II Kôrintô 9 - Sră Goh 2018

Dong kòl cau dòn Yàng siơ̆u siar

¹ Mơ tai, bơh bơta duh broă ală cau sàng goh in gen ò càng cih oh mi in.

² Bơh añ git nùs rcang sir oh mi dê, mơ añ kung jòng să bơh oh mi mơ cau Masedoan lah cau Acai rcang lài bơh dô nam rau, mơ bơta ngac ngar oh mi dê neh chồl nùs oă cau ndai.

³ Mơya añ neh sồr ală oh mi ne lòt, tồ bơta jòng să bol hi dê bơh tòm broă hơ̆ ò gơlik roh lơm, mơ lòi oh mi in rcang lài bơta dong kòl kung be añ neh đơs mơ bol khai,

⁴ rngòt dilah gơs cau Masedoan tus bal mơ añ, gŏ oh mi ò rcang lài, gen bol hi kong ƀàssìl bơh bơta gơn kơnòm hơ̆, ai oh mi gen kung behơ̆ sơl.

⁵ Behơ̆ añ kơlôi pal dan dô êt cau lòt tus lài hơ oh mi, mơ rcang lài phan pà gòi mơ oh mi neh ho bơh lài, tồ phan hơ̆ in gơs sir tòm tŭ añ tus be dô nơm phan pà niam, mơ ò bơklơn.

⁶ Kah tĕ lah: cau sih dô êt gen toès dô êt, cau sih oă gen toès oă.

⁷ Kòp nă ơn tĕ jat nùs he neh lơh nền lài; bañ yoam hala bơh rồn bơklơn, bơh Yàng Tom Trồ kòñ gơboh cau chò nùs pà phan.

⁸ Yàng Tom Trồ gơs gơnoar ai jơh ală bơta lơngai lơngò tơngkah tơngkañ hơđang oh mi, tồ oh mi in geh tơl ală bơta pal càng, mơ gam gơs tơngkah tơngkañ nàng lơh jơh ală broă niam.

⁹ Be Sră Goh neh cih lah: “Khai neh sih oă, neh pà gòi cau rƀah lơòi in, Bơta song ring khai dê gam sùm sùm.”

¹⁰ Yàng Tom Trồ la Bơtau ai gar sơntìl cau sih gar in mơ piang lă nàng sa, rơp ai gar sơntìl oh mi in, lơh gơ in gơlik gơs lìu làc, kung rơp bơtơl ală plai bơta song ring oh mi dê sơl.

¹¹ Behơ̆ oh mi rơp geh pas gơs tòm jơh ală bơta nàng lơh ală broă niam, nàng bơh bol he mơ bol khai ưnngài Yàng Tom Trồ.

¹² Bơh bơta pà gòi phan do ò di mìng dong kòl bơta siơ̆u siar ală cau sàng goh dê lơm ò, mơya kung chồl oă cau ưnngài Yàng Tom Trồ sơlo oă tai.

¹³ Bơh kơnòm dê bơta pà gòi phan hơ̆, bol khai đal git oh mi dòn jat Jơnau Niam Bơtau Krist dê mơ oh mi neh ràng tơlik, mơ kơnòm dê bơta pà gòi wìu ơnàng oh mi dê gơwèt mơ bol khai mơ gơwèt mơ tơl nă cau, gen bol khai jòng ro Yàng Tom Trồ.

¹⁴ Mơ să tòm bol khai kung bơh bơta nđàc dờng ơnàng ngan Yàng Tom Trồ dê tòm oh mi, jơh nùs kòñ gơboh, mơ hòi dan oh mi in.

¹⁵ Ưnngài tĕ Yàng Tom Trồ, bơh bơta ai gòi Kơnràñ dê ò git jơh!