II Samuel 17 - Sră Goh 2018

¹ Rlau mơ hơ̆ tai, Ahitôphel đơs mơ Apsalôm lah: “Lòi añ sac rwah jơt bàr rbô ling nàng ting jat Dabit tòm mang do.

² Añ rơp brồ lơh khai tòm tŭ khai bòl glar lơbơn. Añ rơp lơh khai in rngòt gen jơh làng bol jat khai rơp ntoat dô. Añ rơp tơnchơt mìng dô nă bơtau lơm,

³ mơ añ rơp lam jơh làng bol rê wơl mơ ồng be dô nă cau ƀan rê wơl hơ hìu bau klau khai dê. Bơta chơt dô nă cau mơ ồng neh ting jat hơ̆ rơp lơh jơh tơl nă rê wơl; jơh làng bol rơp ò kong jê sồt.”

⁴ Jơnau bơyai hơ̆ gơlơh niam Apsalôm in mơ jơh ală cau kwang kra Israel in sơl.

Bơta cri bơyai Husai dê

⁵ Mơya Apsalôm đơs lah: “Kung jà tĕ Husai cau Arkit tus tồ bol he in iat ñchi jơnau khai đơs.”

⁶ Tòm tŭ Husai neh mut hơ Apsalôm, gen Apsalôm lùp lah: “Ahitôphel neh bơyai jơnau behơ̆; bol he pal lơh jat jơnau khai sơl? Dilah ò gen mê ai tĕ bol hi in jơnau bơyai mê dê.”

⁷ Husai ho mơ Apsalôm lah: “Dơ̆ do, jơnau bơyai Ahitôphel dê la ò niam.

⁸ Ồng git bèp ồng mơ ală cau jat khai la ală cau ling jak tòmlơh, gơs nùs gơhào khuh ò gơkrơi kung be dô nơm jơgơu me tòm brê neh cau kup kòn gơ dê. Rlau mơ hơ̆ tai, bèp ồng la dô nă cau git làm tòm bơta tòmlơh, khai rơp ò bic mang bal mơ mpồl ling.

⁹ Tòm tŭ do khai ơm pồn să tòm dô nơm trồm lŭ hala tòm dô bă tiah lơi ndai tai. Dilah khai brồ lơh lài ală mpồl ling ồng dê mơ cau lơi kơno bơta hơ̆ rơp đơs lah ‘Neh gơs bơta sreh tơnchơt tòm ală mpồl ling jat Apsalôm.’

¹⁰ Gen bulah cau khin cha rlau jơh, mơ gơs nùs be klìu triă kung rơp lề lac bơh rngòt; bơh jơh Israel git bèp ồng dê la dô nă cau jak tòmlơh, mơ ală cau jat khai la cau khin cha.

¹¹ Gen añ bơyai mơ ồng lah: Lòi tĕ jơh ală Israel, bơh Dan tus Beerseba, gal ngan kung be bràs di gah dàlềng, pơjum bal mơ ồng mơ gơs să tòm ồng lam bol khai lòt tòmlơh.

¹² Gen bol he rơp brồ lơh khai di tiah jòi bàn khai, bol he rơp tus hơđang khai kung be dà mơryuh dùh hơđang ù. Khai mơ ală cau jat khai rơp ò dô nă cau lơi gam kis.

¹³ Dilah khai dô mut tòm dô nơm ƀòn dờng lơi gen jơh Israel rơp at che lòt tus hơ ƀòn dờng hơ̆, hwài gơ tus tòm thòng, tian gơs ò gam dô pet lơi.”

¹⁴ Apsalôm mơ jơh Israel đơs lah: “Jơnau bơyai Husai cau Arkit dê la niam rlau mơ jơnau bơyai Ahitôphel dê.” Mơ tai, Yàng Jehôwa neh lơh nền tơnroh jơnau bơyai niam Ahitôphel dê nàng tơndùh bơta rung rài hơđang Apsalôm.

Husai yal lài Dabit in dô pleh

¹⁵ Husai đơs mơ ală cau gơnoar ơn phan duh khoai la Jadôk mơ Abiatha lah: “Ahitôphel neh bơyai mơ sồr Apsalôm mơ ală cau kwang kra Israel pal lơh behơ̆ behơ̆, mơya añ neh bơyai mơ sồr khai pal lơh be do be do.

¹⁶ Behơ̆ tŭ do sồr mo dô nă cau kong sồr lòt yal mơ Dabit lah: ‘Bañ ơm mang đah ƀlàng ngềt ngơt dê; tiă tĕ đah ne bañ lơh òbat, rngòt bơtau mơ ală cau jat bơtau pal kòl sơbơng roh jơh.’”

¹⁷ Jônathan mơ Ahimas neh ơm tòm En Rôgel. Dô nă cau ùr duh broă lòt tus yal tơnggit bol khai in, mơ bol khai lòt yal wơl bơtau Dabit in, bơh bol khai ò khin mut tòm ƀòn dờng.

¹⁸ Mơya gơs dô nă cau pơnu gŏ bol khai gen tus yal Apsalôm in git. Behơ̆ bàr nă bol khai sơrbac sơrbang lik lòt mo tus hơ hìu dô nă cau ơm tòm Bahurim. Khai gơs dô nơm tơrlung tòm ƀlàng hìu, mơ bàr nă mù tòm hơ̆.

¹⁹ Bau ùr khai dê ai dô blah ồi tơ̆ lă hơđang bơr tơrlung mơ rsìh kòi tràng hơđang hơ̆. Ò gơs cau lơi git bơta hơ̆.

²⁰ Tòm tŭ ală cau Apsalôm dê tus di hìu cau ùr do mơ lùp lah: “Ntềng đah Ahimas mơ Jônathan taih?” Cau ùr ho lah: “Bol khai neh tiă rlau hơ croh dà rau.” Ală cau hơ̆ sơwì jòi mơya ò bàn cau lơi, gen rê wơl hơ Jerusalem.

²¹ Tơnơ̆ mơ tŭ bol hơ̆ neh lòt rau, Ahimas mơ Jônathan hào guh bơh tơrlung mơ lòt yal tơnggit Dabit in. Bol khai đơs mơ Dabit lah: “Lik lòt tĕ mơ tiă hiòng dà mo, bơh Ahitôphel neh bơyai lơh behơ̆ tòmdră mơ bơtau.”

²² Behơ̆ Dabit bal mơ jơh làng bol jat khai lik lòt mơ tiă hiòng Jordan. Tus rìng àng drim, ò gam wơl dô nă cau lơi òhềt tiă hiòng Jordan.

²³ Tòm tŭ Ahitôphel gŏ cau ò lơh jat jơnau bơyai khai dê gen khai kơt ừn alàng mơ rê wơl hơ hìu khai tòm ƀòn tòm khai dê. Khai rơndap niam hìu khai dê, mơ yồng is să khai. Behơ̆ khai chơt mơ tơp tòm bơtô ƀồc bèp khai dê.

²⁴ Dabit lòt tus hơ Mahanaim, mơ Apsalôm lòt gan hiòng Jordan, gơs jơh cau Israel lòt jat.

²⁵ Apsalôm neh pồ bơtào Amasa lơh gơs kwang dờng at bồ mpồl ling ala Jôap. Mơ tai, Amasa la kòn klau dô nă cau Israel sơnđan la Itra, lài neh bau mơ Abigail la kòn ùr Nahas dê, bi ùr Jeruyah, mè Jôap dê.

²⁶ Israel mơ Apsalôm bơtào sàl tòm lơgar Galaat.

²⁷ Tòm tŭ Dabit neh tus tòm Mahanaim gen Sôbi, kòn klau Nahas bơh Rapba cau Ammôn dê, bal mơ Makir kòn klau Emiel bơh Lôdebar, mơ Barjilai cau Galaat bơh Rôgelim,

²⁸ cèng bềl bic ồi tơ̆, mơngàn jơrlŭ mơ ală gri mơ ù. Bol khai kung cèng kòi mi, kòi tràng, kơmbuh phe mi, gar ceh, khoah, khoah prum,

²⁹ dà lơwe, dơngi dà toh belàt, nàng Dabit mơ làng bol khai in sa; bơh bol khai đơs lah: “Làng bol neh jơgloh tơhìr mơ bòl glar tòm ƀlàng ngềt ngơt.”