Hebrơ 9 - Sră Goh 2018

Bơta duh khoai tòm ù mơ hơđang trồ

¹ Bơta ho bal sơnròp kung gơs bơta sồr lam bơh bơta duh khoai, mơ gơs dô bă Tiah Sàng Goh tòm dunnia.

² Bơh neh bơtào gơs dô nơm Hìu Ing Duh Khoai rau, pơnah sơnròp sơnđan la Tiah Sàng Goh, tòm hơ̆ gơs jơng ồs đèng, cơnòng mơ piang lă pơdơng.

³ Bơh ngkòi đah dơlam kơrnìng dơ̆ bàr, sơnđan la Tiah Sàng Goh Ngan;

⁴ gơs cơnòng màh chu kơlhô, mơ Đài Bơta Ho Bal ƀềp mơ màh; tòm đài gơs dô nơm gri màh ơn mana, gai jra cat sơmbut Arôn dê, mơ bàr nơm mpàn lŭ bơta ho bal dê;

⁵ đah hơđang đài ho bal gơs ceruƀim gơklŏ, jơm gòm bơnap bơta nđàc, mơya tòm tŭ do ò rgơi yal jơh ală bơta hơ̆.

⁶ Dơ̆ ală phan hơ̆ neh rcang sir behơ̆ rau, gen ală cau gơnoar ơn phan duh khoai òs lòt sùm tus hơ tiah sơnròp tòm Hìu Ing Duh Khoai nàng duh broă;

⁷ mơya pơnah đah dơlam, gen mìng cau gơnoar dờng lam bồ ơn phan duh khoai mut tòm hơ̆ dô nam dô dơ̆ lơm, mơ pal cèng mhàm la mhàm pal ơn tơwài glài să tòm khai in mơ bơh tồi glài làng bol dê sơl.

⁸ Yàng Hwềng Goh ai bơta hơ̆ sơnio lah tŭ lơi Hìu Ing Duh Khoai sơnròp gam gơs, gen gùng mut tòm Tiah Sàng Goh Ngan òhềt pò tơlik.

⁹ Bơta hơ̆ lơh rùp sơnio tòm pah rài do, lơh cơng lah ală phan ơn mơ phan ơn duh khoai ò rgơi lơh nùs tồr cau duh khoai in geh wil tơl;

¹⁰ bơh hơ̆ la bơta sồr lam đah poac să dê gơwèt hơ ală phan sa, phan ñô, mơ bơta um rào, geh bơtào gơs jơl tus di tŭ tơngai Yàng Tom Trồ rơndap pa wơl.

¹¹ Mơya Bơtau Krist neh tus lơh gơs cau gơnoar dờng lam bồ ơn phan duh khoai gơwèt mơ ală bơta niam neh tus rau, Kơnràñ neh mut tòm Hìu Ing Duh Khoai dờng rlau mơ wil tơl rlau, ò di bơh tê kòn mơnus bơtào gơs, hơ̆ ò di la bal mơ ală phan tòm rài do.

¹² Kơnràñ kung ò ngui mhàm ală be dam mơ kơnrồ kòn dê, mơya ngui mhàm să tòm Kơnràñ dê mơ lòt tus hơ tiah sàng goh ngan dô dơ̆ tơl rau, lơh gơs bơta tơwài glài gam sùm sùm.

¹³ Bơh dilah mhàm ală be dam, kơnrồ dam, bal mơ bùh kơnrồ me, rsìh hơđang ală cau ƀơ̆ ƀơl mơ lơh bol khai in gơlik gơs sàng goh mơ gơs goh poac să sơl,

¹⁴ tơ ài lah mhàm Bơtau Krist dê, la Bơtau kơnòm di Yàng Hwềng Goh gam sùm sùm mơ ơn să tòm Kơnràñ ò sồt rmàñ Yàng Tom Trồ in, gen rơp rào goh nùs tồr oh mi dê lin rlau tai klàs bơh ală broă chơt nàng duh broă Yàng Tom Trồ gam kis sùm.

¹⁵ Tài bơh bơta hơ̆, Bơtau Krist Đơng Kừh bơta ho bal pa dê, tồ ală cau neh geh hòi sac rgơi dòp geh sre brê gam sùm sùm be neh ho pơgon, bơh neh gơs bơta chơt nàng tơwài ală tồi glài ơm hơđơm bơta ho bal sơnròp.

¹⁶ Bơh gơs sră pà jơtài, gen pal gơn tus di tŭ cau lơh sră hơ̆ chơt rau.

¹⁷ Tŭ lơi cau lơh sră hơ̆ chơt rau, gen sră pà jơtài gơs gơnoar. Dilah cau lơh sră hơ̆ gam kis, gen sră pà jơtài ò gơs gơnoar.

¹⁸ Gen tàng dilah ò gơs mhàm gen bơta ho bal sơnròp kung ò gơs gơnoar.

¹⁹ Bơh tòm tŭ Môise yal tơnggit ală bơta sồr lam bơta boh lam dê jơh làng bol in rau, gen khai ai mhàm kơnrồ kòn mơ be dam, mơ dà, ngui che phồng mơ sơnò belàt, mơ ntê chi nha gơ be nsồm, mơ rsìh hơđang dap sră mơ hơđang jơh làng bol,

²⁰ mơ đơs lah: “Do la mhàm bơta ho bal Yàng Tom Trồ bơtào sồr oh mi pal lơh jat.”

²¹ Mơ Môise kung ai mhàm hơ̆ rsìh hơđang Hìu Ing Duh Khoai mơ hơđang jơh ală phan ngui tòm bơta duh khoai behơ̆ sơl.

²² Jat bơta boh lam gen jơh ală phan pal kơnòm di mhàm sồng geh goh, dilah ò gơs bơta hòr mhàm gen ò geh bơta toh glài.

Bơta chơt Yàng Jesu Krist dê tă sang jơh ală tồi glài

²³ Behơ̆ ală phan jat rùp sơnoa ală bơta hơđang trồ pal kơnòm di phan duh khoai hơ̆ sồng geh goh, gen ală phan hơđang trồ pal kơnòm di phan ơn duh khoai niam rlau tai sồng geh goh.

²⁴ Bơh Bơtau Krist ò di mut tòm tiah sàng goh bơh tê kòn mơnus lơh gơs, la tiah jat rnoas tiah sàng goh ngan, mơya mut hơđang trồ, mơ tŭ do Kơnràñ bơh bol he mơ tơlik mat di đap Yàng Tom Trồ.

²⁵ Ò di nàng ơn să tòm Kơnràñ oă dơ̆, be cau gơnoar dờng lam bồ ơn phan duh khoai kòp nam mut tòm Tiah Sàng Goh Ngan mơ cèng bal mhàm ò di la mhàm khai dê;

²⁶ dilah ò behơ̆, gen bơh di tŭ crơng gơs trồ tiah jơl tus di ngai do Kơnràñ neh pal kong jê sồt oă dơ̆ rau. Mơya tòm tŭ do la tŭ lồi dut ală rài, Kơnràñ neh tơlik să dô dơ̆ tơl rau nàng ơn să tòmlơh gơs phan ơn duh khoai tồ tă sang tồi glài.

²⁷ Jat be bơta neh lơh nền jơi kòn mơnus pal chơt dô dơ̆, gen tơnơ̆ pal kong cahrña,

²⁸ kung behơ̆ sơl Bơtau Krist, bơh neh ơn să Kơnràñ dê dô dơ̆ tơl rau nàng àñ tồi glài oă cau dê, gen rơp tơlik să dơ̆ bàr, ò di bơh tồi glài tai, mơya nàng dong klàs ală cau kơp gơn Kơnràñ.