Hebrơ 5 - Sră Goh 2018

Yàng Jesu Krist cau gơnoar dờng lam bồ ơn phan duh khoai

¹ Kòp nă cau gơnoar dờng lam bồ ơn phan duh khoai geh sac bơh digùl jơi kòn mơnus, mơ geh pồ bơtào bơh jơi kòn mơnus nàng duh broă Yàng Tom Trồ, tồ ơn phan pơdơng mơ phan ơn duh khoai bơh tồi glài.

² Khai rgơi gơs nùs nđàc sơngit ală cau bơrngơl gơla mơ tìs nrah, bơh să tòm Khai kung gơkòl tòm bơta lơbơn lơño.

³ Mơ tài bơh să tòm khai la lơbơn lơño, khai pal ơn phan duh khoai bơh tồi glài să tòm khai dê, kung be bơh tồi glài làng bol dê sơl.

⁴ Mơ bơta ryŭ ryơm hơ̆ ò gơs cau lơi jòi is he in, mơya pal geh Yàng Tom Trồ hòi sac, kung be Arôn òr nau.

⁵ Kung behơ̆ sơl, Bơtau Krist ò lơh gơklŏ is să tòm he in mơ lơh gơs cau gơnoar dờng lam bồ ơn phan duh khoai, mơya bơh Yàng Tom Trồ neh đơs mơ Kơnràñ lah: “Mê la Kòn Añ jê, Ngai do Añ neh tơnggơs Mê.”

⁶ Mơ tòm tiah ndai Yàng kung đơs lah: “Mê la cau gơnoar ơn phan duh khoai gam sùm sùm. Jat mpồl Melcijedek.”

⁷ Yàng Jesu Krist tòm tŭ gam kis hơđang ù, neh hòi driau dờng, ñìm rac nàng hòi dan mơ rac dan mơ Yàng Tom Trồ la Bơtau rgơi dong tă Kơnràñ bơh bơta chơt, mơ bơh nùs duh rngòt song ngan Kơnràñ dê, gen geh Yàng Tom Trồ dòp jơnau.

⁸ Bulah Kơnràñ la Kòn Yàng Tom Trồ, kung neh bơtê dòn bơr bơh ală bơta bòl glar jê sồt Kơnràñ neh kong,

⁹ mơ dơ̆ Kơnràñ neh geh wil tơl rau, gen gơlik gơs tòm ryas bơta dong klàs gam sùm sùm jơh ală cau in dòn bơr Kơnràñ,

¹⁰ mơ geh Yàng Tom Trồ pồ bơtào Kơnràñ la cau gơnoar dờng lam bồ ơn phan duh khoai jat mpồl Melcijedek.

Lah pơrhơng tòmdră mơ cau sang lòi bơta dòn

¹¹ Bol hi gơs oă bơta kòñ đơs bơh bơta do, mơya kalke ngan nàng yal tơlik oh mi in, tài bơh oh mi òbat ngan git wă.

¹² Pal ngan, tŭ do oh mi neh gơlik gơs cau bơto rau, mơya tŭ do oh mi gam kơnòm di cau bơto sồr oh mi ală bơta ƀă liă bơh jơnau Yàng Tom Trồ dê, mơ oh mi gam la cau pal càng dà toh, ò di la phan sa kơldang.

¹³ Bơh cau lơi mìng ngui dà toh, gen ò git làm jơnau song ring, bơh khai la kòn se dềt.

¹⁴ Mơya phan sa kơldang gen lòi ală cau neh dờng in, la ală cau kơnòm di bơta lơh jat mơ bơtê git bơta chài rgơi nàng cah is bơta niam mơ bơta iơh.