Esai 8 - Sră Goh 2018

Asiri, phan ngui tòm tê Yàng Jehôwa

¹ Yàng Jehôwa đơs mơ añ lah: “Ai tĕ dô nơm mpàn dờng, mơ cih hơđang hơ̆ mơ jơnau cih kòn mơnus dê lah: ‘Maher Salal Hasbas.’”

² Añ cèng bal Uria la cau gơnoar ơn phan duh khoai mơ Sacari kòn klau Jeberekia nàng lơh cơng song ngan añ in.

³ Gen añ lòt tus hơ cau gơnoar hwơr ùr; khai bun mơ deh dô nă kòn klau. Gen Yàng Jehôwa đơs mơ añ lah: “Tơmoh sơnđan tĕ khai la Maher Salal Hasbas;

⁴ lài mơ tŭ kòn dềt git đơs: ‘Ơ bèp añ jê!’ hala ‘Ơ mè añ jê!’ gen bơta pas gơs Damas dê mơ phan phà kup Samari di rơp kong tă cèng bơh cau bơtau Asiri.”

⁵ Yàng Jehôwa đơs tai mơ añ lah:

⁶ “Tài bơh làng bol do neh pơndang sang ală hiòng dà ring lơngai Silôe dê mơ rơm să rngòt di Rejin mơ kòn klau Remalia dê;

⁷ gen tàng Yàng Jehôwa rơp cèng dà tih hiòng hòr pràn dờng tòmdră mơ bol khai; hơ̆ la bơtau Asiri bal mơ jơh bơta gơklŏ khai dê; gơ rơp hòr guh hơđang jơh ală hiòng gơ dê, gơ ngŏ lìu hơđang jơh ală àr gơ dê;

⁸ gơ rơp hòr mut tòm Juda, gơ cèng pơrdô jơh, gơ lòt gan mơ bam ndơp tus di ngko; Ơ Emmanuel, gơ pò đar jơm gòm jơh đah ơnàng lơgar mê dê.”

⁹ Ơ ală làng bol, lơh tĕ dô bă bal mơ gơlik roh nùs; Ơ jơh ală làng bol lơgar ngài, iat tĕ! Kơt tĕ but bol mê dê mơ gơdô nùs! Kơt tĕ but bol mê dê mơ gơdô nùs!

¹⁰ Tòmbơyai tĕ bal mơ gơp, mơya gơ rơp gơlik roh lơm; Đơs tĕ dô jơnau, mơya gơ rơp ò ntào jai; bơh Yàng Tom Trồ ơm bal mơ bol he.

¹¹ Bơh Yàng Jehôwa neh đơs bơta do añ in tòm tŭ tê Kơnràñ dê pràn ngan ơn hơđang añ, mơ bơto pơhìn añ bañ cơnđòa lòt tòm gùng làng bol do dê, mơ đơs lah:

¹² “Bañ sơnđan la bơtào kai gơrmơ̆i tòm tŭ làng bol do sơnđan la bơtào kai gơrmơ̆i; bañ rngòt di bơta bol khai rngòt, mơ rngòt rngơt.

¹³ Mơya rngòt tĕ di Yàng Jehôwa Gơnap Gơnoar Dờng la Bơtau bol mê ơn nùs sàng goh; lòi tĕ Kơnràñ la Bơtau bol mê pal rngòt, mơ lòi Kơnràñ gơlik bơta rngòt rngơt bol mê dê.

¹⁴ Kơnràñ rơp gơlik gơs dô bă tiah sàng goh, dô pơnai lŭ lơh gơtup jơng jơh bàr nơm hìu Israel dê; Kơnràñ rơp gơlik gơs dô pơnai lŭ gơtup pừ; dô nơm dă mơ dô nơm bơtơng ală cau ơm tòm Jerusalem in.

¹⁵ Mơ oă cau tòm bol khai rơp gơtup jơng, bol khai rơp pừ mơ bơcah, bol khai rơp yar dă mơ kòl kup.”

¹⁶ Mê kơt tĕ jơnau lơh cơng do mơ tap ƀang kì bơta bơto do digùl ală cau bơtê Añ jê.

¹⁷ Añ rơp gơn kơp Yàng Jehôwa, Kơnràñ neh pồn mat Kơnràñ dê bơh di hìu Jakôp, añ rơp gơn kơnòm di Kơnràñ!

¹⁸ Sền do, añ mơ kòn sau mơ Yàng Jehôwa neh ai añ in, bol hi la ală tềl mơ rùp sơnio tòm Israel bơh Yàng Jehôwa Gơnap Gơnoar Dờng ơm hơđang mơnơm Siôn.

¹⁹ Tŭ do, dilah gơs cau đơs mơ mê lah: “Lòt tĕ lùp ală cau sền dà mơ cau gru cau bơjơu, la ală cau đơs òm mơ đơs chều,” gen pal ho lah: “Dô nơm làng bol ò di pal hòi lùp ală yàng bol khai dê, cau chơt ai sơnđan cau gam kis,

²⁰ bơh bơta bơto sồr mơ bơh bơta nting sồr ơ?” Ngan, ală cau đơs behơ̆ rơp ò gơs àng drim!

²¹ Bol khai rơp lòt làm tòm lơgar, bòl glar dờng ngan mơ jơgloh; tòm tŭ bol khai jơgloh gen bol khai gơjrañ ngan, bol khai srat rma bơtau mơ ală yàng bol khai dê. Bol khai wèt mat bol khai hơđang,

²² hala bol khai rơp sền di ù, mơya mìng gŏ bơta jê sồt bòl glar mơ klam jơngo mơ bơta rngòt rngơt, mơ bol khai rơp kong bơtrơh tơmut tòm bơta klam jơngo cik.