II Kôrintô 12 - Sră Goh 2018

Bơta gơtơnggŏ mơ yal tơlik Pol dê

¹ Añ pal jòng să bulah ò gơs kwơ, mơya tŭ do añ rơp đơs bơh ală bơta gơtơnggŏ mơ bơta yal tơlik Yàng dê.

² Añ git dô nă cau tòm Bơtau Krist, bơh jơt poan nam lài neh geh cèng guh tus hơ tap trồ dơ̆ pe, (dilah tòm să jan añ ò git, hala bơdìh să jan, añ kung ò git; gơs Yàng Tom Trồ git).

³ Añ git mbe lơi cau hơ̆ (dilah tòm să jan hala bơdìh să jan, añ kung ò git; gơs Yàng Tom Trồ git)

⁴ geh cèng guh tus hơ lơgar lơngap lơngai Yàng Tom Trồ dê, tềng hơ̆ khai kơno ală jơnau ò rgơi yal, mơ cau lơi kung ò geh gơnoar yal wơl sơl.

Pol jòng să bơh bơta lơbơn lơño khai dê

⁵ Bơh cau hơ̆ añ rơp jòng să, mơya bơh să tòm añ, añ ò jòng să, mìng jòng să bơh bơta lơbơn lơño añ jê lơm.

⁶ Dilah añ kòñ jòng să, gen kung ò di la tùl gơla, bơh bơta añ đơs la ngan; mơya añ bơkơŭ is, rngòt gơs cau lơi kơlôi bơh añ rlau mơ bơta khai neh gŏ di añ hala kơno añ đơs.

⁷ Mơ rngòt añ yò tơngguh is să añ oă bơh bơta yal tơlik dờng màng rlau jơh, gen neh ai dô nơm mŭ yar tòm poac añ, hơ̆ la dô nă cau kong sồr cà Satan dê neh pù lơh añ, tồ añ in ò yò tơngguh is să añ oă ir.

⁸ Bơh bơta do añ neh pe dơ̆ rac dan mơ Yàng sồr gơlik bơh di añ.

⁹ Mơya Yàng đơs lah: “Bơta nđàc Añ jê neh tơl mê in, bơh gơnoar pràn Añ jê gơlik wil tơl tòm bơta lơbơn lơño.” Behơ̆ añ ai lơh chò nùs chan jòng să bơh bơta lơbơn lơño añ jê, tồ gơnoar pràn Bơtau Krist dê ơm hơđang añ.

¹⁰ Gen tàng tài bơh Bơtau Krist añ niam nùs kong bơta lơbơn lơño, òsơp òso, siơ̆u siar, kup kơryan, bòl glar; bơh tòm tŭ añ lơbơn lơño, hơ̆ la tŭ añ pràn kơldang.

Nùs kơlôi Pol dê gơwèt mơ cau dòn

¹¹ Añ neh gơlik tùl gơla bơh oh mi rồn bơklơn añ; pal ngan la oh mi jòng ro añ sồng di, bơh bulah añ ò kwơ dô êt lơi, kung ò di gơhuc mơ ală cau gơnoar bơto dờng màng ryŭ ne dô êt lơi ò.

¹² Ngan oă bơta krơi, tềl is, neh geh lơh cơng lah, añ la dô nă cau gơnoar bơto dờng, neh geh bơtào digùl oh mi tòm oă bơta ơt ơl.

¹³ Dilah ò kòp bơta să tòm añ ò lơh pơnjê di oh mi, gen gơs bơta lơi mơ oh mi gơhuc mơ ală Hìu Jum Goh ndai sơl? Dan toh glài añ in bơta ò ring behơ̆!

¹⁴ Do la dơ̆ pe añ neh rcang sir lòt tus hơ oh mi; mơ añ rơp ò lơh pơnjê di oh mi, bơh ò di añ jòi phan mơna oh mi dê, mơya jòi să tòm oh mi. Tơnơ̆ wơl, bơh ò di kòn sau pal prap lòi mè bèp in, mơya mè bèp pal prap lòi kòn sau in.

¹⁵ Añ kung chò ngan bơh hwềng soàn oh mi mơ roh jền glar să. Dilah añ kòñ gơboh di oh mi sơlo bơtơl, gen oh mi ò hoan kòñ gơboh di añ ơ?

¹⁶ Mơya gơs cau đơs lah bulah añ neh ò lơh pơnjê di oh mi, mơya añ la cau lac lèo, neh ngui kai gơrmơ̆i mơ kup oh mi.

¹⁷ Behơ̆ añ neh kơnòm di dô nă cau lơi tòm ală cau añ sồr lòt tus hơ oh mi nàng sa kwì di oh mi ơ?

¹⁸ Añ neh sồr Tit, mơ oh mi ne lòt bal mơ khai. Tit sa kwì di oh mi sơl ơ? Bol hi ò di cơnđòa jat dô hwềng nùs bal, dô gùng dà bal ò ơ?

¹⁹ Neh jŏ rau oh mi tồnlah bol hi tò să gơwèt mơ oh mi. Hơ̆ la tòm Bơtau Krist, di đap Yàng Tom Trồ mơ bol hi đơs. Ơ ală oh mi kòñ gơboh, jơh ală bơta hơ̆ la bơh bơta bơt bơtào oh mi in.

²⁰ Bơh añ rngòt lah dơ̆ añ lòt tus, gen gŏ oh mi ò di be añ kơp kòñ, oh mi gŏ añ kung ò di be oh mi neh kơp kòñ. Añ rngòt tai lah gam gơs bơta tòm pơndang, ƀoah, gơjrañ kơuềng, cah is mpồl, đơs joh, jak đơs iơh, jòng să, nggồr nggàc tai mòn.

²¹ Kung rngòt lah dơ̆ añ lòt tus, gen Yàng Tom Trồ añ jê lơh añ in ƀàssìl bơh oh mi, mơ añ pal moat jrùng bơh oă cau neh tìs glài lài òr, mơ ò bài gơjrañ sang glài bơh bơta ngkòr ngkàc, rềs àr bơrnàn, bung jang mơ bol khai neh tìs.