Esai 9 - Sră Goh 2018

Dô nă kòn klau neh deh bol he in

¹ Mơya rơp ò gơs bơta klam jơngo ală cau in ơm tòm bơta jê sồt moat jrùng. Tòm rài yau Yàng Tom Trồ neh lơh glài ƀòn lơgar Jebulun mơ Neptali; mơya tòm ngai tơnơ̆ Kơnràñ rơp lơh àng gơklŏ gùng tòm dàlềng ù tiah đah ne hiòng Jordan, ù tiah Galile mơ ală làng bol dê.

² Làng bol lòt tòm tiah klam jơngo neh gŏ bơta àng dờng; mơ bơta àng neh sòl hơđang ală cau tòm lơgar hơđơm mƀur bơta chơt dê.

³ Yàng neh pò ơnàng làng bol do mơ neh bơtơl bơta chò hòp bol khai in; bol khai hòn chò di đap Yàng kung be hòn chò tòm ngai toès kòi, be cau hòn chò tòm tŭ tòmpà phan tòmpìt geh.

⁴ Kung be tòm ngai Midian kong lơh alah, Yàng neh tă yô kơnjơ̆ bol khai neh àñ, tă mơng lơh glài cau kơt gan hơđang pơnì bol khai, mơ gai pù ơlih bơh di cau rồn bơklơn bol khai.

⁵ Kòp nơm khŏ cau ling jă tòm tŭ tòmlơh, mơ kòp blah ồi ào neh gơđềt mhàm rơp lòi nàng chu tòm ồs, rơp gơlik kung be nsồm sing ồs.

⁶ Bơh gơs dô nă kòn dềt tơnggơs bol he in, hơ̆ la dô nă kòn klau ai bol he in, gơnoar at bồ rơp ơn hơđang pơnì Kơnràñ dê. Kơnràñ rơp geh sơnđan la Bơtau Jak Chài Crih Crài, la Yàng Tom Trồ Gơnap Gơnoar Dờng, la Bèp Gam Sùm Sùm, la Bơtau Ring Lơngai.

⁷ Gơnoar at bồ mơ bơta ring lơngai Kơnràñ dê kư̆ gơbơtơl sùm ò lồi. Kơnràñ rơp at bồ hơđang sơbàn bơtau Dabit dê, mơ hơđang lơgar Kơnràñ dê, bơt bơtào lơgar bơh bơta song ring mơ song ngan bơh do jơl sùm sùm. Nùs duh hul Yàng Jehôwa Gơnap Gơnoar Dờng dê rơp lơh gơs wil tơl bơta hơ̆.

Bơta gơjrañ Yàng Tom Trồ dê gơwèt hơ Israel

⁸ Yàng Jehôwa neh yal dô jơnau tòmdră mơ Jakôp, jơnau hơ̆ tus hơđang Israel.

⁹ Jơh làng bol rơp git jơnau hơ̆, hơ̆ la Epraim mơ làng bol Samari, bol khai ai nùs pơnhừ să mơ đơs lah:

¹⁰ “Gac bơt hìu neh tơrlah, mơya bol he rơp bơt wơl mơ lŭ neh phàt; ală tòm chi ƀal neh gơpừ, mơya bol he rơp tam chi pơnàng tòm tiah bol gơ dê.”

¹¹ Mơya Yàng Jehôwa tơngguh ală cau tòmdră mơ bol khai, mơ neh chồl bơchồt cau sò tơm bol khai dê.

¹² Cau Siri đah mattơngai lik mơ cau Philistin đah mattơngai mut neh ha bơr sa loan Israel. Bulah neh gơs jơh ală bơta hơ̆, bơta gơjrañ Kơnràñ dê kung ò pơrlac ngài; tê Kơnràñ gam pò tơlik.

¹³ Mơya làng bol ò rê wơl hơ Bơtau neh lơh glài bol khai, bol khai kung ò jòi Yàng Jehôwa Gơnap Gơnoar Dờng.

¹⁴ Gen tàng tòm dô ngai, Yàng Jehôwa rơp koh bồ mơ tiang Israel, ntê chi gòl mơ tòm proh.

¹⁵ Bồ hơ̆ la ală cau kwang kra mơ cau màng ryŭ; tiang hơ̆ la ală cau gơnoar hwơr bơto jơnau blac chừt.

¹⁶ Ală cau tề lam làng bol do neh lòt tìs nrah, mơ ală cau geh tề lam gơkòl roh rui.

¹⁷ Behơ̆ tàng, Yàng Jehôwa ò niam nùs di ală cau pơnu, mơ Kơnràñ kung rơp ò nđàc sơngit cau kòn đòi mơ cau ùr bơnrau, bơh kòp nă bol khai la cau ò duh rngòt mơ iơh bơsak, bơr lơi kung đơs jơnau bơrngơl gơla. Bulah neh gơs jơh ală bơta hơ̆, bơta gơjrañ Kơnràñ dê kung ò pơrlac ngài, tê Kơnràñ dê gam pò tơlik.

¹⁸ Ngan, bơta iơh bơsak sa hơng be ồs, gơ sa roh lò mrơt mơ ală lò, gơ sa pơrguc ală chi tòm brê, tian gơs ñhŭ gơguh jòng hơđang.

¹⁹ Ù tiah rơp kong chu pơrguc bơh bơta gơjrañ dờng Yàng Jehôwa Gơnap Gơnoar Dờng dê, làng bol gơlik gơs be phan sing ồs; ò gơs cau lơi rơp nđàc pơlai oh mi he,

²⁰ bol khai rơp sa roh đah ma, mơya gam jơgloh; bol khai rơp sa loan đah kiau, mơya ò hòm lai. Kòp nă rơp sa poac kòn sau he dê.

²¹ Manase rơp sa loan Epraim, mơ Epraim rơp sa loan Manase; bol khai lơh gơs dô bă bal nàng tòmdră mơ Juda. Bulah neh gơs jơh ală bơta hơ̆, bơta gơjrañ Kơnràñ dê kung ò pơrlac ngài, tê Kơnràñ dê gam pò tơlik.