Habakuk 3 - Sră Goh 2018

Jơnau hòi dan Habakuk dê

¹ Jơnau hòi dan cau gơnoar hwơr Habakuk dê, mơ bơta đơs pơnđik.

Jơnau hòi dan cau gơnoar hwơr dê

² Khoai Yàng Jehôwa! Añ neh kơno bơh bơta tiơng pơnro Kơnràñ dê; Ơ Yàng, añ rngòt rngơt ngan bơh ală broă lơh Kơnràñ dê. Dan lơh pa wơl ală broă hơ̆ tòm rài bol hi dê, Dan yal cau in git gơtòm tŭ tơngai bol hi dê; Tòm tŭ Kơnràñ gơjrañ dờng, dan kah wơl bơta nđàc sơngit!

³ Yàng Tom Trồ tus bơh Theman, Bơtau sàng goh tus bơh mơnơm Pharan. (Selah) Bơta gơklŏ Kơnràñ dê jơm gòm ală tap trồ, mơ bơta jòng ro Kơnràñ bềng lìu ù tiah.

⁴ Bơta àng gơcrà Kơnràñ dê kung be mattơngai; Ală puhlèp lik bơh tê Kơnràñ, gơnap gơnoar Kơnràñ dê neh pồn ndơp.

⁵ Pluh plàng gơ lòt di đap Kơnràñ, Kòp jê pluh plàng jat rềp bơh ngkòi Kơnràñ dê.

⁶ Kơnràñ neh ơm dơh mơ rơnggô plai ù; Kơnràñ sền mơ lơh ală làng bol rơm să. Ală mơnơm gam sùm sùm tơrlah tơrlơm, Ală dòr bơh rài yau lề lac. Ală gùng dà Kơnràñ dê gam sùm sùm ò lồi.

⁷ Añ gŏ ală sàl Kusan dê ơm hơđơm bơta jê sồt, ală kơrnìng sàl tiah Midian dê gơlơnggơr.

⁸ Ơ Yàng Jehôwa, Kơnràñ neh gơhào gơjrañ di ală hiòng dà sơl ơ? Bơta gơjrañ dờng Kơnràñ dê tòmdră di ală hiòng dà sơl ơ? Kơnràñ neh gơhào gơjrañ di ală dàlềng. Tòm tŭ Kơnràñ hào ală ơseh mơ rơndeh lòs tòmlơh pha lin rlau sơl ơ?

⁹ Kơnràñ tă tơlik àtak Kơnràñ dê, Kơnràñ sồr tus oă kam. (Selah) Kơnràñ ngui oă hiòng dà mơ cah is plai ù;

¹⁰ Ală mơnơm gŏ Kơnràñ gen gơrơm rngòt. Ală gùng dà hòr pràn; brong jrô nggồr sap dờng mơ tơngguh jơnhoa tê gơ hơđang.

¹¹ Mattơngai mơ mat kơnhai ơm ntào mŏ mŏ tòm ală tap trồ bơh bơta àng lơr ală kam par Kơnràñ dê, bơh puhlèp bơta gơcrà tà Kơnràñ dê.

¹² Tòm bơta gơjrañ dờng Kơnràñ cơnđòa lòt gan plai ù; mơ tòm bơta gơhào gơjrañ Kơnràñ jă trơm ală làng bol.

¹³ Kơnràñ neh lik nàng dong tă làng bol Kơnràñ dê, nàng dong klàs cau geh bong mơñà Kơnràñ dê; Kơnràñ jă tơnlề cau at bồ hìu cau iơh bơsak, Kơnràñ lòi kuh khai bơh bồ tus jơng. (Selah)

¹⁴ Kơnràñ ai tà tòm khai dê srơp bồ ală cau ling tòmlơh khai dê; khai brồ tus kung be càl rwac nàng lơh gơprah bol hi, hừh hơh kung be rơp sa loan cau dồn sa rƀah tòm tiah ơm pồn.

¹⁵ Kơnràñ hào ơseh jă hơđang dàlềng, Lơh lơnggac lơnggơr ală dà dờng.

¹⁶ Añ kơno mơ añ rơm să tòm añ, Kơno ntas gen sơndồi añ gơ mprơm; Bơta ồm lề gơmut tòm ntìng añ, mơ jơng añ gơrơm hơđơm añ. Behơ̆ añ rơp kơ̆ nùs kơp gơn ngai bơta rung rài la ngai gơ rơp tus hơđang lơgar brồ lơh bol hi.

Dòn kơnòm mơ hòn chò digùl bơta sơbơng rơng

¹⁷ Bulah chi ƀal rơp ò cat sơmbut mơ rơp ò gơs plai hơđang ntê ño; bulah chi ôlibe ò gơlik plai mơ ƀlàng sre ò tơnggơs phan sa; bulah ò gơs belàt tòm ƀlàng mơ ò gơs kơnrồ tòm wàng,

¹⁸ Añ kung rơp chò hòp tòm Yàng Jehôwa, Añ rơp hòn chò tòm Yàng Tom Trồ la Bơtau dong klàs añ jê.

¹⁹ Jehôwa, Yàng Tom Trồ la bơta pràn kơldang añ jê, Kơnràñ lơh jơng añ jê gơlik kung be jơng jùn, Kơnràñ dong añ lòt hơđang ală tiah jòng. (Cih cau at bồ mpồl lip kơñi in, ngui pĕ ală kơñi mơ che).