II Samuel 13 - Sră Goh 2018

Amnôn mơ Tamar

¹ Tơnơ̆ mơ hơ̆, Apsalôm kòn klau Dabit, gơs dô nă oh ùr hàng mơnĕ sơnđan la Tamar; mơ Amnôn kòn klau Dabit kòñ gơboh di Tamar.

² Amnôn neh jê nùs moat jrùng oă ir tian gơs kòp jê tài bơh khai kòñ gơboh dê oh ùr khai dê la Tamar, bơh khai gam ơruh dềt, gơlơh Amnôn in ò rgơi lơh bơta lơi mơ khai.

³ Mơ Amnôn gơs dô nă cau bơyô sơnđan la Jônadap, kòn klau Simea la bi Dabit; mơ khai la cau lac lèo ngan.

⁴ Jônadap đơs mơ Amnôn lah: “Ơ kòn klau bơtau, ñchi bơh tài sơlo ngai mê sơlo rgai rgong behơ̆ taih? Mê rơp yal añ in git sơl?” Amnôn ho: “Añ kòñ gơboh Tamar, oh ùr Apsalôm la oh klau añ jê.”

⁵ Jônadap đơs lah: “Bic tĕ hơđang cơnòng bic, lơh tànggơ be kòp jê. Tòm tŭ cau bơtau tus còp gen đơs tĕ mơ khai lah: ‘Kòn dan bèp ai Tamar oh ùr kòn, tus ai phan lơi kòn in sa. Lòi khai rcang phan sa di đap kòn, kòn rơp sền gŏ khai lơh, mơ rơp dòp phan sa bơh di tê khai.’”

⁶ Behơ̆, Amnôn bic di cơnòng bic mơ lơh tànggơ be kòp jê. Tòm tŭ cau bơtau tus còp khai gen khai đơs mơ cau bơtau lah: “Kòn kòñ oh ùr kòn la Tamar tus mơ lơh dô êt piang lă bơkah di đap mat kòn, nàng kòn rơp sa bơh di tê khai.”

⁷ Dabit sồr đơs mơ Tamar tòm hìu gơlang lah: “Lòt tĕ tus hơ hìu bi kòn di la Amnôn, mơ rcang dô êt phan sa khai in.”

⁸ Behơ̆ Tamar lòt tus hơ hìu bi klau khai la Amnôn ơm bic hơđang cơnòng bic. Tamar bơcă kơmbuh kòi mi nàng lơh gơs piang lă di đap Amnôn mơ buh gơtòm ồs.

⁹ Gen khai ai glah chàng mơ yò piang lă di đap Amnôn, mơya Amnôn ò bài sa. Khai đơs lah: “Sồr tĕ jơh tơl nă cau lik bơh tềng do.” Behơ̆ jơh tơl nă cau lòi khai mơ lik.

¹⁰ Gen Amnôn đơs mơ Tamar lah: “Cèng tĕ phan sa tềng do tus tòm ơdŭ bic añ jê nàng añ in sa bơh di tê oh.” Tamar ai piang lă khai neh lơh mơ cèng tus bi khai in la Amnôn tòm ơdŭ bic khai dê.

¹¹ Mơya tòm tŭ Tamar cèng piang lă Amnôn in sa, Amnôn sơmbat kup khai mơ đơs lah: “Tus tĕ bic mơ añ, ơ oh ùr añ jê.”

¹² Khai đơs lah: “Bañ lơh behơ̆, ơ bi añ jê! Bañ bơklơn añ. Bơta do òhềt tŭ lơi gơs tòm Israel! Bañ lơh bơta iơh rmơh behơ̆.

¹³ Đah mơ añ, ntềng đah añ rgơi cèng bơta ƀàssìl añ jê taih? Mơ gơwèt mơ bi, bi rơp gơlik gơs kung be dô nă tòm mpồl ală cau ală alai iơh rmơh tòm Israel. Dan bi đơs mơ bơtau; bơtau rơp ò bơkơ̆u añ bau mơ bi.”

¹⁴ Mơya Amnôn ò bài iat khai; mơ tài bơh Amnôn pràn rlau mơ khai, gen bic bơklơn khai.

¹⁵ Lồc behơ̆, Amnôn gơjrañ kơuềng ngan di khai; mơ tai, khai gơjrañ di Tamar oă rlau mơ khai neh kòñ gơboh di Tamar. Amnôn đơs mơ khai lah: “Ñă tĕ mơ lik bơh tềng do!”

¹⁶ Tamar đơs mơ khai lah: “Ò di, ơ bi; bơh bơta bơtrơh tơlik añ rơp la dô bơta tìs dờng rlau mơ bơta bi neh lơh añ in rau!” Mơya Amnôn ò bài iat khai.

¹⁷ Khai hòi dô nă cau duh broă is khai dê mơ sồr lah: “Tơlik tĕ cau ùr do di tiah, lồc behơ̆ kal wơl mpồng.”

¹⁸ Behơ̆ cau duh broă Amnôn dê tơlik khai mơ kal wơl mpồng. Tŭ hơ̆ Tamar soh dô blah ào jrùh bơka hàng mơnĕ, bơh hơ̆ la ào mơ ală kòn ơruh dềt bơtau dê òs soh.

¹⁹ Mơya Tamar ơn bùh hơđang bồ khai, mơ crè ào jrùh khai soh. Khai koar di bồ mơ lòt ndang ñìm nggà ndang.

²⁰ Apsalôm, bi klau khai, lùp khai lah: “Ngan sơl la Amnôn bi klau oh dê neh bic mơ oh ơ? Tŭ do ơm tĕ mŏ mŏ, ơ oh ùr añ jê, bơh khai la bi klau oh dê. Bañ ai lơh jê nùs oă bơh bơta hơ̆.” Behơ̆ Tamar ơm is moat jrùng tòm hìu Apsalôm, bi klau khai dê.

²¹ Tòm tŭ bơtau Dabit neh kơno jơh ală bơta hơ̆, gen khai gơjrañ ngan, [mơya khai ò lơh glài kòn klau khai dê la Amnôn, tài bơh Dabit kòñ gơboh di Amnôn, bơh khai la kòn tơnhoa.]

²² Apsalôm ò đơs dô jơnau lơi mơ Amnôn bulah la niam hala iơh; bơh khai gơjrañ di Amnôn tài bơh Amnôn neh bic bơklơn Tamar, oh ùr khai dê.

Apsalôm tơnchơt Amnôn

²³ Bàr nam tơnơ̆, Apsalôm gơs ală cau siat sơnò belàt tòm Baal Hajor, rềp di Epraim, mơ Apsalôm jà jơh ală kòn klau bơtau dê.

²⁴ Apsalôm lòt tus hơ bơtau mơ đơs lah: “Cau duh broă bơtau dê gơs ală cau chài siat sơnò belàt tus lơh broă; dan jà bơtau bal mơ jơh ală cau kwang at bồ bơtau dê tus mơ cau duh broă bơtau dê.”

²⁵ Bơtau ho lah: “Ò di, ơ kòn añ jê; jơh tơl nă bol hi ò tus; bol hi rơp lơh kơnjơ̆ rlau tai kòn in.” Bulah Apsalôm pơnđơl jà Dabit kung ò lòt, mơya ai lơngai Apsalôm in.

²⁶ Gen Apsalôm đơs lah: “Dilah bơtau ò tus, dan ai gơnoar Amnôn bi añ tus mơ bol hi.” Bơtau lùp khai lah: “Ñchi bơh tài khai pal tus mơ kòn taih?”

²⁷ Mơya Apsalôm jơh nùs dan tian gơs bơtau lòi Amnôn mơ jơh ală kòn klau bơtau dê lòt mơ Apsalôm. [Apsalôm yò sa be bơta yò sa cau bơtau dê.]

²⁸ Gen Apsalôm ai jơnau sồr ală cau duh broă khai dê lah: “Iat tĕ do! Tòm tŭ nùs Amnôn dê hòn chò bơh ñô tơrnòm, mơ tŭ añ sồr bol mê: ‘Tơnchơt tĕ Amnôn,’ gen tơnchơt tĕ khai. Bañ rngòt! Ò di să tòm añ neh ai bol mê in jơnau sồr do ò ơ? Lơh tĕ pràn kơldang mơ khin cha.”

²⁹ Behơ̆ ală cau duh broă Apsalôm tơnchơt Amnôn jat be jơnau Apsalôm neh sồr. Gen jơh ală kòn klau bơtau ñă ntào, hào alàng bol khai dê mơ ntoat dô.

³⁰ Tòm tŭ bol khai gam ơm rò gùng, gơs jơnau yal tus hơ bơtau Dabit lah: “Apsalôm neh tơnchơt jơh ală kòn klau bơtau rau, ò gam dô nă cau lơi ò.”

³¹ Bơtau ñă ntào, crè ào khai dê mơ bic tòm ù; jơh ală cau duh broă bơtau dê ntào di gah, ồi ào kung crè sơl.

³² Mơya Jônadap kòn klau Simea, bi Dabit dê đơs lah: “Dan kơnràñ la cau tòm añ jê bañ kơlôi lah bol khai neh tơnchơt jơh ală kòn klau bơtau dê, mìng Amnôn kong chơt lơm. Hơ̆ la bơta Apsalôm neh lơh nền bơh di ngai Amnôn bic bơklơn Tamar, oh ùr khai dê.

³³ Behơ̆, dan kơnràñ la cau tòm añ jê bañ ơn nùs di jơnau yal lah, jơh ală kòn klau bơtau dê neh chơt; bơh mìng dô nă Amnôn neh chơt lơm.”

³⁴ Mơya Apsalôm neh dô. Cau ntào kơp gàr pò mat tơnggòr, sền gŏ gơs dô mpồl oă lòt tus jat gùng đah ngkòi khai dê, di gah jơng mơnơm.

³⁵ Jônadap đơs mơ cau bơtau lah: “Sền ne, ală kòn klau bơtau dê neh tus, neh gơlik gơs tòm toh be jơnau cau duh broă bơtau neh đơs.”

³⁶ Neh sir khai đơs gen ală kòn klau cau bơtau tus, pơt wòl dờng ngan. Bơtau bal mơ jơh ală cau duh broă bơtau dê kung ñìm rac sràt bơtang ngan.

³⁷ Mơya Apsalôm dô tus tòm hìu Thalmai kòn klau Ammihut, bơtau Gesur dê. Ai Dabit ñìm ƀồc kòn klau khai dê kòp ngai.

³⁸ Apsalôm neh dô tus hơ Gesur, mơ khai ơm tềng hơ̆ tòm pe nam.

³⁹ Mơ nùs nhơm bơtau Dabit kah kơlôi bơh Apsalôm, bơh bơtau neh rài bơta moat jrùng bơh bơta chơt Amnôn dê.