II Kôrintô 3 - Sră Goh 2018

Cau duh broă bơta ho bal pa

¹ Bol hi rơp sơntòm yal tơlik is să he dê ơ? Hala bol hi be cau ndai pal gơs sră pơyoa yal lài oh mi in, hala bơh di oh mi ơ?

² Oh mi la sră pơyoa bol hi dê, cih tòm nùs bol hi dê, jơh tơl nă cau git bal mơ sền bal.

³ Loh làng ngan oh mi la sră pơyoa Bơtau Krist dê, bơh gơnoar broă bol hi mơ cih gơs, ò di cih mơ dà cih, mơya cih mơ Hwềng Yàng Tom Trồ gam kis sùm dê; ò di cih hơđang mpàn lŭ, mơya cih hơđang nùs cau dê.

⁴ Bol hi kơnòm dê Bơtau Krist mơ gơs nùs dòn kơ̆ nền gơwèt mơ Yàng Tom Trồ be do:

⁵ Ò di să tòm bol he gơs tơl bơta chài rgơi is nàng kơlôi broă lơi gơlik bơh bol hi, mơya bơta chài rgơi bol hi dê tus bơh Yàng Tom Trồ.

⁶ Kơnràñ kung neh ai bol hi in gơs tơl bơta chài rgơi nàng lơh gơs cau duh broă bơta ho bal pa, ò di bơta ho bal mơ sră, mơya bơta ho bal mơ Yàng Hwềng; bơh sră lơh gơs chơt, ai Yàng Hwềng lơh gơs kis.

⁷ Mơ tai, dilah gơnoar broă cèng tus bơta chơt, la jơnau neh pac sềr hơđang mpàn lŭ, neh geh yal tơlik tòm bơta àng gơklŏ, tian gơs kòn sau Israel ò rgơi sền trol di mat Môise, tài bơh bơta àng gơklŏ hơđang mat khai, bulah bơta àng gơklŏ hơ̆ rhòi roh jơh;

⁸ tơ ài lah gơnoar broă Yàng Hwềng dê ò di sơlo geh àng gơklŏ rlau ò ơ?

⁹ Behơ̆, dilah gơnoar broă bơta lơh nền glài dê gam la àng gơklŏ, gen tơ ài lah gơnoar broă bơta song ring dê geh àng gơklŏ sơlo oă rlau tai.

¹⁰ Ngan behơ̆, bơh bơta àng gơklŏ tơnơ̆ do lin rlau, gen bơta àng gơklŏ lài òr ò gơs gam tai.

¹¹ Bơh dilah bơta pal sang lòi gơs bơta àng gơklŏ sơl, tơ ài lah bơta gam sùm sùm gơs bơta àng gơklŏ sơlo oă rlau tai.

¹² Bơh bol he neh gơs bơta gơn kơnòm behơ̆, gen tàng bol he đơs dô bă khin cha ngan,

¹³ ò di be Môise ai bài kơrnìng kìng mat he, tồ kòn sau Israel in ò sền gŏ bơta lồi dut bơta àng gơklŏ dê gơ rhòi roh.

¹⁴ Mơya nùs bol khai neh gơs kră kơldang; jơl tus dê ngai do tòm tŭ sền Sră Goh Bơta Ho Bal Yau, gen bài kơrnìng hơ̆ òhềt tă tơlik, ngan la mìng tòm Bơtau Krist mơ bài kơrnìng hơ̆ geh tă tơlik.

¹⁵ Ngan behơ̆, jơl tus di ngai do kòp dơ̆ sền Sră Môise gen gam gơs bài kơrnìng hơ̆ ơm hơđang nùs kơlôi bol khai dê.

¹⁶ Mơya dilah tŭ lơi nùs cau hơ̆ rê wơl mơ Yàng, gen tŭ hơ̆ bài kơrnìng geh tă tơlik.

¹⁷ Yàng la Yàng Hwềng; Yàng Hwềng Yàng dê ơm tiah lơi, gen bơta khat gơboh kung ơm tềng hơ̆ sơl.

¹⁸ Bol he jơh tơl nă lòi muh mat gòi nàng pơnđàng wơl bơta àng gơklŏ Yàng dê, be tòm dô nơm krơh, gen gơlik gơs be rùp să Kơnràñ dê, bơh gơklŏ tus hơ gơklŏ, be bơh Yàng la Yàng Hwềng.