II Samuel 14 - Sră Goh 2018

Apsalôm rê wơl hơ Jerusalem

¹ Jôap kòn klau Jeruyah dê git nùs bơtau kah kơlôi bơh Apsalôm.

² Behơ̆ Jôap sồr cau lòt hơ Tekôa mơ jà dô nă cau ùr jak chài tus. Khai đơs mơ cau ùr hơ̆ lah: “Ai lơh tànggơ tĕ kung be cau moat ƀồc. Soh tĕ ồi ào cau moat ƀồc, bañ bong mơñà di bồ ai. Lơh kung be dô nă cau ùr neh jŏ ngai ơm moat ƀồc.

³ Gen lòt tus tĕ hơ cau bơtau mơ đơs mơ khai ală jơnau do.” Mơ Jôap ơn tòm bơr khai ală jơnau khai pal đơs.

⁴ Tòm tŭ cau ùr bơh Tekôa lòt tus hơ cau bơtau, khai tơmbic să tòm ù mơ khoai, mơ đơs lah: “Khoai bơtau, dan dong kòl añ!”

⁵ Bơtau lùp khai lah: “Ñchi bơta lơh ai dơrcul taih?” Cau ùr ho lah: “Añ ngan la dô nă cau ùr bơnrau; bau klau añ neh chơt.

⁶ Cau duh broă bơtau dê, gơs bàr nă kòn klau, bol khai neh tòmlơh bal tòm ƀlàng sre, mơ ò gơs cau lơi tềng hơ̆ nàng kơryan bol khai. Dô nă kòn do lơh kòn ne mơ tơnchơt khai.

⁷ Tŭ do jơh hìu nhă guh sòdră di cau duh broă bơtau dê; bol khai đơs lah: ‘Jào tĕ bol hi in cau neh tơnchơt oh khai tồ bol hi tơnchơt khai nàng sal tê oh khai in mơ khai neh tơnchơt; mơ bol hi kung tă gơnoar pơrdòn sre brê tai sơl.’ Bol khai kòñ tơnchơt dô nơm lơmpiat ồs gam wơl añ in, ò lòi wơl bau klau añ in sơnđan hala jơi bơtiàn lơi hơđang plai ù.”

⁸ Bơtau đơs mơ cau ùr lah: “Rê wơl tĕ hơ hìu ai dê, añ rơp ai jơnau sồr bơh broă ai dê.”

⁹ Mơya cau ùr bơh Tekôa đơs mơ cau bơtau lah: “Khoai bơtau la cau tòm añ jê, dan bơta tìs tuh hơđang añ mơ hơđang hìu nhă bèp añ jê, mơ dan bơtau mơ sơbàn bơtau in ò gơkòl glài!”

¹⁰ Bơtau ho wơl lah: “Dilah gơs cau lơi đơs jơnau lơi mơ ai, lam tĕ khai tus hơ añ, gen khai rơp ò lơh dơrcul ai tai.”

¹¹ Cau ùr đơs lah: “Behơ̆ dan bơtau hòi dan tĕ mơ Jehôwa Yàng Tom Trồ bơtau dê nàng kơryan cau sal tê bơh mhàm bañ bơtơl tai bơta tơnroh, tồ kòn klau añ rơp ò kong tơnroh.” Bơtau đơs lah: “Di ngan kung be Yàng Jehôwa kis, ò gơs dô dang che sŏ lơi hơđang bồ kòn klau ai dê rơp dùh tòm ù.”

¹² Gen cau ùr đơs lah: “Dan ai gơnoar cau duh broă bơtau dê đơs dô jơnau mơ bơtau la cau tòm añ jê.” Bơtau ho lah, “Đơs tĕ!”

¹³ Cau ùr đơs lah: “Gen ñchi bơh tài bơtau ò cahrña ndròm bal behơ̆ gơwèt mơ làng bol Yàng Tom Trồ dê taih? Tòm tŭ bơtau đơs jơnau hơ̆ gen ò di la bơtau kup glài să tòm bơtau, bơh bơtau ò cèng brê wơl kòn klau mơ bơtau neh bơtrơh tơlik ò ơ?

¹⁴ Bol he pal chơt jơh, bol he be dà neh gơtuh hơđang ù mơ ò geh tơrgòm wơl. Mơya Yàng Tom Trồ rơp ò tă tơlik bơta kis; sơlơ̆u wơl, Kơnràñ pò gùng nàng dô nă cau kong bơtrơh tơlik ò ơm ngài sùm sùm bơh di đap Kơnràñ.

¹⁵ Mơ tŭ do, añ neh tus mơ đơs ală jơnau do mơ bơtau la cau tòm añ jê tài bơh làng bol neh lơh añ in rngòt. Cau duh broă bơtau dê neh kơlôi lah: ‘Añ rơp đơs mơ cau bơtau, digơlan khai rơp lơh jat bơta cau duh broă khai dê neh dan.

¹⁶ Digơlan cau bơtau rơp iat mơ dong tă cau duh broă bơtau klàs bơh di tê cau kòñ tơnroh añ mơ kòn klau añ bơh di sre brê mơ Yàng Tom Trồ neh ai bol hi in.’

¹⁷ Cau duh broă bơtau dê neh kơlôi lah: ‘Kơp kòñ jơnau đơs cau tòm añ jê la bơtau ai añ in bơta rlô; bơh cau tòm añ jê la bơtau ò gơkrơi be dô nă cau gơnrơh Yàng Tom Trồ dê git nền bơta niam mơ bơta iơh.’ Dan Jehôwa Yàng Tom Trồ bơtau dê ơm bal mơ bơtau!”

¹⁸ Gen cau bơtau ho mơ cau ùr lah: “Bañ pồn mơ añ bơh bơta añ rơp lùp ai.” Cau ùr đơs lah: “Dan cau tòm añ jê la bơtau đơs tĕ.”

¹⁹ Bơtau lùp lah: “Ngan sơl la tê Jôap neh lơh broă do bal mơ ai ơ?” Cau ùr ho lah: “Di ngan kung be bơtau kis, ơ cau tòm añ jê la bơtau, ò gơs cau lơi rgơi pơrlac đah ma hala đah kiau bơh di jơnau lơi mơ cau tòm añ jê neh đơs. Ngan, hơ̆ la Jôap, cau duh broă bơtau dê neh bơto añ lơh bơta do, mơ neh ơn ală jơnau đơs do tòm bơr cau duh broă bơtau dê.

²⁰ Cau duh broă bơtau dê la Jôap neh lơh bơta do nàng tòmgơl bơta neh gơlik gơs. Cau tòm añ jê gơs bơta jak chài kung be cau gơnrơh Yàng Tom Trồ dê, git jơh ală bơta gơlik gơs tòm lơgar.”

²¹ Gen bơtau đơs mơ Jôap lah: “Di rau, añ rơp lơh bơta do, lòt tĕ cèng brê cau pơnu Apsalôm.”

²² Jôap tơmbic să blup mat tòm ù mơ khoai, mơ dan bơtau in geh lơngai. Jôap đơs lah: “Ngai do cau duh broă bơtau dê git lah khai neh geh bơta nđàc di đap bơtau la cau tòm añ jê tài bơh bơtau neh ai cau duh broă bơtau in bơta khai neh dan.”

²³ Gen Jôap lòt tus hơ Gesur mơ cèng Apsalôm rê wơl hơ Jerusalem.

²⁴ Mơya bơtau đơs lah: “Khai pal mut ơm tòm hìu tòm khai dê, ò geh tòm mat mơ añ.” Behơ̆, Apsalôm lòt tus tòm hìu tòm khai dê, ò gŏ tòm mat mơ cau bơtau.

Dabit toh glài Apsalôm in

²⁵ Tòm jơh Israel ò gơs dô nă cau lơi geh jòng ro bơh bơta niam klau be Apsalôm. Bơh hơđang bồ tus di kơndòl jơng khai dê ò gŏ jòi bàn dô nơm tềl sồt lơi tòm să khai.

²⁶ Khai òs siat sŏ khai dê tòm tŭ gơlik gơs kơnjơ̆ khai in, mơ tŭ lơi khai siat gen khai kơr geh bàr rhiang sieklơ, jat kơr bơtau dê.

²⁷ Apsalôm tơnggơs pe nă kòn klau mơ dô nă kòn ùr. Kòn ùr sơnđan la Tamar; khai la dô nă cau ùr hàng mơnĕ ngan.

²⁸ Apsalôm ơm tòm Jerusalem tòm bàr sơnam mơ ò gŏ mat cau bơtau.

²⁹ Gen Apsalôm hòi Jôap nàng sồr khai lòt tus hơ cau bơtau, mơya Jôap ò bài tus mơ khai. Behơ̆ Apsalôm hòi khai dô dơ̆ tai, mơya Jôap kung ò bài tus.

³⁰ Gen Apsalôm đơs mơ ală cau duh broă khai dê lah: “Sền ne, sre Jôap dê ơm rềp mơ sre añ, mơ khai gơs kòi tràng tềng hơ̆. Lòt tĕ chu sre hơ̆ mơ ồs.” Behơ̆, ală cau duh broă Apsalôm dê chu sre hơ̆ mơ ồs.

³¹ Behơ̆ Jôap neh lòt tus hơ hìu Apsalôm dê mơ đơs mơ khai lah: “Ñchi bơh tài ală cau duh broă mê dê neh chu sre añ mơ ồs taih?”

³² Apsalôm đơs mơ Jôap lah: “Tus tĕ hơ do tồ añ sồr mê lòt tus hơ bơtau nàng lùp lah: ‘Ñchi bơh tài añ rê bơh di Gesur taih? Chan añ gam ơm tềng hơ̆ la niam rlau!’ Behơ̆ tŭ do, añ kòñ tòm mat mơ bơtau, dilah añ gơs glài lơi, dan bơtau tơnchơt tĕ añ.”

³³ Behơ̆, Jôap lòt tus hơ cau bơtau mơ yal ală jơnau hơ̆. Gen bơtau hòi Apsalôm tus, khai tus tòm gơlang bơtau, tơmbic să blup mat tòm ù di đap bơtau. Mơ bơtau cum Apsalôm.