II Pier 3 - Sră Goh 2018

Yàng Jesu Krist rê wơl

¹ Ơ ală cau kòñ gơboh, do la sră pơyoa dơ̆ bàr añ cih oh mi in. Tòm bàr sră pơyoa añ tơngkah wơl nàng chồl nùs kơlôi song ngan oh mi dê,

² tồ oh mi in kah jơnau ală cau gơnoar hwơr sàng goh neh đơs lài, mơ bơta sồr lam Yàng dê la Yàng Dong Klàs neh kơnòm di ală cau gơnoar bơto dờng oh mi dê yal wơl.

³ Sơnròp ngan, pal git lah tòm ală ngai lồi dut rơp tus ală cau jak dơñŏ tơnhial ai jơnau dơñŏ tơnhial, jat nùs hàm kòñ is bol khai dê,

⁴ mơ đơs lah: “Ntềng đah jơnau ho pơgon bơh bơta Yàng tus wơl taih? Bơh di tŭ ồng pàng bol he neh bic, gen jơh ală phan kư̆ gam sùm be tòm tŭ sơnròp crơng gơs trồ tiah.”

⁵ Bol khai lơh nền be ò git lah bơh yau òr nau ală tap trồ gơlik gơs bơh jơnau đơs Yàng Tom Trồ dê, mơ dô nơm plai ù bơh dà mơ lik mơ kơnòm di dà mơ gơs.

⁶ Kung bơh dà mơ dunnia tòm rài hơ̆ neh kong dà kŏ tơnroh.

⁷ Mơya trồ tiah gam tŭ do kung la bơh jơnau đơs Kơnràñ dê mơ prap lòi ồs in, geh prap gàr jơl tus di ngai cahrña, la ngai cau ò duh rngòt kong roh rui.

⁸ Ơ ală cau kòñ gơboh, bañ hŭi bơta do: Di đap Yàng dô ngai kung be dô rbô nam, dô rbô nam kung be dô ngai.

⁹ Yàng ò di òbat bơh jơnau ho pơgon Kơnràñ dê be ală cau ne kơlôi la òbat, mơya Kơnràñ kong ơt gơwèt mơ oh mi, ò kòñ dô nă cau lơi roh rui, mơya kòñ jơh tơl nă git gơjrañ sang glài.

¹⁰ Mơya ngai Yàng dê rơp tus be dô nă cau kơñau. Tŭ hơ̆ ală tap trồ rơp gơs jơnau ntas nggồr ur mơ roh, jơh ală bơta rơp kong ồs sa lề jơh, plai ù mơ ală broă lơh hơđang gơ rơp kong chu jơh.

¹¹ Bơh jơh ală phan hơ̆ rơp kong ồs sa lề jơh behơ̆, gen bơta lơh lòt oh mi dê pal gơs sàng goh mơ duh rngòt ò git nđò,

¹² tòm tŭ jơh nùs kơp gơn tồ ngai Yàng Tom Trồ mhar tus, la ngai ală tap trồ rơp kong ồs sa lề jơh, mơ ală bơta rơp kong chu pơrguc jơh tòm ồs.

¹³ Mơya jat be jơnau ho pơgon Kơnràñ dê, bol he kơp gơn trồ pa tiah pa, la tiah bơta song ring ơm.

¹⁴ Behơ̆ gen, ơ ală cau kòñ gơboh, bơh ală oh mi kơp gơn ală ngai hơ̆, gen ngac ngar tĕ nàng tòm tŭ ơm di đap mat Yàng, gen oh mi geh bơta lơngap lơngai, ò gơs tềl ƀơ̆, ò gơs tiah geh lah pơrhơng.

¹⁵ Pal kah tĕ lah bơta kong ơt Yàng bol he dê la bơh bơta dong klàs oh mi dê, kung be Pol, bi kòñ gơboh bol he dê, jat bơta jak chài neh ai khai in mơ cih sră pơyoa oh mi in sơl.

¹⁶ Tòm jơh ală sră pơyoa khai dê, khai kung đơs bơh ală bơta hơ̆; tòm sră hơ̆ gơs bơta ƀà kalke wă, mơ ală cau bơrngơl gơla mơ ò kơ̆ nùs yal tìs jơnau gơtha, kung be bol khai yal tìs bơh ală tap ndai tòm Sră Goh sơl, cèng bơta roh rui is să tòm bol khai in.

¹⁷ Behơ̆, ơ ală cau kòñ gơboh, bơh oh mi neh git lài ală bơta hơ̆, gen pal kơrhia tĕ, rngòt oh mi kòl hwài tơlik bal mơ bơta tìs nrah ală cau iơh bơsak hơ̆ dê, mơ lơh roh bơta kơ̆ cê is oh mi dê.

¹⁸ Mơya sơlo dờng tĕ tòm bơta nđàc mơ tòm bơta dòp git Yàng la Yàng Dong Klàs bol he dê la Yàng Jesu Krist. Dan bơta gơklŏ gơrê bal mơ Kơnràñ bơh do jơl sùm sùm. Amen.