Hebrơ 10 - Sră Goh 2018

Yàng Jesu la tòm ryas bơta dong klàs

¹ Mơ tai, bơta boh lam mìng lơh rùp sơnio bơh ală phan niam rơp tus, ò di la să ngan ală phan hơ̆ dê, gen tàng ò gơs tŭ lơi rgơi kơnòm di ală phan ơn duh khoai ndròm bal ơn sùm kòp nam, nàng dong ală cau tus rềp gơlik gơs wil tơl ò.

² Dilah behơ̆, gen ò di cau neh sang lòi bơta ơn phan pơdơng rau ò ơ? Dilah ală cau duh khoai neh dô dơ̆ geh goh rau, gen nùs tồr bol khai ò gam git glài.

³ Gơpơrlơ̆ wơl, ală phan ơn duh khoai hơ̆ kòp nam tơngkah wơl bơh tồi glài,

⁴ bơh mhàm kơnrồ dam mơ be dam dê ò rgơi tă sang tồi glài.

⁵ Behơ̆ tàng, tòm tŭ Bơtau Krist lòt tus tòm dunnia, gen đơs lah: “Yàng ò kòñ phan ơn duh khoai mơ phan ơn, Mơya Kơnràñ neh rcang sir Añ in dô nơm să jan rau.

⁶ Yàng kung ò niam nùs di phan ơn chu pơrguc mơ phan ơn tơwài glài.

⁷ Gen Añ đơs lah: ‘Ơ Yàng Tom Trồ, do Añ lòt tus Nàng lơh jat nùs kòñ Yàng dê. Tòm dap sră neh cih bơh Añ.’”

⁸ Hơđang do Kơnràñ neh đơs: “Phan ơn duh khoai, phan ơn pơdơng, phan ơn chu pơrguc, phan ơn tơwài glài, Yàng ò kòñ, kung ò niam nùs sơl,” (hơ̆ la bơta cau ơn jat bơta boh lam);

⁹ gen tơnơ̆ Kơnràñ đơs lah: “Do, Añ lòt tus nàng lơh jat nùs kòñ Yàng dê.” Behơ̆ Kơnràñ neh sang bơta hơđap nàng bơtào gơs bơta hơ ngkòi.

¹⁰ Bơh Yàng Jesu Krist neh lơh jat nùs kòñ Yàng Tom Trồ mơ bol he neh gơlik gơs sàng goh, kơnòm dê bơta ơn să Kơnràñ dê dô dơ̆ tơl rau.

¹¹ Cau gơnoar ơn phan duh khoai kòp ngai ntào duh broă mơ ơn ală phan ơn duh khoai ndròm bal sùm, la bơta ò gơs tŭ lơi rgơi tă sang tồi glài;

¹² Mơya Bơtau Krist, tài bơh tồi glài mơ ơn dô nơm phan ơn duh khoai mìng dô dơ̆ mơ gam sùm sùm, gen nggui đah ma Yàng Tom Trồ,

¹³ tềng hơ̆ Kơnràñ ơm gơn ală cau sò tơm di Kơnràñ lơh gơs kơrnòl ơn jơng Kơnràñ dê.

¹⁴ Bơh kơnòm mìng dô nơm phan ơn pơdơng, Kơnràñ neh lơh ală cau gơlik gơs sàng goh in geh wil tơl sùm sùm.

¹⁵ Yàng Hwềng Goh kung lơh cơng bol he in, bơh tơnơ̆ mơ tŭ Kơnràñ neh đơs.

¹⁶ Yàng đơs lah: “Do la bơta ho bal Añ rơp bơtào mơ bol khai. Tơnơ̆ mơ ală ngai hơ̆, Añ rơp ơn bơta boh lam Añ jê tòm nùs bol khai, Mơ cih gơtòm dơngoh bol khai dê,”

¹⁷ Kơnràñ đơs tai lah: “Añ ò gam kah ală tồi glài mơ bơta tồi glài iơh bơsak bol khai dê tai.”

¹⁸ Tiah lơi gơs bơta toh glài, gen ò càng gơs phan ơn bơh tồi glài tai.

II. Bơta dòn mơ rài kis cau dòn jat Yàng dê ( 10:19 – 13:25 ) Gùng pa mơ kis tòm bơta sàng goh ngan

¹⁹ Ơ ală oh mi, bơh bol he neh kơnòm di mhàm Yàng Jesu dê, nàng gơs nùs dòn nền khin cha mơ lòt tus di Tiah Sàng Goh Ngan,

²⁰ bơh gùng pa mơ kis Kơnràñ neh pò bol he in lòt gan hơ kơrnìng, hơ̆ la lòt gan di să jan Kơnràñ dê;

²¹ bơh bol he neh gơs dô nă cau gơnoar dờng lam bồ ơn phan duh khoai at bồ hìu Yàng Tom Trồ dê,

²² mơ bơh neh gơs nùs geh rào goh bơh nùs tồr iơh, să jan geh rào goh mơ dà sàng, gen tàng bol he pal ai nùs song bal mơ bơta dòn kơ̆ nền wil tơl mơ lòt tus rềp hơ Yàng Tom Trồ.

²³ Bol he pal prap kơ̆ bơta gơn kơnòm mơ bol he neh gơs nàng gơ ò lơnggơr, bơh Yàng Tom Trồ neh ho pơgon la Bơtau lơh jat jơnau ho Kơnràñ dê.

²⁴ Bol he pal kah kơlôi bal mơ gơp, nàng tòmchồl bal tòm bơta kòñ gơboh mơ ală broă niam.

²⁵ Bañ sang lòi bơta pơjum bal be cau ƀà òs lơh, mơya pal bơto tơngkah bal mơ gơp, mơ sơlo pal lơh lin rlau tai, bơh oh mi gŏ ngai Yàng Jesu dê tus rềp.

²⁶ Bơh dilah tơnơ̆ mơ tŭ bol he neh dòp git jơnau song rau, mơ kư̆ lơh nền tìs glài jat nùs kòñ is, gen ò gam gơs phan ơn tơwài glài tai,

²⁷ mìng gam kơp gơn dô bă rngòt rngơt di bơta cahrña mơ ồs hơng rơp chu pơrguc ală cau sòdră di Yàng Tom Trồ.

²⁸ Cau lơi neh lơh tìs mơ bơta boh lam Môise dê, dilah gơs bàr pe nă cau lơh cơng, gen cau hơ̆ pal chơt ò gơs bơta nđàc sơngit,

²⁹ tơ ài lah cau jă trơm Kòn Yàng Tom Trồ, sền mhàm bơta ho bal neh lơh khai in geh gơlik gơs sàng goh la mhàm ƀơ̆ ƀơl, mơ sền òsơp di Yàng Hwềng neh ai bơta nđàc, gen oh mi kơlôi lah cau hơ̆ ò di pal kong lơh glài kơnjơ̆ rlau ò ơ?

³⁰ Bơh bol he git Bơtau neh đơs lah: “Bơta sal tê gơrê hơ Añ, Añ rơp tơm wơl,” mơ tai: “Yàng rơp cahrña làng bol Kơnràñ dê.”

³¹ Cau lơi dùh tòm tê Yàng Tom Trồ gam kis sùm gen la sơbơng roh ngan!

³² Kah tĕ ală ngai lài òr, tơnơ̆ mơ tŭ oh mi neh geh pơnđàng sòl rau, gen kong jai tòm bơta tòmlơh dờng bơh ală bơta jê sồt bòl glar,

³³ dơ̆ dơ̆ kong ală bơta bơtat bơtròh bal mơ bơta rung rài gơlik gơs, dơ̆ dơ̆ kong bal mơ ală cau kong bòl glar behơ̆ sơl.

³⁴ Bơh oh mi neh gơs nùs nđàc sơngit ală cau kong jàm, gơs nùs hòn chò bulah roh phan mơna, bơh oh mi git he gơs phan mơna niam rlau gam sùm sùm.

³⁵ Behơ̆ bañ sang nùs dòn nền oh mi dê, bơh bơta hơ̆ rơp gơs phan ƀàn dờng.

³⁶ Bơh oh mi pal kong jai, nàng tus di tŭ neh lơh wil tơl nùs kòñ Yàng Tom Trồ dê rau, gen rơp dòp geh bơta neh ho pơgon.

³⁷ Gam dô êt jŏ, mìng dô êt lơm, “Gen Bơtau pal tus rơp tus, ò di tus òbat.

³⁸ Cau song ring añ jê rơp kis bơh bơta dòn, Dilah ruc wơl, gen hwềng soàn añ ò chò hòp bơh khai dô êt lơi.”

³⁹ Mơya bol he ò di bal mơ ală cau ruc wơl mơ kong roh rui, mơya bal mơ ală cau gơs bơta dòn nàng geh dong klàs hwềng soàn.