II Kôrintô 7 - Sră Goh 2018

¹ Ơ oh mi kòñ gơboh, bơh bol he neh gơs jơnau ho pơgon behơ̆, gen lơh goh tĕ jơh ală bơta ƀơ̆ ƀơl đah poac să mơ đah hwềng, ai bơta duh rngòt di Yàng Tom Trồ nàng lơh wil tơl bơta sàng goh.

Pol geh pơndòm pơniang bơh cau Kôrintô

² Pò tĕ nùs oh mi dê bol hi in; bol hi ò lơh tìs di cau lơi, ò lơh iơh di cau lơi, ò rồn bơklơn cau lơi.

³ Añ ò di đơs bơta hơ̆ nàng lơh nền glài oh mi; bơh añ neh đơs lài lah oh mi ơm tòm nùs bol hi dê, nàng kis bal chơt bal mơ gơp.

⁴ Añ dòn kơnòm nền cê di oh mi, mơ gơs oă bơta jòng să bơh di oh mi! Añ gơs bềng lìu bơta pơndòm pơniang, lìu làc bơta hòn chò digùl ală bơta bòl glar.

⁵ Mơ tai, dơ̆ bol hi lòt tus tòm Masedoan, poac să bol hi ò geh rlô lơngai dô êt lơi, mơya gơtìp li bơta bòl glar: Bơdìh gơs bơta tòmlơh, dơlam gơs bơta rngòt rngơt.

⁶ Mơya Yàng Tom Trồ, la Bơtau pơndòm pơniang cau gơplơ̆ nùs, neh pơndòm pơniang bol hi bơh Tit lòt tus;

⁷ Ò di mìng bơh khai lòt tus lơm ò, mơya tài bơh bơta pơndòm pơniang khai neh geh bơh di oh mi sơl, bơh khai neh yal wơl bol hi in git oh mi kơp kòñ ngan tìp añ, bơta moat jrùng oh mi dê, mơ nùs ngac ngar oh mi dê gơwèt mơ añ, tian gơs lơh añ in sơlo hòn chò bơtơl tai.

⁸ Dilah sră pơyoa añ jê neh lơh oh mi in moat jrùng, gen bulah añ neh pơlai, mơya tŭ do ò tai pơlai, bơh añ gŏ sră pơyoa hơ̆ mìng lơh oh mi in moat jrùng ing lơm.

⁹ Tŭ do añ hòn chò wơl, ò di bơh oh mi neh moat jrùng, mơya bơh oh mi neh kong moat jrùng nàng lam tus hơ bơta gơjrañ sang glài: Ngan oh mi neh moat jrùng jat nùs kòñ Yàng Tom Trồ dê, tian gơs oh mi òhềt kong roh bơta lơi tài bơh bol hi.

¹⁰ Bơh bơta moat jrùng jat nùs kòñ Yàng Tom Trồ dê gơlik gơs bơta gơjrañ sang glài lam tus hơ bơta dong klàs, la bơta ò càng pơlai; mơya bơta moat jrùng jat dunnia dê gơlik gơs bơta chơt.

¹¹ Ne, lòng sền, oh mi neh moat jrùng jat nùs kòñ Yàng Tom Trồ dê, gen gơlik gơs tòm oh mi bơta duh hul, bơta tò să he, bơta wòl să, bơta rngòt rngơt, bơta kơp kòñ, bơta ngac ngar, bơta lơh glài. Tòm jơh ală bơta oh mi neh yal tơlik oh mi ò tìs tòm broă hơ̆.

¹² Behơ̆, dilah añ neh cih oh mi in gen ò di tài bơh cau neh lơh bơta tìs hơ̆ hala kung ò di tài bơh cau kong lơh bơta tìs hơ̆, mơya nàng bơta duh hul oh mi dê gơwèt mơ bol hi geh yal tơlik oh mi in di đap Yàng Tom Trồ.

¹³ Hơ̆ la bơta bol hi geh pơndòm pơniang. Rlau mơ bơta pơndòm pơniang hơ̆; bol hi bơh bơta hòn chò Tit dê, gen hòn chò sơlo oă tai, tài bơh oh mi gen hwềng nùs khai dê geh rài bòl.

¹⁴ Dilah añ neh jòng să dô êt lơi bơh oh mi di đap Tit, gen kung ò ƀàssìl; bơh bol hi neh đơs bơh oh mi la song ngan, be jơh ală bơta añ neh jòng să oh mi di đap Tit kung la ngan sơl.

¹⁵ Dơ̆ khai kah wơl bơta dòn bơr jơh tơl nă oh mi dê, mbe lơi oh mi ai bơta rngòt rơm să mơ wă rò khai, gen nùs kòñ gơboh khai dê gơwèt mơ oh mi sơlo oă tai.

¹⁶ Añ hòn chò bơh añ rgơi dòn kơnòm di oh mi tòm jơh ală bơta.