Galati 3 - Sră Goh 2018

Bơta boh lam mơ bơta dòn ( 3:1 – 5:12 )

¹ Ơ cau Galati tùl gơla ne, ñcau neh juh bơklah oh mi taih? Hơ̆ la cau mơ di đap mat neh geh ràng tơlik loh làng Yàng Jesu Krist kong pơng di chi pơng taih?

² Añ lùp oh mi mìng dô sèng do lơm: Hơ̆ la kơnòm bơh ală broă bơta boh lam dê hala bơh kơno mơ dòn tàng oh mi neh dòp geh Yàng Hwềng taih?

³ Mbe oh mi tùl gơla behơ̆ taih? Oh mi neh sơntòm kơnòm di Yàng Hwềng, gen tŭ do oh mi kơnòm di poac să nàng lơh sir sơl ơ?

⁴ Oh mi neh git làm oă bơta bòl glar dô bă ò kwơ behơ̆ sơl ơ? Ngan la ò kwơ.

⁵ Yàng Tom Trồ ai Yàng Hwềng oh mi in mơ lơh ală broă crih crài digùl oh mi, tài bơh oh mi lơh ală broă bơta boh lam dê hala tài bơh oh mi kơno mơ dòn taih?

⁶ Be Abraham neh dòn Yàng Tom Trồ, gen bơta hơ̆ geh kòp la song ring khai in rau.

⁷ Behơ̆ oh mi pal dòp git tĕ lah, ală cau gơs bơta dòn hơ̆ la kòn sau ngan Abraham dê.

⁸ Sră Goh kung neh đơs lài lah Yàng Tom Trồ rơp kòp làng bol bơdìh la song ring bơh bơta dòn, gen tàng neh yal lài Abraham in Jơnau Niam do: “Bơh mê Yàng Tom Trồ rơp ai lơngai jơh ală jơi bơtiàn kòn mơnus in.”

⁹ Abraham dòn gen geh lơngai, behơ̆ cau lơi dòn gen geh lơngai be khai sơl.

¹⁰ Bơh cau lơi kơnòm di ală broă bơta boh lam dê, gen kòl srat sơntơm, bơh neh cih lah: “Pal srat ngan di cau lơi ò kơ̆ wền lơh jat jơh ală bơta neh cih tòm sră bơta boh lam.”

¹¹ Mơ tai, ò gơs cau lơi kơnòm di bơta boh lam nàng geh kòp la song ring di đap Yàng Tom Trồ ò, bơta hơ̆ la loh làng ngan, bơh “cau song ring rơp kis bơh bơta dòn.”

¹² Mơ tai, bơta boh lam ò di be bơta dòn, mơya: “Cau lơi lơh jat bơta boh lam gen rơp kơnòm di bơta hơ̆ mơ geh kis.”

¹³ Bơtau Krist neh tơwài bol he lik klàs bơh bơta srat sơntơm bơta boh lam dê, Kơnràñ neh tài bơh bol he mơ gơlik gơs bơta srat sơntơm, bơh neh cih lah: “Pal srat ngan di cau lơi kong yồng hơđang chi pơng,”

¹⁴ tồ bơta lơngai lơngò Abraham dê kơnòm di Yàng Krist Jesu geh tus hơđang làng bol bơdìh, nàng bol he in kơnòm di bơta dòn mơ dòp geh Yàng Hwềng jat be jơnau neh ho ai.

Bơta boh lam mơ jơnau ho pơgon

¹⁵ Ơ oh mi, añ đơs jat bơta òs mòng cau dê: Tŭ gơs sră cih bàr nă cau dô nùs bal neh lơh nền dô bơta lơi, gen ò gơs cau lơi geh gơnoar jùt hala bơtơl bơta lơi tai ò.

¹⁶ Bơh ală jơnau ho pơgon neh đơs mơ Abraham bal mơ jơi bơtiàn khai dê, gen ò đơs lah: “Ai ală jơi bơtiàn in,” be sơnio bơh oă cau; mơya mìng đơs: “Ai jơi bơtiàn mê in,” be sơnio bơh dô nă cau lơm, hơ̆ la Bơtau Krist.

¹⁷ Behơ̆ gen añ đơs lah: Jơnau ho bal mơ Yàng Tom Trồ neh lơh nền lài òr, gen ò geh sang lòi tài bơh bơta boh lam, la bơta gơs tơnơ̆ mơ jơnau ho bal poan rhiang pe jơt nam. Bơta boh lam ò di lơh jơnau ho pơgon gơlik gơs ò kwơ.

¹⁸ Bơh dilah bơta ai gòi Yàng Tom Trồ la bơh bơta boh lam, gen ò càng jơnau ho pơgon tai; mơya Yàng Tom Trồ neh ai bơta ai gòi hơ̆ Abraham in bơh jơnau ho pơgon.

¹⁹ Gen ñchi bơh tài gơs bơta boh lam taih? Yàng Tom Trồ bơtơl bơta boh lam tài bơh ală bơta tìs glài, mơ jơl tus di tŭ cau jơi bơtiàn Abraham dê tus, hơ̆ la Bơtau gơs jơnau ho pơgon. Bơta boh lam geh cèng bơh cau gơnrơh mơ bơh dô nă cau đơng kừh.

²⁰ Cau đơng kừh ò di la cau đơng kừh bơh dô đah lơm ò, mơya Yàng Tom Trồ mìng gơs dùl.

Bơta boh lam tề lam tus hơ Bơtau Krist

²¹ Behơ̆ gen bơta boh lam gơtòmsò mơ jơnau ho pơgon Yàng Tom Trồ dê sơl ơ? Ò di behơ̆ ò; bơh dilah neh ai dô bơta boh lam lơi rgơi ai bơta kis, gen ngan bơta geh kòp la song ring bơh bơta boh lam mơ tus.

²² Mơya Sră Goh neh kòp jơh dunnia la ơm tòm gơnoar tồi glài dê, tồ bơta neh ho pơgon rơp geh ai gòi ală cau dòn in bơh bơta dòn tòm Yàng Jesu Krist.

²³ Lài mơ tŭ bơta dòn òhềt tus gen bol he kòl krơ̆ ơm tòm gơnoar kơp gàr bơta boh lam dê, nàng gơn jơl tus di tŭ bơta dòn geh ràng tơlik.

²⁴ Behơ̆ bơta boh lam kung be cau bơto lam bol he lòt tus hơ Bơtau Krist, tồ bol he in bơh bơta dòn mơ geh kòp la song ring.

²⁵ Mơya tŭ do bơta dòn neh tus, bol he ò tai ơm tòm gơnoar cau bơto hơ̆ tai.

²⁶ Bơh jơh ală oh mi la kòn sau Yàng Tom Trồ dê bơh bơta dòn tòm Yàng Krist Jesu.

²⁷ Cau lơi tòm oh mi neh gơs ƀaptem tòm Bơtau Krist hơ̆ la neh dòp soh să tòm Bơtau Krist.

²⁸ Ò tai gơs cau Juda hala cau Grek; ò tai gơs cau dĭ hala cau geh khat gơboh; ò tai gơs cau klau hala cau ùr; bơh tòm Yàng Krist Jesu jơh ală oh mi gơlik gơs dô bă bal lơm.

²⁹ Dilah oh mi neh bal mơ Bơtau Krist, gen oh mi la jơi bơtiàn Abraham dê, hơ̆ la cau pơrdòn jat jơnau ho pơgon Yàng Tom Trồ dê.