Esai 7 - Sră Goh 2018

Jơnau đơs hwơr bơh Emmanuel

¹ Tòm rài Aca, kòn klau Jôtham, sau Ôsia, gơs bơtau at bồ lơgar Juda; gen Rejin, bơtau lơgar Aram, mơ Peka, kòn klau Remalia, bơtau Israel, guh tòmlơh mơ Jerusalem, mơya ò rgơi geh pha.

² Tòm tŭ hìu Dabit kơno lah: “Aram neh lơh gơs dô bă bal mơ Epraim,” gen nùs Aca mơ làng bol khai dê wañ lơnggơh kung be chi tòm brê gơ ơwañ bơh càl.

³ Gen Yàng Jehôwa đơs mơ Esai lah: “Lik lòt tĕ tìp mat mơ Aca, mê mơ kòn klau mê dê la Sea Jasup, di tiah dut tơmbòr dà Tơnau Hơđang, tòm gùng lòt hơ sre cau chài ñòm brài,

⁴ mơ đơs mơ khai lah: ‘Kơrhia tĕ, ơm mŏ mŏ mơ bañ rngòt. Bañ lòi nùs mê bòl glar tài bơh bàr gơl lòng ồs sa, tài bơh bơta gơhào gơjrañ Rejin mơ Aram dê, mơ kòn klau Remalia dê.

⁵ Bơh Aram, bal mơ Epraim mơ kòn klau Remalia dê neh bơtào kai gơrmơ̆i nàng tòmdră mơ mê, mơ đơs lah:

⁶ “Bol he guh tĕ tòmlơh mơ Juda, lơh tơnroh Jerusalem, mơ tòmpìt sơmbrơt lơgar bol he in, mơ pồ bơtào kòn klau Tebael dê lơh gơs bơtau at bồ bol khai.”’

⁷ Gen tàng Jehôwa Yàng Tom Trồ đơs be do: ‘Bơta hơ̆ ò gơlik gơs, bơta hơ̆ ò gơlik tus!

⁸ Bơh bồ Aram dê la Damas, mơ bồ Damas dê la Rejin. (Tòm prau jơt pram nam tai, Epraim rơp kong alah, ò geh kòp la dô nơm làng bol tai.)

⁹ Bồ Epraim dê la Samari, bồ Samari dê mìng la kòn klau Remalia. Dilah bol mê ò ơm kơ̆ tòm bơta dòn, gen bol mê rơp ò tŭ lơi ntào jai wil tơl.’”

Tềl krơi Aca in

¹⁰ Yàng Jehôwa đơs tai mơ Aca lah:

¹¹ “Dan tĕ Jehôwa Yàng Tom Trồ mê dê dô nơm tềl is, tòm tiah jrô lơgar làng ƀồc dê hala hơđang trồ rlau jơh.”

¹² Mơya Aca đơs lah: “Añ rơp ò dan, añ rơp ò lòng Yàng Jehôwa.”

¹³ Gen Esai đơs lah: “Iat tĕ do, ơ hìu Dabit! Bol mê lơh dơrcul bơta kong ơt kòn mơnus dê la ò tơl sơl ơ? Bol mê kung rơp lơh dơrcul Yàng Tom Trồ añ jê tai sơl ơ?

¹⁴ Gen tàng, să tòm Yàng Jehôwa rơp ai bol mê in dô nơm tềl krơi: Ne, dô nă cau ơruh rơp bun mơ deh dô nă kòn klau, mơ rơp tơmoh sơnđan la Emmanuel.

¹⁵ Khai rơp sa dơngi dà toh mơ dà lơwe tòm tŭ khai git tơl nàng sang bơta iơh mơ sac bơta niam.

¹⁶ Bơh lài mơ tŭ kòn dềt hơ̆ git sang bơta iơh mơ sac bơta niam, gen lơgar bàr nă bơtau mơ mê rngòt rơp kong sang lòi ngềt ngơt.

¹⁷ Yàng Jehôwa rơp tơndùh hơđang mê mơ hơđang làng bol mê dê, mơ hơđang hìu bèp mê dê ală tŭ tơngai be do, òhềt tŭ lơi tus bơh di ngai Epraim cah is bơh Juda, mơ bơtau Asiri.”

¹⁸ Tòm ngai hơ̆, Yàng Jehôwa rơp hwac hòi ală rhài bơh ală tồ dà Ejiptơ dê, mơ ală òng bơh lơgar Asiri.

¹⁹ Jơh ală bol gơ rơp tus pơjum tơrgòm tòm ală thòng jrô mơ tòm ală trồm lŭ, hơđang jơh ală rlau lò mơ hơđang jơh ƀlàng ñhơt.

²⁰ Tòm ngai hơ̆ Yàng Jehôwa rơp ngui dô nơm pềs koah ơpah bơh đah ne hiòng hơ̆ la bơtau Asiri nàng koah bồ bol mê bal mơ sơnò jơng bol mê dê, mơ kung koah tơn sơnò tềp bol mê dê tai sơl.

²¹ Tòm ngai hơ̆, dô nă cau klau rơp ròng dô nơm kơnrồ dra mơ bàr nơm belàt.

²² Mơ rơp sa dơngi dà toh tài bơh bol gơ gơs dà toh tơngkah tơngkañ. Jơh ală cau gam wơl tòm lơgar rơp sa dơngi dà toh mơ dà lơwe.

²³ Tòm ngai hơ̆, kòp bă tiah lơi gơs dô rbô tòm ño kas ndròm mơ dô rbô sieklơ priă, rơp gơlik gơs lò mrơt mơ tòm lò.

²⁴ Cau lơi kòñ lòt tus tềng hơ̆, pal cèng kam mơ àtak bơh jơh ù tiah rơp hòn lò mơ lò mrơt

²⁵ Ai hơđang ală dòr la tiah bơh lài neh pŏ mơ tùc tam, bol mê rơp ò lòt tus tềng hơ̆ tai, bơh rngòt di lò mơ lò mrơt; ală tiah hơ̆ rơp gơlik gơs tiah ai kơnrồ in lòt khat gơboh mơ belàt in jă trơm.