II Kôrintô 4 - Sră Goh 2018

Phan màng ơn tòm gri mơ ù

¹ Behơ̆, bơh bơta nđàc sơngit Yàng Tom Trồ dê neh ai bol he geh gơnoar broă do, gen tàng bol hi ò gơplơ̆ nùs;

² mơya bol hi neh sang lòi ală broă lơh ndơp ndơr mơ ƀàssìl ƀàsso, ò lơh bơta lac lèo, kung ò lơh dơrklài jơnau Yàng Tom Trồ dê sơl, mơya di đap Yàng Tom Trồ bol hi yal tơlik jơnau song mơ să tòm bol hi lòi nùs tồr kòp nă cau in sền sơwì.

³ Dilah Jơnau Niam bol hi dê gam kìng ndơp, la mìng kìng ndơp ală cau kòl roh rui in lơm.

⁴ Bơh Yàng rài do neh lơh jơngo nùs cau ò dòn, nàng bơta àng Jơnau Niam gơklŏ Bơtau Krist dê, la rùp să Yàng Tom Trồ dê, ò pơnđàng tus di bol khai.

⁵ Mơ tai, bol hi ò bơto yal bơh să tòm he dê, mơya bơto yal bơh Jesu Krist la Yàng, mơ să tòm bol hi tài bơh Yàng Jesu mơ lơh gơs dĭ gơna oh mi in.

⁶ Bơh Yàng Tom Trồ la Bơtau neh đơs lah: “Bơta àng pal pơnđàng sòl tòm bơta klam jơngo,” kung neh pơnđàng sòl tòm nùs bol hi, nàng bơh bol hi mơ pơnđàng sòl bơta git wă bơh bơta gơklŏ Yàng Tom Trồ dê tòm muh mat Yàng Jesu Krist dê.

⁷ Mơya bol hi ơn phan màng do tòm gri mơ ù, tồ yal tơlik gơnap gơnoar dờng rlau jơh do la bơh Yàng Tom Trồ, ò di la bơh bol hi.

⁸ Bol hi gơtìp rồn bơklơn tơl ală bơta, mơya ò kòl tơn; gơtìp kòl yan, mơya ò roh bơta gơn kơnòm;

⁹ gơtìp kup kơryan, mơya Yàng Tom Trồ ò sang lòi; gơtìp pù lơh, mơya ò kòl tơnroh;

¹⁰ să jan òs àñ bơta chơt Yàng Jesu dê, tồ bơta kis Yàng Jesu dê kung geh yal tơlik tòm să jan bol hi dê sơl.

¹¹ Bơh bol hi la cau kis òs kong bơtào bơta chơt in tài bơh Yàng Jesu, tồ bơta kis Yàng Jesu dê kung geh yal tơlik tòm poac să òs chơt bol hi dê.

¹² Behơ̆ gen bơta chơt lơh broă tòm bol hi, mơya bơta kis lơh broă tòm oh mi.

¹³ Bơh bol hi gơs dô nùs dòn bal, tòm toh be jơnau Sră Goh neh cih: “Añ neh dòn, gen tàng añ đơs,” bol hi kung dòn gen tàng bol hi đơs,

¹⁴ bơh git lah Bơtau neh lơh Yàng Jesu in kis wơl kung rơp lơh bol hi in kis wơl bal mơ Yàng Jesu, mơ cèng tơlik bol hi bal mơ oh mi di đap Kơnràñ.

¹⁵ Bơh jơh ală bơta gơlik gơs la tài bơh oh mi, tồ bơta nđàc bơh oă cau sơlo bơtơl oă ngan, nàng lơh bơta ưnngài kung sơlo bơtơl tơngkah tơngkañ, mơ lơh gơklŏ Yàng Tom Trồ in.

Kis bơh bơta dòn

¹⁶ Behơ̆ tàng bol he ò gơplơ̆ nùs, bulah cau đah bơdìh rhòi siar roh mơya cau đah dơlam kư̆ sơlo ngai sơlo tòmgơl pa.

¹⁷ Bơh bơta bòl glar nggòc mơ ing bol he dê tơnggơs bol he in bơta gơklŏ màng ryŭ gam sùm sùm, ò git lồi ò git jơh.

¹⁸ Bơh bol he ò ơn nùs kơlôi di bơta gŏ mơ mat, mơya ơn nùs kơlôi di bơta ò gŏ mơ mat; bơh ală bơta gŏ mơ mat la ing lơm, mơya ală bơta ò gŏ mơ mat la gam sùm sùm.