Galati 2 - Sră Goh 2018

Hìu Jum Goh Jerusalem dòp gơnoar bơto dờng Pol dê

¹ Tơnơ̆ mơ jơt poan nam añ guh tai hơ Jerusalem bal mơ Banaba, mơ kung lam Tit lòt bal.

² Añ neh lòt jat jơnau yal tơlik Yàng Tom Trồ dê mơ guh tềng hơ̆. Tòm bơta tìp is mơ ală cau gơnoar bơto dờng añ ràng tơlik bol khai in Jơnau Niam mơ añ neh bơto yal làng bol bơdìh in. Añ ò kòñ broă lơh añ jê lài òr mơ tŭ do gơlik gơs ò kwơ.

³ Bulah Tit la cau Grek neh lòt bal mơ añ, khai kung ò gơkòl bơklơn siat gơltau.

⁴ Bol hi neh lơh behơ̆ la tài bơh ală cau ma blac ne mut òm tòm mpồl bol hi, nàng sền òm bơta khat gơboh bol hi geh tòm Yàng Krist Jesu, bol khai kòñ kup bol hi nàng lơh dĭ.

⁵ Bol hi ò bài alah di bol khai dô êt lơi, dô êt kung ò sơl, tồ jơnau song Jơnau Niam dê geh ơm kơ̆ wền tòm oh mi.

⁶ Ai ală cau neh geh sền be la dờng màng (lài òr bol khai la cau be lơi, gen ò gơs bơta lơi gơwèt mơ añ: Yàng Tom Trồ ò di sền òsơp di cau lơi), añ đơs ngan, ală cau dờng màng hơ̆ kung ò dong bơtơl añ in dô êt bơta lơi.

⁷ Gơpơrlơ̆ wơl, tòm tŭ bol khai gŏ bơta bơto Jơnau Niam cau ò siat gơltau neh jào añ in, kung be bơta bơto Jơnau Niam cau siat gơltau neh jào Pier in sơl,

⁸ (bơh gơnap gơnoar Yàng Tom Trồ dê neh lơh broă tòm Pier nàng khai lơh gơs cau gơnoar bơto dờng ală cau siat gơltau in, kung lơh broă tòm añ sơl nàng añ lơh gơs cau gơnoar bơto dờng làng bol bơdìh in),

⁹ gen Jakơ, Sepha, Jang, la ală cau neh geh sền be ală cau gơnoar lam bồ, mơ bol khai git đal bơta nđàc neh ai añ in, at tê ma mơ añ bal mơ Banaba nàng gơs bơta tòmklac bal, tồ bol hi in lòt tus hơ làng bol bơdìh, ai bol khai gen lòt tus hơ ală cau siat gơltau.

¹⁰ Bol khai mìng nting bol hi pal kah di ală cau rƀah lơòi, la bơta añ kung neh jơh nùs lơh.

Pol lah pơrhơng Sepha

¹¹ Mơya tòm tŭ Sepha neh tus hơ Antiôt, añ neh tòmdră mơ khai, bơh khai gơs tiah pal lah pơrhơng.

¹² Hơ̆ la tài bơh lài mơ tŭ ală cau bơh Jakơ sồr lòt òhềt tus tềng hơ̆, gen khai sào bal mơ cau làng bol bơdìh; mơya tòm tŭ bol hơ̆ neh tus gen khai ruc ơm is dô đah, tài bơh rngòt di mpồl cau kòñ prap gàr bơta boh lam siat gơltau.

¹³ Ală cau Juda ndai kung lơh ma blac bal mơ khai behơ̆ sơl, tian gơs să tòm Banaba kung kòl hwài bal tòm bơta lơh ma blac bol khai dê sơl.

¹⁴ Mơya dơ̆ añ gŏ bol khai ò lòt song jat jơnau song Jơnau Niam dê, gen añ đơs mơ Sepha di đap jơh ală cau lah: “Dilah bi la cau Juda mơ lơh lòt be cau làng bol bơdìh, mơ ò lơh lòt be cau Juda, gen mbe bi bơklơn cau làng bol bơdìh pal lơh lòt be cau Juda taih?”

Cau bơdìh mơ cau Juda geh dong klàs bơh bơta dòn

¹⁵ Đah bol hi la cau Juda, ò di la cau gơs glài bơh tòm làng bol bơdìh.

¹⁶ Bulah behơ̆, bol hi kung neh git lah cau geh kòp la song ring, ò di bơh ală broă jat bơta boh lam dê, mơya kơnòm di bơta dòn tòm Yàng Jesu Krist, gen tàng să tòm bol hi neh dòn tòm Krist Jesu, nàng geh kòp la song ring bơh bơta dòn tòm Bơtau Krist, ò di bơh ală broă bơta boh lam dê, bơh ò gơs cau lơi geh kòp la song ring bơh ală broă bơta boh lam dê.

¹⁷ Mơya tòm tŭ bol hi jòi bơta tồ geh kòp la song ring tòm Bơtau Krist, dilah să tòm bol hi gơkòl sền la cau gơs glài, gen behơ̆ Bơtau Krist la cau duh broă tồi glài dê ơ? Ò di behơ̆!

¹⁸ Bơh dilah añ bơtào wơl ală bơta añ neh tơnroh, gen añ yal tơlik să tòm añ la cau tìs mơ bơta boh lam.

¹⁹ Bơh bơta boh lam, añ neh chơt gơwèt mơ bơta boh lam, nàng añ kis Yàng Tom Trồ in.

²⁰ Añ neh kong pơng di chi pơng bal mơ Bơtau Krist, bulah behơ̆ añ kis, ò di la añ kis tai, mơya Bơtau Krist kis tòm añ; tŭ do añ gam kis tòm poac să, hơ̆ la añ kis tòm bơta dòn Kòn Yàng Tom Trồ dê, la Bơtau neh kòñ gơboh di añ, mơ neh phi să tòm Kơnràñ bơh añ.

²¹ Añ ò lơh bơta nđàc Yàng Tom Trồ dê gơlik gơs ò kwơ; bơh dilah bơta song ring tus bơh bơta boh lam, gen Bơtau Krist kong chơt la ò kwơ.