II Samuel 11 - Sră Goh 2018

Dabit mơ Batseba

¹ Tòm kơnhai phàng, tŭ ală cau bơtau lik lòt tòmlơh, Dabit sồr Jôap lik lòt bal mơ ală cau duh broă bơtau dê mơ jơh mpồl ling Israel dê; bol khai tơnroh cau Ammôn mơ gơrwàng gùt dar Rapba. Mơya Dabit ơm wơl tòm Jerusalem.

² Gơlik gơs tòm dô mho ne, tòm tŭ Dabit guh bơh cơnòng bic khai dê mơ lòt yơng hơđang rkàng gơlang bơtau, mơ khai gŏ dô nă cau ùr ơm um; cau ùr hơ̆ hàng mơnĕ ngan.

³ Dabit sồr cau jòi lùp bơh cau ùr hơ̆. Cau yal lah: “Cau ùr hơ̆ la Batseba, kòn ùr Eliam dê, la bau ùr Uria cau Hetit dê.”

⁴ Behơ̆ Dabit sồr cau cèng khai tus, mơ bơtau bic mơ khai. Tơnơ̆ mơ tŭ neh lơh goh să khai bơh di bơta ƀơ̆ ƀơl, gen khai rê hìu.

⁵ Cau ùr hơ̆ neh bun mơ khai sồr cau lòt yal Dabit in lah: “Añ neh bun.”

⁶ Behơ̆ Dabit pơyoa jơnau đơs mơ Jôap lah: “Sồr tĕ Uria cau Hetit tus mơ añ.” Mơ Jôap sồr Uria lòt tus hơ Dabit.

⁷ Tòm tŭ Uria tus hơ Dabit, gen Dabit lùp khai mbe gơlơh Jôap, bơh mpồl ling mơ bơh bơta tòmlơh mbe lơi.

⁸ Gen Dabit đơs mơ Uria lah: “Mù tĕ tòm hìu mê dê mơ rào jơng mê.” Behơ̆, Uria lik lòt bơh gơlang bơtau, mơ gơs cau cèng jat khai dô nơm phan pà bơh bơtau.

⁹ Mơya Uria bic di tiah mpồng mut tòm gơlang bal mơ jơh ală cau duh broă bơtau dê, mơ khai ò mù hơ hìu khai dê.

¹⁰ Tòm tŭ cau yal wơl Dabit in mơ đơs lah: “Uria ò rê hìu khai dê,” gen Dabit lùp Uria lah: “Mê ò di pa rê bơh di tiah ngài ò ơ? Ñchi bơh tài mê ò rê hìu taih?”

¹¹ Uria đơs mơ Dabit lah: “Đài Bơta Ho Bal mơ Israel mơ Juda gam ơm tòm sàl, mơ cau tòm añ jê la Jôap bal mơ ală cau duh broă cau tòm añ jê, gam sơntơp sàl tòm ƀlàng, mbe añ rgơi mut tòm hìu añ jê, ñô sa mơ bic mơ bau ùr añ jê taih? Di ngan kung be bơtau kis, mơ hwềng soàn bơtau kis, añ rơp ò lơh dô bơta behơ̆!”

¹² Gen Dabit đơs mơ khai lah: “Ơm wơl tĕ tềng do dô ngai tai, gen ngai hìng añ rơp sồr mê lòt.” Behơ̆, Uria ơm wơl tòm Jerusalem tòm ngai hơ̆. Ngai tơnơ̆.

¹³ Dabit jà khai ñô sa mơ lơh khai in bơñul. Mơya tòm trồ mang Uria lik lòt bic hơđang cơnòng khai dê bal mơ ală cau duh broă cau tòm khai dê, mơ khai ò rê hìu khai dê.

Dabit sồr tơnchơt Uria

¹⁴ Àng drim ngai hìng, Dabit cih dô pang sră pơyoa Jôap in, mơ pơyoa di tê Uria.

¹⁵ Tòm sră hơ̆ Dabit cih lah: “Ơn tĕ Uria tòm tiah hơđap, di tiah sơbơng roh rlau jơh tòm tiah tòmlơh, lồc behơ̆ ruc wơl bơh di khai tồ khai kong cau lơh mơ chơt”

¹⁶ Tòm tŭ Jôap gơrwàng ƀòn dờng, khai ơn Uria di tiah khai git lah gơs cau ling sò tơm pràn kơldang rlau jơh.

¹⁷ Tòm tŭ ală cau bơh ƀòn dờng lik lòt nàng tòmlơh mơ Jôap, gơs dô êt cau tòm mpồl ling Dabit gơpừ chơt; rlau mơ hơ̆, Uria cau Hetit kung kong tơnchơt sơl.

¹⁸ Gen Jôap sồr cau yal Dabit in jơh ală bơta neh gơlik gơs bơh bơta tòmlơh hơ̆.

¹⁹ Khai sồr cau kong sồr lah: “Tòm tŭ mê neh sir yal cau bơtau in jơh ală bơta neh gơlik gơs tòm bơta tòmlơh hơ̆,

²⁰ mơ bơta gơhào gơjrañ bơtau dê digơlan rơp gơguh, mơ digơlan cau bơtau rơp lùp mê lah: ‘Ñchi bơh tài bol mê tus rềp ngan di ƀòn dờng nàng tòmlơh behơ̆ taih? Bol mê ò git lah cau ơm hơđang dơrñang ƀòn dờng rơp pañ kam di bol mê ò ơ?

²¹ Ñcau neh tơnchơt Abimelek kòn klau Jerubeset taih? Ò di la dô nă cau ùr bơh hơđang dơrñang ƀòn dờng neh sơrbì mpal lŭ hơđang khai mơ tơnchơt khai tòm tiah Thebes ò ơ? Ñchi bơh tài bol mê tus rềp ngan di dơrñang ƀòn dờng behơ̆ taih?’ Dilah cau bơtau lùp mê behơ̆ gen đơs mơ khai lah: ‘Uria, cau Hetit la cau duh broă bơtau kung chơt sơl.’”

²² Behơ̆, cau kong sồr lik lòt, khai neh tus mơ yal Dabit in jơh ală bơta mơ Jôap neh sồr khai yal.

²³ Cau kong sồr đơs mơ Dabit lah: “Ală cau ling hơ̆ pràn rlau mơ bol hi mơ lik lòt tòmlơh mơ bol hi tòm ƀlàng gòi, mơya bol hi tòmlơh pha mơ ting jat bol khai tus di mpồng ƀòn dờng.

²⁴ Gen ală cau ling at àtak bơh hơđang dơrñang ƀòn dờng pañ kam di ală cau duh broă bơtau dê, mơ gơs dô êt nă cau chơt. Rlau mơ hơ̆, cau duh broă bơtau dê la Uria cau Hetit kung neh chơt sơl.”

²⁵ Dabit đơs mơ cau kong sồr lah: “Đơs tĕ mơ Jôap lah: ‘Bañ lòi bơta hơ̆ lơh dơrcul tòm nùs mê; đào gơs tŭ tơnchơt cau do mơ gơs tŭ tơnchơt cau ndai. Pơnđơl pràn tĕ brồ lơh ƀòn dờng mơ tơnroh gơ. Đơs tĕ behơ̆ nàng chồl nùs Jôap geh khin cha.’”

²⁶ Tòm tŭ bau ùr Uria neh kơno lah bau klau khai neh chơt, khai ñìm ƀồc Uria in.

²⁷ Tòm tŭ neh jơh ală ngai ñìm ƀồc rau, Dabit sồr cèng khai tus tòm gơlang bơtau, khai gơlik gơs bau ùr bơtau dê mơ tơnggơs khai in dô nă kòn klau. Mơya bơta Dabit neh lơh hơ̆ ò niam nùs Yàng Jehôwa.