II Kôrintô 6 - Sră Goh 2018

¹ Bơh bol hi lơh broă bal mơ Yàng Tom Trồ, gen dan oh mi bañ dòp leng bơta nđàc Yàng Tom Trồ dê dô bă ò kwơ.

² Bơh Kơnràñ đơs lah: “Añ neh iat jơnau mê di di tŭ geh dòp, Añ neh dong kòl mê tòm ngai dong klàs.” Do, tŭ do la tŭ geh dòp; do, tŭ do la ngai dong klàs.

Nùs dòn song Pol dê tòm ală bơta gơlòng bòl glar

³ Bol hi ò lơh kai gơtup tìs cau lơi, tồ gơnoar broă bol hi dê ò gơkòl sền òsơp.

⁴ Mơya tòm jơh ală bơta, bol hi yal tơlik să tòm bol hi be cau duh broă Yàng Tom Trồ dê, jơh nùs ơt ơl, tòm bơta rung rài, bòl glar, pluh plàng,

⁵ pù ơlih, ơm jàm, sơlồng sơlàng, kong bòl glar lơh broă, ò geh bic, kong jơgloh;

⁶ tòm bơta ơm sàng goh, bơta git jak, bơta kong ơt, bơta kơ̆ dơn, tòm Yàng Hwềng Goh, nùs kòñ gơboh song ngan,

⁷ jơnau đơs song ngan, gơnap gơnoar Yàng Tom Trồ dê, bol hi at ală phan tòmlơh bơta song ring dê tòm tê đah ma mơ đah kiau;

⁸ bulah gơs bơta gơklŏ hala bơta ƀàssìl, bulah gơs tiơng pơnro iơh hala niam. Sền be cau pơrlồm mơya la cau song ngan;

⁹ sền be cau nac crih mơya la cau mòng ngan; sền be mòr chơt mơya do gam kis; sền be kòl lơh glài tơmàl mơya ò kòl tơnchơt;

¹⁰ sền be moat jrùng mơya gơs hòn chò sùm sùm; sền be rƀah lơòi mơya lơh oă cau in geh pas gơs; sền be ò gơs phan lơi mơya gơs jơh ală bơta.

¹¹ Ơ cau Kôrintô, gơwèt mơ oh mi, bol hi đơs song ngan, nùs bol hi pò ơnàng.

¹² Bol hi ò hat hal gơwèt hơ oh mi, mơya tài bơh nùs oh mi hat hal.

¹³ Lơh tĕ be bol hi neh lơh gơwèt mơ oh mi, añ đơs mơ oh mi be đơs mơ kòn; oh mi kung pò tĕ ơnàng nùs he.

Bơtau Krist mơ Belial

¹⁴ Bañ tui yô bal mơ cau ò dòn, bơh bơta song ring mơ bơta iơh bơsak gơs gơtòmsòr bal sơl ơ? Bơta àng mơ bơta jơngo gơs gơtòmklac bal sơl ơ?

¹⁵ Bơtau Krist mơ Belial gơs gơròm bal sơl ơ? Hala cau dòn gơs pơnah lơi mơ cau ò dòn sơl ơ?

¹⁶ Hìu duh khoai Yàng Tom Trồ dê geh tòm rsò bal mơ rùp ràk sơl ơ? Bơh bol he la hìu duh khoai Yàng Tom Trồ gam kis sùm dê, be Yàng Tom Trồ neh đơs lah: “Añ rơp ơm tòm bol khai, lòt rê digùl bol khai; Añ rơp lơh gơs Yàng Tom Trồ bol khai dê, Mơ bol khai rơp lơh gơs làng bol Añ jê”

¹⁷ Gen tàng Yàng đơs lah: “Ală bol mê lik tĕ bơh digùl bol khai, Cah is tĕ mơ bol khai, Bañ ƀư di phan lơi ngkòr ngkàc, Gen Añ rơp wă rò ală bol mê;

¹⁸ Añ rơp lơh gơs Bèp ală bol mê dê, Ală bol mê rơp lơh gơs kòn klau kòn ùr Añ jê. Yàng la Bơtau Gơnoar Dờng Làm Jơh đơs behơ̆.”