II Kôrintô 10 - Sră Goh 2018

III. Pol ho wơl mơ cau sòdră, tò gơnoar broă gơnoar bơto dờng khai dê ( 10:1 – 12:21 ) Pol tò să khai dê

¹ Añ la Pol, tòm tŭ ơm di đap oh mi gen lơbơn lơño, mơya tŭ neh ngkòi mat gen cha rma ngan gơwèt mơ oh mi. Añ ai bơta niam lơnhơn mơ bơta lơbơn niam Bơtau Krist dê mơ tơngkah oh mi,

² dan bañ bơklơn añ, tòm tŭ tòm mat pal ngui bơta kràñ cê, mơ añ mòng ngui gơwèt mơ ală cau òs đơs bol hi la cau lơh lòt jat poac să.

³ Bơh bol hi bulah kis tòm dunnia, mơya ò di tòmlơh jat dunnia.

⁴ Bơh ală phan tòmlơh bol hi ngui ò di bal mơ dunnia, mơya la gơnap gơnoar Yàng Tom Trồ dê nàng sòr tơrlah ală theng kơ̆ cê, bol hi sòr tơrlah ală bơta bơyai tìs nrah,

⁵ Bal mơ jơh ală bơta geh yò tơngguh sòdră mơ bơta dòp git Yàng Tom Trồ, mơ kup jơh ală bơta kơlôi sơnơng nàng dòn bơr Bơtau Krist.

⁶ Bol hi kung rcang sir lơh glài jơh ală bơta ò dòn bơr, tơnơ̆ mơ tŭ bơta dòn bơr oh mi neh wil tơl rau.

⁷ Oh mi mìng sền đah bơdìh! Dilah gơs cau lơi dòn nền lah, khai gơrê bal mơ Bơtau Krist gen kơlôi is tĕ lah cau hơ̆ gơrê bal mơ Bơtau Krist be lơi, gen bol hi kung gơrê bal mơ Kơnràñ behơ̆ sơl.

⁸ Bulah añ jòng să rlau dô êt bơh gơnoar Yàng neh ai gòi nàng bơt bơtào oh mi, ò di nàng sòr tơrlah oh mi, gen añ kung ò ƀàssìl sơl,

⁹ añ ò kòñ lơh oh mi rngòt bơh ală sră pơyoa añ jê.

¹⁰ Bơh gơs cau ƀà đơs lah: “Ală sră pơyoa khai dê đơs kơnjơ̆ mơ pràn kơldang, mơya tus di tŭ tòm mat gen khai lơbơn lơño, mơ jơnau đơs ò gơs kwơ màng.”

¹¹ Cau đơs behơ̆ kơlôi tĕ lah tòm tŭ bol hi neh ngkòi mat, jơnau đơs tòm sră pơyoa be lơi, gen tŭ tòm mat, broă lơh kung behơ̆ sơl.

¹² Ngan bol hi ò khin pơndròm să tòm he mơ ală cau ne, la cau jak yal tơlik is să he dê; să tòm bol khai ai să tòm mơ was să tòm, ai să tòm mơ pơndròm să tòm, gen ngan la cau ò git jơnau.

¹³ Mơya bol hi ò kòñ jòng să rlau mơ sơnoa rnoas, mìng jat nhàr mơ Yàng Tom Trồ neh ai bol hi in, tòm nhàr hơ̆ kung gơs broă lơh bol hi dê digùl oh mi sơl.

¹⁴ Bơh bol hi ò sơrlèt rlau mơ gơnoar bol hi dê, be bol hi òhềt tus hơ oh mi, mơya ngan bol hi neh cèng Jơnau Niam Bơtau Krist dê tus hơ oh mi sơnròp ngan.

¹⁵ Bol hi ò jòng să rlau mơ sơnoa rnoas, hơ̆ la jòng să bơh bơta kong bòl glar lơh broă cau ndai dê; mơya kơp kòñ lah bơta dòn oh mi dê bơtơl tơngguh gen gơnoar broă bol hi dê kung rơp geh pò ơnàng rlau digùl oh mi, jat be gơnoar bol hi dê,

¹⁶ tian gơs bol hi bơto yal Jơnau Niam tòm ală tiah ngài rlau, nàng ò jòng să bơh broă cau ndai neh lơh gơs tòm gơnoar broă khai dê.

¹⁷ Mơya be jơnau Sră Goh neh đơs lah: “Behơ̆ cau lơi jòng să, gen jòng să tĕ bơh broă Yàng neh lơh.”

¹⁸ Bơh ò di la cau yò tơngguh is să he geh dòp, mơya la cau Yàng yò tơngguh gơ dê geh dòp.