II Samuel 19 - Sră Goh 2018

¹ Cau yal Jôap in lah: “Cau bơtau ơm ñìm mơ pơt wòl bơh Apsalôm”

² Behơ̆ bơta pha lin tòm ngai hơ̆ gơlik wơl bơta moat jrùng jơh dô mpồl ling dê, tài bơh jơh mpồl ling neh kơno đơs tòm ngai hơ̆ lah: “Bơtau moat jrùng jê sồt bơh bơta chơt kòn klau bơtau dê.”

³ Ală cau ling kơñau mut òm tòm ƀòn dờng ò gơkrơi kung be dô mpồl ling ƀàssìl tòm tŭ neh dô bơh di tiah tòmlơh.

⁴ Cau bơtau gòm muh mat khai dê mơ ñìm ngkè dờng lah: “Ơ Apsalôm kòn klau añ! Ơ Apsalôm, kòn klau añ, kòn klau añ!”

⁵ Gen Jôap mut tòm hìu tus hơ bơtau mơ đơs lah: “Ngai do bơtau neh jơm mơ bơta ƀàssìl di muh mat ală cau duh broă bơtau, la ală cau neh dong klàs bơta kis bơtau dê, ală kòn klau mơ ală kòn ùr bơtau dê, bal mơ ală bau ùr mơ ală bau cồng bơtau dê.

⁶ Bơh bơtau kòñ gơboh di ală cau gơjrañ di bơtau, mơ gơjrañ di ală cau kòñ gơboh di bơtau. Bơtau yal tơlik loh làng lah ală cau kwang at bồ ling mơ ală cau bol khai dê la ò kwơ gơwèt mơ bơtau. Añ sền gŏ lah bơtau rơp niam nùs dilah Apsalôm gam kis tòm ngai do, mơ jơh tơl nă bol hi neh chơt jơh.

⁷ Behơ̆, tŭ do bơtau lik tĕ mo mơ đơs ală jơnau chồl nùs ală cau duh broă bơtau dê. Añ sơnio Yàng Jehôwa mơ srat să lah dilah bơtau ò tơlik mat, gen rơp ò gơs dô nă cau lơi gam ơm wơl mơ bơtau mang do; mơ bơta hơ̆ rơp la iơh rlau mơ jơh ală bơta rung rài neh gơlik tus hơđang bơtau bơh tŭ gam pơnu jơl tus di ngai do”

⁸ Behơ̆, bơtau ñă ntào mơ lòt tus nggui di mpồng ƀòn dờng. Tòm tŭ làng bol kơno yal lah: “Bơtau neh tus nggui di mpồng ƀòn,” gen jơh mpồl làng bol tus di đap bơtau. Mơ tai, cau Israel neh dô rê hơ hìu bol khai dê.

Dabit rê wơl hơ Jerusalem

⁹ Jơh ală làng bol tòm pơndang bal làm jơh tòm jơi bơtiàn Israel dê, lah: “Cau bơtau neh dong tă bol he bơh di tê ală cau sò tơm bol he dê, mơ neh dong tă bol he bơh di tê cau Philistin; mơ tŭ do, bơtau neh dô lik bơh di lơgar tài bơh Apsalôm;

¹⁰ Mơya Apsalôm la cau mơ bol he neh bong mơñà lơh bơtau at bồ hơđang bol he, mơ khai neh chơt tòm bơta tòmlơh. Behơ̆, ñchi bơh tài bol mê ò đơs jơnau lơi bơh bơta cèng bơtau rê wơl taih?”

¹¹ Bơtau Dabit sồr cau tus hơ bàr nă cau gơnoar ơn phan duh khoai la Jadôk mơ Abiatha lah: “Lùp tĕ ală cau kwang kra Juda dê lah: ‘Ñchi bơh tài bol mê la cau lồi dut cèng bơtau rê wơl hơ hìu khai dê taih? Jơnau tòmbơhbơr jơh Israel dê neh tus hơ bơtau.

¹² Bol mê la oh mi añ jê, la poac mhàm añ jê. Behơ̆, ñchi bơh tài bol mê la cau lồi dut cèng bơtau rê wơl?’

¹³ Kung đơs tĕ mơ Amasa lah: ‘Mê ò di la poac mhàm añ jê ơ? Dilah mê ò lơh gơs cau kwang ling ala Jôap di đap añ bơh tŭ do, gen dan Yàng Tom Trồ lơh glài añ kơnjơ̆.’”

¹⁴ Behơ̆, Dabit geh nùs jơh ală cau Juda be dô nă lơm, mơ bol khai pơyoa jơnau tus mơ cau bơtau lah: “Dan rê wơl, bơtau mơ jơh ală duh broă bơtau dê.”

¹⁵ Behơ̆, cau bơtau rê wơl tus hơ hiòng Jordan; mơ cau Juda neh tus hơ Gilgal nàng wă rò bơtau mơ cèng cau bơtau tiă hiòng Jordan.

¹⁶ Simei, kòn klau Gera, cau Benjamin bơh Bahurim, mù mhar bal mơ ală cau Juda nàng tìp mat mơ bơtau Dabit.

¹⁷ Gơs dô rbô nă cau Benjamin lòt jat bơtau. Mơ Jiba la cau duh broă hìu Sol dê, bal mơ jơt pram nă kòn klau khai dê, mơ bàr jơt nă cau duh broă khai dê. Bol khai lòt mhar tus di hiòng Jordan lài mơ bơtau.

¹⁸ Tòm tŭ bol khai tiă gan tiah thòl, nàng tơntiă jơh hìu nhă bơtau dê, mơ lơh niam nùs bơtau. Simei, kòn klau Gera dê, tơmbic să di đap cau bơtau, tòm tŭ khai mòr tiă gan hiòng Jordan,

¹⁹ mơ khai đơs mơ bơtau lah: “Dan cau tòm añ jê bañ kòp añ la cau neh tìs glài, dan bañ kah wơl bơta tìs cau duh broă cau tòm añ jê neh lơh tòm ngai bơtau la cau tòm añ jê lik bơh Jerusalem, dan bơtau bañ prap bơta hơ̆ tòm nùs.

²⁰ Bơh cau duh broă bơtau dê đal git lah añ neh tìs glài, gen tàng ngai do añ neh lòt tus tềng do lài mơ jơh ală cau tòm hìu nhă Jôsep dê nàng tòm mat mơ bơtau la cau tòm añ jê.”

²¹ Gen Abisai, kòn klau Jeruyah, đơs lah: “Simei ò pal kong tơnchơt bơh bơta hơ̆ ò ơ? Tài bơh neh srat sơntơm cau geh bong mơñà Yàng Jehôwa dê.”

²² Dabit ho lah: “Ơ ală kòn klau Jeruyah dê, ñchi bơta añ pal lơh mơ bol mê taih? Mơ ngai do bol mê neh gơlik gơs cau lơh bòl glar di añ, dô nă cau tòm Israel ngai do pal kong tơnchơt sơl ơ? Añ ò git lah ngai do añ la bơtau at bồ Israel ò ơ?”

²³ Behơ̆, bơtau đơs mơ Simei lah: “Mê rơp ò chơt.” Mơ cau bơtau srat să ho bal mơ khai.

Mephibôset wă rò bơtau

²⁴ Mephibôset sau klau Sol dê, kung lòt tus tòm mat mơ cau bơtau. Khai ò kơlôi rcang bơh jơng khai dê, ò siat sơnò tềp hala pìh ồi ào khai dê bơh di ngai bơtau lik lòt jơl tus di ngai bơtau rê wơl lơngap lơngai.

²⁵ Tòm tŭ khai tus bơh Jerusalem nàng tìp bơtau, gen bơtau lùp khai lah: “Ơ Mephibôset, ñchi bơh tài mê ò lòt bal mơ añ taih?”

²⁶ Khai ho lah: “Ơ bơtau la cau tòm añ jê, cau dĭ gơna añ jê neh pơrlồm añ; bơh cau duh broă bơtau dê neh đơs mơ khai lah: Kơt tĕ ừn alàng añ in nàng añ in rgơi hào gơ mơ lòt bal mơ bơtau. Bơh cau duh broă bơtau dê la gơlte.

²⁷ Mơ khai neh yă blac añ mơ cau tòm añ jê la bơtau. Mơya cau tòm añ jê la bơtau kung be cau gơnrơh Yàng Tom Trồ dê. Gen tàng lơh tĕ bơta lơi gơlơh niam gơwèt mơ bơtau.

²⁸ Jơh ală kòn sau ồng añ jê ò di pal dòp geh bơta lơi rlau mơ bơta chơt bơh di cau tòm añ jê la bơtau, mơya bơtau neh ai cau duh broă bơtau in dô bă tiah digùl ală cau nggui di cơnòng sa bơtau dê. Behơ̆, añ gơs gơnoar lơi nàng dan mơ bơtau rlau mơ hơ̆ taih?”

²⁹ Bơtau đơs mơ khai lah: “Ñchi bơh tài đơs oă tai bơh broă mê dê taih? Añ neh lơh nền lah: Mê mơ Jiba pal tòmpà sre brê.”

³⁰ Mephibôset đơs mơ cau bơtau lah: “Lòi tĕ khai ai jơh ală bơta, bơh tŭ do cau tòm añ jê la bơtau neh rê hìu lơngap lơngai.”

Nùs lơbơn niam Dabit dê gơwèt mơ Barjilai

³¹ Barjilai cau Galaat kung tus bơh di Rôgelim; khai neh lòt bal mơ bơtau tus hơ hiòng Jordan nàng tơntiă bơtau đah ne hiòng Jordan.

³² Barjilai neh jòng sơnam ngan, khai neh phàm jơt sơnam. Khai neh rcang phan sa bơtau in tòm ală ngai bơtau ơm tòm Mahanaim, bơh khai la cau pas gơs ngan.

³³ Bơtau đơs mơ Barjilai lah: “Tiă tĕ bal mơ añ, mơ añ rơp rcang tơl jơh ală bơta mê in tòm Jerusalem di gah añ.”

³⁴ Mơya Barjilai ho cau bơtau lah: “Añ gam kis nđò sơnam tai mơ pal guh hơ Jerusalem bal mơ bơtau taih?

³⁵ Tŭ do añ neh phàm jơt sơnam rau. Añ rgơi đal git bơta niam mơ bơta ò niam sơl ơ? Cau duh broă bơtau dê rgơi liap ală phan khai sa mơ phan khai ñô sơl ơ? Añ gam rgơi kơno sap ală cau klau mơ cau ùr đơs chò sơl ơ? Ñchi bơh tài cau duh broă bơtau dê bơtơl ơnòng kơnjơ̆ hơđang cau tòm añ jê la bơtau in taih?

³⁶ Cau duh broă bơtau dê rơp tiă hiòng Jordan mơ lòt dô êt tai bal mơ bơtau, mơya ñchi bơh tài bơtau kòñ jòng ro añ mơ dô nơm phan ƀàn behơ̆ taih?

³⁷ Dan ai gơnoar cau duh broă bơtau in rê wơl, nàng añ in chơt tòm ƀòn tòm añ jê, rềp di gah bơtô ƀồc mè bèp añ jê. Mơya do la Kimham, cau duh broă bơtau dê; lòi khai tiă hiòng bal mơ cau tòm añ jê la bơtau. Dan bơtau lơh tĕ khai in bơta lơi niam nùs bơtau.”

³⁸ Bơtau đơs lah: “Kimham rơp tiă hiòng bal mơ añ, mơ añ rơp lơh khai in bơta lơi niam nùs mê dê. Mơ jơh ală bơta lơi mê kòñ bơh di añ gen añ rơp lơh mê in.”

³⁹ Behơ̆, jơh làng bol tiă hiòng Jordan, mơ bơtau tiă lòt tus hơ đah ne. Cau bơtau cum mơ ai lơngai Barjilai in, mơ Barjilai rê wơl hơ hìu khai dê.

⁴⁰ Tòm tŭ bơtau neh tiă hiòng mơ lòt hơ Gilgal, Kimham tiă bal mơ bơtau. Jơh ală mpồl ling Juda, mơ nggùl mpồl ling Israel cèng bơtau lòt gùng.

⁴¹ Tŭ hơ̆, jơh ală cau Israel tus hơ bơtau, mơ đơs lah: “Ñchi bơh tài oh mi bol hi dê la cau Juda, neh cèng òm bơtau mơ jun bơtau mơ cau tòm hìu nhă bơtau dê tiă hiòng Jordan bal mơ jơh ală cau bơtau dê behơ̆ taih?”

⁴² Jơh ală cau Juda ho cau Israel lah: “Tài bơh cau bơtau la oh mi rềp mơ bol hi. Ñchi bơh tài bol mê gơjrañ bơh bơta hơ̆ taih? Bol hi neh sa phan lơi tòm ală phan neh rcang lòi bơtau in sơl ơ? Bol hi neh tă ai phan lơi să tòm bol hi in sơl ơ?”

⁴³ Gen cau Israel ho wơl ală cau Juda lah: “Bol hi gơs jơt pơnah tòm bơtau, mơ tòm Dabit sơl bol hi gơs rlau mơ bol mê. Behơ̆, ñchi bơh tài bol mê sền òsơp di bol hi behơ̆ taih? Ò di bol hi la cau sơnròp ngan đơs bơh bơta cèng bơtau bol he dê rê wơl sơl ơ?” Mơya ală jơnau cau Juda dê jàñ bơsak rlau mơ ală jơnau ală cau Israel dê.