Habakuk 2 - Sră Goh 2018

¹ Añ rơp ntào di tiah kơp gàr añ jê, mơ să tòm añ rơp ơm tòm ală theng kơ̆ cê; añ rơp kơp sền ñchi jơnau Kơnràñ rơp đơs mơ añ, mơ mbe Kơnràñ ho wơl bơh bơta añ yoam do.

Jơnau ho wơl Yàng Jehôwa dê

² Gen Yàng Jehôwa ho wơl lah: “Mê cih wơl tĕ bơta gơtơnggŏ, mơ cih loh làng gơ hơđang ală mpàn cih, tồ dô nă cau ntoat rgơi sền gơ.

³ Bơh bơta gơtơnggŏ pal gơn tus di tŭ lơh nền; gơ đơs bơh bơta lồi dut, mơ ò đơs blac. Bulah sền gơlơh be òbat tus, gơn tĕ gơ; ngan gơ rơp tus mơ rơp ò lơh òbat.

⁴ Sền tĕ, di cau pơnhừ să, hwềng ơm tòm bol khai ò song ring; mơya cau song ring kis bơh bơta dòn khai dê.

⁵ Rlau mơ hơ̆, tơrnòm la bơta pơrlơ̆ dră; bơta pơnhừ să mơ ò ơm rlô. Bơh bol khai pò ơnàng ngko kung be bơtô ƀồc, kung be bơta chơt ò tŭ lơi tơl. Khai tơrgòm jơh ală lơgar să tòm khai in, mơ hòi pơjum jơh ală làng bol gơrê mơ bol khai.”

⁶ Jơh ală bol khai ò di ai jơnau dơñŏ tơnhial mơ lah pơrhơng khai, đơs lah: “Bòl glar ngan cau in pơjum tơrgòm ală phan kơñau, mơ lơh khai in pas gơs kơnòm di bơta ai bơklơn! Bơta do pal gơs tòm nđò jŏ tai taih?

⁷ Ală cau tòm dồs mê dê rơp ò guh nisơna, Bol khai rơp ò kah rngal mơ lơh mê in rơm să ơ? Gen mê rơp gơlik gơs ală phan tòmpìt geh bol khai in.

⁸ Tài bơh mê neh phà tòmpìt oă lơgar, ală làng bol gam kis rơp phà tòmpìt mê. Bơh mê neh lơh gơhòr mhàm cau; mê neh lơh jàñ bơsak mơ ală lơgar, ală ƀòn dờng mơ jơh tơl nă cau ơm tòm hơ̆.

⁹ Bòl glar ngan cau lơi in bơt hìu khai dê kơnòm di cồng nha iơh bơsak, lơh rsòn khai dê hơđang tiah jơnhoa, tồ geh klàs bơh di ală bơta tơnroh tus.

¹⁰ Mê neh bơyai rơndap bơta ƀàssìl hìu mê dê, bơh mê tơnroh oă làng bol; mơ neh tơnroh bơta kis mê dê.

¹¹ Ală lŭ tòm dơrñang rơp hòi driau, mơ ală ròc dra hơđang rkàng hìu rơp ho wơl.

¹² Bòl glar cau lơi in ai mhàm bơt ƀòn dờng, mơ ai bơta iơh bơsak bơt ƀòn dờng.

¹³ Ò di la bơh Yàng Jehôwa Gơnap Gơnoar Dờng Làm Jơh neh lơh nền bơta bòl glar lơh broă làng bol dê mìng kung be lòng sing ồs, mơ ală lơgar kong bòl glar lơh broă ò kwơ ò ơ?

¹⁴ Mơya ù tiah rơp geh bềng lìu bơh bơta git wă bơta gơklŏ Yàng Jehôwa dê, kung be ală dà bềng lìu dàlềng behơ̆ sơl.

¹⁵ Bòl glar cau lơi in ai tơrnòm ală cau gơp ƀòn he in, tròc gơ bơh di nhồng gơltau bol khai in ñô jơl tus di tŭ bơñul nàng khai rgơi sền trol di să kuh bol khai dê!

¹⁶ Mê rơp geh bềng bơta ƀàssìl ala bơta gơklŏ. Tŭ do tus di mê! Ñô tĕ, mơ lòt gơsèng! Mơngàn tòm tê ma Yàng Jehôwa dê rơp tus gùt dar mê, mơ bơta ƀàssìl rơp jơm hơđang bơta gơklŏ mê dê!

¹⁷ Bơh bơta rhung rhang mê neh lơh Liban in rơp jơm ndơp hơđang mê; mơ bơta tơnroh ală jơi phan poan jơng rơp lơh mê in rngòt rngơt. Bơh mê neh lơh gơhòr mhàm kòn mơnus dê; mê neh tơnroh ală lơgar, ală ƀòn dờng mơ jơh ală làng bol tòm hơ̆.

¹⁸ Dô nơm rùp ràk bơh dô nă cau neh mòn gơs bơta lơi kwơ taih? Dô nơm rùp duh khoai, bơto jơnau ma blac gơs kwơ lơi taih? Bơh cau neh mòn gơ dòn kơnòm di phan khai neh lơh gơs; bulah khai lơh gơs rùp ràk ò rgơi đơs.

¹⁹ Bòl glar ngan cau lơi in đơs mơ chi lah: ‘Guh tĕ!’ Hala đơs mơ lŭ ò gơs bơta kis lah: ‘Ñă ntào tĕ!’ Gơ rgơi bơto sơl? Sền tĕ, gơ neh geh ƀềp mơ màh mơ priă, mơya ò gơs dô êt lơi nhơm tă tòm gơ.

²⁰ Mơya Yàng Jehôwa ơm tòm Hìu Duh Khoai Sàng Goh Kơnràñ dê; lòi jơh plai ù ơm tĕ mŏ mŏ di đap Kơnràñ.”