Este 1 - Sră Goh 2018

Bau ùr cau bơtau la Basthi kòl sang lòi

¹ Do la bơta neh gơlik gơs tòm rài Ahasuerus, la cau bơtau neh at bồ hơđang dô rhiang bàr jơt poh kơnhwàl bơh lơgar Jôa tus hơ lơgar Ethiôpi.

² Tòm ală ngai hơ̆, tòm tŭ bơtau Ahasuerus nggui at bồ hơđang sơbàn bơtau khai dê tòm ƀòn dờng kơ̆ cê Susa,

³ tòm nam dơ̆ pe rài at bồ khai dê, khai yò dô bơta ñô sa dờng jơh ală cau kwang at bồ mơ ală cau kwang duh broă khai in. Ală mpồl ling Persia mơ Medi dê mơ ală cau màng ryŭ mơ ală cau kwang dờng at bồ ală kơnhwàl neh gơs mat.

⁴ Tŭ hơ̆ bơtau ràng tơlik bơta pas gơs dờng lơgar bơtau khai dê mơ ryŭ ryơm bơh gơnoar at bồ khai dê tòm oă ngai, jơh ală la dô rhiang phàm jơt ngai.

⁵ Tòm tŭ ală ngai hơ̆ neh wil tơl rau, cau bơtau yò sa jơh ală làng bol gơs mat tòm ƀòn dờng Susa, jơh cau dờng mơ cau dềt in dô bơta ñô sa dờng tòm poh ngai tòm suơn gơlang bơtau dê.

⁶ Gơs kơrnìng che brài bò mơ tơlir trồ, yồng mơ che dơmài lơbơn mơ dà gur kơt di ală dơwàng priă mơ ală jrong lŭ kràng màng. Gơs ală cơnòng nggui jòng mơ màh mơ priă ơn hơđang mơnàng hìu bơt mơ lŭ màng tơl ală bơnga bò, pơrhê, rmit, jù mơ ală lŭ kas màng ndai.

⁷ Tơrnòm geh yò tòm ală mơngàn màh ò ndròm bal, mơ tơrnòm bơtau dê gơs oă ngan, jat be bơta pas gơs cau bơtau dê.

⁸ Tơrnòm geh ơn tòm ală gri, ñô khat gơboh ò bơklơn, bơh bơtau neh ai gơnoar jơh ală cau kwang duh broă tòm gơlang bơtau dê ñô sa jat nùs kòñ bol khai dê.

⁹ Rlau mơ bơta hơ̆ tai, bau ùr bơtau la mò Basthi kung yò dô bơta ñô sa dờng ală cau ùr in tòm gơlang bơtau Ahasuerus dê.

¹⁰ Tòm ngai dơ̆ poh, tòm tŭ bơtau neh hòn chò bơh tơrnòm, gen bơtau sồr Mehuman, Bistha, Harbôna, Biktha, Abaktha, Jethar mơ Karkas la poh nă cau kwang kriau la ală cau ơm di đap bơtau,

¹¹ cèng bau ùr bơtau dê la Basthi tus di đap bơtau, tơndau sơgơn bơtau khai in tồ ràng tơlik bơta hàng mơnĕ khai di đap làng bol mơ ală cau kwang at bồ in, bơh khai sền hàng mơnĕ ngan.

¹² Mơya bau bơtau la mò Basthi ò bài tus, jat gơnoar sồr bơtau dê mơ ală cau kwang kriau neh yal. Tòm bơta do, bơtau gơhào nùs mơ bơta gơjrañ duh ngan tòm nùs khai dê.

¹³ Gen cau bơtau lùp bơta kơlôi sơnơng ală cau git jak bơh bơta boh lam (bơh bơta do, jat bơta òs mòng bơtau đơs mơ ală cau jak chài la cau git wă bơta boh lam mơ bơta òs yau,

¹⁴ mơ ơm rềp rlau jơh mơ cau bơtau hơ̆ la: Karsena, Sethar, Atmatha, Tarsis, Meres, Marsena, mơ Memukan, la poh nă cau kwang at bồ tòm lơgar Persia mơ Medi dê, la ală cau gơs gơnoar lòt tus rềp mơ bơtau mơ la ală cau nggui tiah sơnròp tòm lơgar bơtau dê):

¹⁵ “Jat be bơta boh lam, ñchi pal lơh di bau ùr bơtau la Basthi tài bơh mò neh ò lơh jat jơnau gơnoar sồr bơtau Ahasuerus neh sồr ală cau kwang kriau yal khai in taih?”

¹⁶ Gen Memukan đơs di đap cau bơtau mơ ală cau kwang at bồ lah: “Ò di mìng bau ùr bơtau la Basthi neh lơh tìs mơ bơtau lơm, mơya kung lơh tìs mơ ală cau kwang at bồ, mơ jơh làng bol la ală cau ơm tòm kơnhwàl bơtau Ahasuerus dê sơl.

¹⁷ Bơh bơta lơh lòt bau ùr bơtau dê rơp pơnro tus di jơh ală cau ùr, lơh bol khai rơp sền òsơp di ală bau klau bol khai dê mơ đơs lah: ‘Bơtau Ahasuerus neh ai jơnau gơnoar sồr bau ùr bơtau la Basthi tus di đap bơtau, mơya Basthi ò bài tus.’

¹⁸ Ngai do, ală cau ùr ală cau màng ryŭ Persia mơ Medi dê la ală cau neh kơno bơh bơta lơh lòt bau ùr bơtau dê, gen bol khai rơp tòmdră mơ ală cau kwang at bồ bơtau dê, gen rơp gơs bơta sền òsơp mơ bơta tòmdră sùm ò lồi!

¹⁹ Behơ̆ tàng, dilah niam nùs bơtau gen dan bơtau tơlik dô gơnoar sồr bơh bơtau mơ cih gơtòm sră bơta boh lam lơgar cau Persia mơ Medi dê nàng ò rgơi tòmgơl hơ̆ lah Basthi rơp ò gơs tŭ lơi geh tus tai di đap bơtau Ahasuerus. Mơ kung dan bơtau tă gơnoar bau ùr bơtau khai dê mơ ai dô nă cau ndai in niam rlau mơ khai.

²⁰ Gen tòm tŭ jơnau lơh nền bơtau dê neh geh yal tơlik tòm làm jơh lơgar dờng ơnàng, jơh ală cau ùr rơp ki ngàm di bau klau bol khai dê, bơh cau dềt rhền tus di cau dờng màng rlau jơh kung behơ̆ sơl.”

²¹ Cau bơtau mơ ală cau màng ryŭ bơtau dê lơh niam nùs di jơnau bơyai hơ̆, behơ̆ cau bơtau lơh jat be bơta Memukan neh bơyai,

²² bơtau pơyoa sră tus hơ jơh ală tiah tòm lơgar khai dê, kòp kơnhwàl jat jơnau cih gơ dê mơ kòp làng bol jat jơnau đơs làng bol hơ̆ dê, mơ bơto yal lah kòp nă cau klau pal lơh gơs cau at bồ hìu nhă tòm khai dê.