Hebrơ 13 - Sră Goh 2018

Kis lơh lòt niam nùs Yàng Tom Trồ

¹ Gơs tĕ nùs kòñ gơboh sùm bal mơ gơp be oh mi tòm Bơtau Krist.

² Bañ sang lòi bơta wă rò cau nac crih, bơh gơs cau ƀà lơh bơta hơ̆ neh wă rò ală cau gơnrơh mơ ò git.

³ Kah tĕ ală cau ơm jàm, be bol he kung ơm jàm bal mơ bol khai; kah tĕ ală cau kòl rồn bơklơn, bơh bol he kung gơs să jan be bol khai sơl.

⁴ Tơl nă cau pal sền dờng màng bơta tòmbau, bañ lơh ƀơ̆ ƀơl ơdŭ tòmbau; bơh Yàng Tom Trồ rơp cahrña ală cau rềs àr bơrnàn mơ ală cau dri tơlàr.

⁵ Bañ gơs nùs hàm hà jền priă; hừh nùs tĕ tòm bơta he neh gơs, bơh să tòm Yàng neh đơs lah: “Añ ò gơs tŭ lơi sang mê, kung ò gơs tŭ lơi lòi mê.”

⁶ Behơ̆ gen bol he gơs nùs dòn nền mơ đơs lah: “Yàng la Bơtau dong kòl añ jê, añ rơp ò rngòt, Ñchi kòn mơnus rgơi lơh di añ taih?”

⁷ Kah tĕ ală cau neh tề lam oh mi, neh bơto jơnau Yàng Tom Trồ dê oh mi in; sền kơlôi tĕ di bơta lồi dut bơta lơh lòt bol khai dê, mơ đòm tĕ bơta dòn bol khai dê.

⁸ Yàng Jesu Krist ngai òr, ngai do mơ jơl tus sùm sùm ò tŭ lơi tòmgơl.

⁹ Bañ lòi ală bơta bơto sồr krơi ndai cèng pơrdô oh mi. Hơ̆ la niam tồ dòp geh nùs kơ̆ wền kơnòm di bơta nđàc Yàng Tom Trồ dê, ò di kơnòm di bơta sồr lam bơh phan sa, la bơta ò kwơ ală cau in jat bơta hơ̆.

¹⁰ Bol he gơs dô nơm cơnòng duh khoai; cau lơi duh broă tòm Hìu Ing Duh Khoai gen ò gơs gơnoar sa phan lơi di cơnòng hơ̆.

¹¹ Bơh cau gơnoar dờng lam bồ ơn phan duh khoai cèng mhàm ală phan poan jơng tòm Tiah Sàng Goh Ngan nàng tơwài glài, mơ să jan bol gơ gen chu pơrguc hơ bơdìh sàl mpồl jơnum dê.

¹² Tài bơh hơ̆, tàng Yàng Jesu kung neh kong bòl glar jê sồt hơ bơdìh mpồng ƀòn nàng ai mhàm Kơnràñ dê lơh làng bol in gơlik gơs sàng goh.

¹³ Behơ̆ gen, bol he lik lòt tĕ tus hơ Kơnràñ hơ bơdìh sàl mpồl jơnum dê, nàng kong bơta bơtat bơtròh bal mơ Kơnràñ.

¹⁴ Bơh tềng do bol he ò gơs ƀòn dờng gam gơs sùm, mơya bol he jòi ƀòn rơp tus.

¹⁵ Behơ̆ bol he kơnòm tĕ di Yàng Jesu, mơ kư̆ ơn sùm phan ơn duh khoai la jơnau jòng ro Yàng Tom Trồ bơh bơr sơndồi yal tơlik sơnđan Kơnràñ la Yàng.

¹⁶ Bañ sang lòi bơta lơh niam mơ tòmpà phan he gơs, bơh hơ̆ la kung be phan ơn duh khoai niam nùs Yàng Tom Trồ.

¹⁷ Dòn bơr tĕ ală cau tề lam oh mi mơ dòn duh bol khai, bơh bol khai drơng kơp bơh hwềng soàn oh mi dê be cau pal yal tơlik broă; nàng bol khai lơh broă hơ̆ dô bă hòn chò, ò di moat jrùng, bơh dilah moat jrùng gen ò kwơ oh mi in.

¹⁸ Dan oh mi hòi dan bol hi in, bơh bol hi git nền lah bol hi gơs nùs tồr niam, kòñ lơh lòt dô bă song ngan sùm tòm jơh ală bơta.

¹⁹ Añ jơh nùs dan oh mi hòi dan añ, nàng añ in tus gòñ rlau hơ oh mi.

²⁰ Dan Yàng Tom Trồ la Bơtau lơngap lơngai, la Bơtau neh cèng Yàng Jesu bol he dê bơh bơta chơt, la Bơtau Dờng Ê Belàt, kơnòm di mhàm bơta ho bal gam sùm sùm,

²¹ lơh oh mi in wil tơl tòm jơh ală broă niam nàng lơh jat nùs kòñ Kơnràñ dê, mơ kơnòm di Yàng Jesu Krist mơ lơh gơs bơta niam nùs Kơnràñ tòm oh mi. Dan bơta gơklŏ gơrê hơ Kơnràñ jơl tus sùm sùm ò lồi! Amen.

²² Ơ oh mi, añ cih dô êt jơnau do oh mi in, dan oh mi dòp jơnau bơto tơngkah do.

²³ Oh mi pal git lah Timôthe la oh mi bol he dê neh geh hồ toh rau; dilah khai tus gòñ, gen añ mơ khai rơp lòt còp oh mi.

²⁴ Dan còp să jơh ală cau tề lam oh mi, mơ jơh tơl nă cau sàng goh. Ală cau Itali pơyoa jơnau còp să oh mi.

²⁵ Dan bơta nđàc ơm bal mơ jơh ală oh mi. Amen.