Hebrơ 6 - Sră Goh 2018

Bơta sơbơng roh cau in sang bơta dòn

¹ Behơ̆, bol he pal lòi ing ală bơta ƀă liă tòm gùng duh khoai Bơtau Krist dê, mơ ntoat tus hơ bơta wil tơl, bañ bơtào wơl ală mơnàng tai, be bơta gơjrañ sang glài, bơh ală broă chơt, bơta dòn di Yàng Tom Trồ,

² bơta bơto bơh ƀaptem, bơta ơn tê, bơta kis wơl bơh bơta chơt, mơ bơta cahrña gam sùm sùm.

³ Bơh dilah Yàng Tom Trồ ai gơnoar, gen bol he rơp lơh bơta hơ̆.

⁴ Bơh ò rgơi ngan ală cau neh geh pơnđàng sòl dô dơ̆ rau, neh git làm bơta ai gòi bơh đang trồ, neh gơs pơnah tòm Yàng Hwềng Goh,

⁵ neh git làm bơta niam jơnau Yàng Tom Trồ dê, mơ ală gơnap gơnoar rài tơnơ̆ dê;

⁶ dilah bol khai gơtup pừ gen ò tŭ lơi rgơi lơh bol khai in gơjrañ sang glài dô dơ̆ tai, bơh să tòm bol khai pơng đìn Kòn Yàng Tom Trồ dô dơ̆ tai mơ ai cau bơtat bơtròh Kơnràñ di đap dunnia.

⁷ Bơh ù tiah lơi neh geh sùh dà mìu dùh hơđang gơ, gơtơnggơs ală chi che kwơ màng cau tùc tam in, gen dòp geh lơngai lơngò Yàng Tom Trồ dê.

⁸ Mơya dilah ù hòn lò mơ lò mrơt, gen kong sang lòi mơ kong srat sơntơm, lồi dut gen kong ồs sa.

Pal đòm jat cau pơrdòn jơnau ho Bal

⁹ Ơ oh mi kòñ gơboh, bulah bol hi đơs behơ̆ mơya bol hi dòn nền ngan lah ală oh mi ơm tòm bơta niam rlau, la ală broă gơ lòt bal mơ bơta dong klàs.

¹⁰ Bơh Yàng Tom Trồ ò di la ò song ring mơ hŭi ală broă mơ bơta kòñ gơboh oh mi neh yal tơlik bơh sơnđan Kơnràñ, tòm tŭ neh duh broă ală cau sàng goh in mơ kung gam duh broă tai sơl.

¹¹ Bol he kơp kòñ lah, kòp nă tòm oh mi yal tơlik bơta jơh nùs ngac ngar behơ̆ sùm, nàng geh bơta kơ̆ nền wil tơl tòm bơta gơn kơnòm jơl tus di lồi dut,

¹² tồ oh mi in ò lơh alah, mơya oh mi đòm jat ală cau gơs bơta dòn mơ bơta ơt ơl nàng pơrdòn jơnau ho pơgon.

Jơnau ho nền cê Yàng Tom Trồ dê

¹³ Tòm tŭ Yàng Tom Trồ ho pơgon mơ Abraham, bơh ò gơs Bơtau lơi dờng rlau, gen Kơnràñ ai să tòm Kơnràñ mơ srat să lah:

¹⁴ “Ngan, añ rơp ai lơngai mê in, mơ añ rơp bơtơl oă jơi bơtiàn mê in.”

¹⁵ Behơ̆, Abraham neh kong ơt kơp gơn jŏ jòng, gen tàng khai dòp geh jơnau Yàng Tom Trồ neh ho pơgon.

¹⁶ Bơh cau òs ai sơnđan cau dờng rlau mơ he nàng srat să, mơ tŭ lơi gơs bơta tòm pơndang gen ai jơnau srat să nàng pơnring.

¹⁷ Gơwèt mơ ală cau neh dòp jơnau ho Kơnràñ dê, Yàng Tom Trồ kòñ lơh loh làng lah Kơnràñ ò tŭ lơi tòmgơl tơnggume broă Kơnràñ dê, gen tàng Kơnràñ bơtơl jơnau srat să, mơ jơnau ho,

¹⁸ tồ kơnòm di bàr bơta ò tòmgơl hơ̆, la bàr bơta Yàng Tom Trồ ò rgơi đơs blac, mơ bol he la ală cau neh kìng crŭ tòm Kơnràñ, gen gơchồl pràn kơldang nàng sơmbat kơ̆ di bơta gơn kơnòm neh ơn di đap bol he.

¹⁹ Bol he gơs bơta gơn kơnòm hơ̆ be dô nơm lòs kơlnĕ đơng hwềng nùs dê, nền cê mơ kơ̆ ngan, mut tus tiah sàng goh đah dơlam kơrnìng;

²⁰ la tiah Yàng Jesu neh bơh bol he mơ mut lài tòm hơ̆, mơ gơlik gơs cau gơnoar dờng lam bồ ơn phan duh khoai gam sùm sùm jat mpồl Melcijedek.