasa ò kơlôi bơh đào tòm tê đah ne Jôap dê, Jôap srơp khai di di kơndul mơ pròc Amasa dê gơtuh tòm tiah. Amasa chơt, ò càng srơp wơl dơ̆ bàr tai. Gen Jôap mơ Abisai oh khai, ting jat Seba, kòn klau Bikri dê.

¹¹ Dô nă cau tòm mpồl ling Jôap dê ntào rềp di gah Amasa đơs lah: “Ñcau kòñ jat Jôap mơ gơrê bal mơ Dabit gen jat tĕ Jôap!”

¹² Amasa bic tòm mhàm khai dê digùl gùng; mơ cau ling hơ̆ gŏ jơh ală mpồl ling ơm dơh wơl tềng hơ̆. Tòm tŭ khai gŏ jơh tơl nă ơm dơh wơl tòm tŭ tus di ƀồc Amasa, gen khai hwài ƀồc Amasa bơh di gùng me tus tòm dô nơm ƀlàng sre mơ tơntơ̆ dô nơm ào jrùh hơđang ƀồc.

¹³ Tòm tŭ ƀồc Amasa neh tă bơh di gùng me rau, gen jơh ală ling lòt jat Jôap nàng ting jat Seba, kòn klau Bikri.

¹⁴ Seba lòt làm jơh ală jơi bơtiàn Israel tus di Abel Bet Maaka, mơ jơh ală cau Bikri pơjum bal mơ lòt jat khai tòm dơlam.

¹⁵ Jơh dô mpồl ling Jôap dê lòt tus gơrwàng Seba tòm Abel Bet Maaka. Bol khai bơt dô nơm dơrñang mơ ù tòmdră mơ ƀòn dờng, tòm toh dơrñang kơp gàr ƀòn dờng dê. Mpồl ling Jôap ơm phà tơrlah dơrñang ƀòn dờng,

¹⁶ gen gơs dô nă cau ùr jak chài bơh tòm ƀòn dờng hòi dờng jơnau lah: “Dan iat tĕ, dan iat tĕ! Dan hòi Jôap tus tềng do nàng añ tòmbơhbơr mơ khai.”

¹⁷ Jôap tus rềp hơ cau ùr hơ̆, gen cau ùr hơ̆ lùp lah: “Ồng ngan la Jôap sơl?” Khai ho lah: “Añ do.” Cau ùr đơs lah: “Dan ồng ơm iat jơnau cau duh broă ồng dê.” Khai ho lah: “Añ ơm iat do.”

¹⁸ Gen cau ùr đơs lah: “Cau yau òs đơs lah: ‘Lòt tĕ lùp cau tòm Abel’, mơ hơ̆ la broă bol khai neh lơh.

¹⁹ Bol hi la làng bol ơm ring lơngai mơ dòn song tòm Israel, ồng jòi nàng tơnroh dô nơm ƀòn dờng mơ la dô nă mè tòm Israel. Ñchi bơh tài ồng kòñ sa loan sre brê Yàng Jehôwa dê taih?”

²⁰ Jôap ho lah: “Ò, ò di behơ̆! Añ ò kòñ sa loan hala tơnroh!

²¹ Hơ̆ ò di la tơnggume broă do. Mơya gơs dô nă cau sơnđan la Seba, kòn klau Bikri, bơh di mơnơm Epraim, neh pò tê khai dê tòmdră mơ bơtau Dabit. Jào tĕ mìng dô nă khai lơm, gen añ rơp pleh ngài bơh di ƀòn dờng.” Cau ùr đơs mơ Jôap lah: “Cau rơp sơrbì bồ khai dê bơh di dơrñang do ồng in.”

²² Gen cau ùr hơ̆ tus hơ jơh làng bol mơ bơyai jơnau jak chài khai dê, bol khai koh bồ Seba, kòn klau Bikri, mơ sơrbì Jôap in. Gen Jôap uh kơlwòk, mpồl ling khai dê lik bơh di ƀòn dờng, kòp nă rê wơl hìu bol khai dê. Mơ Jôap rê wơl hơ cau bơtau tòm Jerusalem.

²³ Tŭ hơ̆ Jôap at bồ jơh mpồl ling Israel dê; Benayah, kòn klau Jehôyada at bồ ală cau Keret mơ Phelet

²⁴ Adôram geh pồ bơtào at bồ ală cau lơh broă bòl glar; Jôsaphat kòn klau Ahilut lơh gơs cau prap gàr sră yal yau lơgar dê;

²⁵ Seba lơh gơs cau gơnoar cih; Jadôk mơ Abiatha lơh gơs cau gơnoar ơn phan duh khoai;

²⁶ mơ Ira cau Jair kung lơh gơs gơnoar ơn phan duh khoai Dabit in sơl.