Galati 5 - Sră Goh 2018

Bơta khat gơboh tòm Bơtau Krist

¹ Bơtau Krist neh hồ toh bol he tồ geh khat gơboh; behơ̆ ntào kơ̆ tĕ, bañ lòi să he kòl tòm yô dĭ gơna dê tai.

² Añ la Pol đơs mơ oh mi lah dilah oh mi kong siat gơltau, gen Bơtau Krist ò gơs kwơ oh mi in dô êt lơi.

³ Añ lơh cơng nền tai mơ ală cau kong siat gơltau lah, bol khai kòl bơklơn pal prap gàr jơh ală bơta boh lam,

⁴ cau lơi tòm oh mi kòñ kơnòm di bơta boh lam tồ geh kòp la song ring, gen oh mi neh cah is bơh Bơtau Krist, tìs nrah bơh di bơta nđàc Yàng Tom Trồ rau?

⁵ Đah bol he bơh bơta dòn mơ kơnòm di Yàng Hwềng dong, tàng bol he kòp bơta song ring he gơn kơnòm.

⁶ Bơh tòm Yàng Krist Jesu, bơta siat gơltau hala ò siat gơltau kung ò gơs kwơ, mơya bơta dòn geh yal tơlik bơh broă lơh tòm bơta kòñ gơboh sồng gơs kwơ.

⁷ Oh mi òs ntoat jak; ñcau neh kơryan kơrdơl oh mi nàng oh mi ò dòn bơr jơnau song taih?

⁸ Bơta pơrlồm pơndòm hơ̆ ò di tus bơh Bơtau hòi sac oh mi ò.

⁹ Dô êt kañ lơh gơprồ jơh dô kơnac kơmbuh.

¹⁰ Gơwèt mơ oh mi, añ gơs nùs dòn nền tòm Yàng lah oh mi ò gơs nùs kơlôi is ndai; mơya cau lơh dơrcul oh mi, ò git la cau lơi, gen cau hơ̆ rơp kong lơh glài.

¹¹ Ơ oh mi, đah mơ añ, dilah añ gam bơto yal bơh bơta siat gơltau, gen mbe añ gam kòl kup kơryan taih? Dilah behơ̆ gen bơta gơtup tìs bơh chi pơng neh sang jơh rau.

¹² Kơp kòñ lah ală cau lơh dơrcul oh mi, bol khai rơp koh is să tòm bol khai dê la niam rlau!

Jơnau bơto tơngkah ( 5:13 – 6:18 )

¹³ Ơ oh mi, oh mi neh geh hòi sac lòt tus hơ bơta khat gơboh, mơya bañ ai bơta khat gơboh hơ̆ lơh kai oh mi in lơh jat poac să, mơya ai tĕ nùs kòñ gơboh duh broă bal mơ gơp.

¹⁴ Bơh jơh ală bơta boh lam geh crap wơl tòm dô jơnau do: “Mê kòñ gơboh tĕ di cau gơp ƀòn he be he.”

¹⁵ Mơya dilah oh mi kap loan gơp he, gen kơrhia tĕ, rngòt oh mi tòm tơnroh bal mơ gơp.

Broă lơh poac să dê mơ plai Yàng Hwềng dê

¹⁶ Behơ̆ añ đơs lah: Lòt tĕ jat Yàng Hwềng, gen oh mi ò lơh jat nùs hàm kòñ is poac să dê.

¹⁷ Bơh poac să hàm kòñ tòmdră mơ Yàng Hwềng, mơ Yàng Hwềng tòmdră mơ poac să, bàr đah gơtòmdră sùm behơ̆, gen tàng oh mi ò rgơi lơh bơta he kòñ lơh.

¹⁸ Mơya dilah oh mi kơnòm di Yàng Hwềng tề lam gen ò ơm tòm gơnoar bơta boh lam dê.

¹⁹ Ală broă poac să dê la loh làng be do: Hơ̆ la rềs àr bơrnàn, ngkòr ngkàc, bung jang,

²⁰ duh rùp ràk, juh proh, sò tơm, jak tòmlah, ƀoah, gơjrañ mañ, tòm pơndang bal, cah is mpồl, jat gùng duh khoai tìs,

²¹ ƀoah gơjrañ, bơñul lơmbè, jròk ñô sa, mơ ală bơta ndai ndròm bal behơ̆ sơl. Añ bơto tơngkah oh mi be añ neh bơto rau: Dilah cau lơi tìs tòm ală bơta behơ̆ gen ò geh pơrdòn lơgar Yàng Tom Trồ dê.

²² Mơya plai Yàng Hwềng dê hơ̆ la kòñ gơboh, hòn chò, lơngap lơngai, kong ơt, kơ̆ dơn, lơbơn niam, dòn song,

²³ niam lơnhơn, git kơrhia. Ò gơs bơta boh lam lơi bơkơŭ ală bơta hơ̆.

²⁴ Mơ tai, ală cau gơrê bal mơ Yàng Jesu Krist neh tơnchơt nùs nhơm poac să dê bal mơ nùs kòñ tìs mơ hàm kòñ is gơ dê hơđang chi pơng rau.

²⁵ Dilah bol he kơnòm di Yàng Hwềng nàng kis, gen kung lòt tĕ jat Yàng Hwềng sơl.

²⁶ Bañ jòi jat bơta tiơng pơnro màng ryŭ ò kwơ nàng tòm bơrcek bal mơ ƀoah gơjrañ bal.