Esai 65 - Sră Goh 2018

Bơta cahrña song ring Yàng Tom Trồ dê

¹ Ală cau ò lùp Añ mơ neh jòi Añ; Añ neh geh bàn bơh ală cau ò jòi jat Añ. Añ neh đơs: “Do Añ, do Añ”, mơ dô nơm làng bol ò hòi lùp sơnđan Añ.

² Añ neh pò tê Añ jê jơh ngai mho wèt mơ dô nơm làng bol jak tòmdră, la ală cau lòt tòm ală gùng ò niam, jat nùs kơlôi sơnơng is bol khai dê,

³ la dô nơm làng bol kư̆ bơrcek Añ sùm di đap mat Añ, ơn ală phan duh khoai tòm ală suơn, chu kơlhô hơđang ală cơnòng duh khoai bơt mơ gac,

⁴ la cau nggui digùl ală bơtô ƀồc, drơng mang tòm ală tiah ndơp ndơr, sa poac sur, ơn dà poac ƀơ̆ ƀơl tòm ală glah.

⁵ Bol khai đơs lah: “Ơm tĕ ngài, bañ tus rềp hơ añ, bơh añ la sàng goh ngan bol mê in!” Bol khai la ñhŭ tòm trồm muh Añ, la ồs sa hơng sùm jơh ngai mho.

⁶ Ne, gơs jơnau cih di đap Añ la: “Añ rơp ò ơm mŏ mŏ, mơya Añ rơp tơm wơl; Añ rơp tơm wơl bơta hơ̆ di tiang ào bol khai dê.

⁷ Bơh tồi glài bol mê dê bal mơ tồi glài ồng pàng bol mê dê,” Yàng Jehôwa đơs behơ̆. “Tài bơh bol khai neh chu ală phan ơn hơđang ală mơnơm, mơ sền òsơp di Añ hơđang ală dòr, Añ rơp was wơl di tiang ào bol khai dê, bơta tơm wơl wil tơl bơh ală broă lơh bol khai dê.”

⁸ Do la jơnau đơs Yàng Jehôwa dê: “Kung be tơrnòm ño gơs tòm dơrkum plai ño, mơ cau đơs lah: ‘Bañ lơh roh gơ, bơh gam gơs bơta lơngai tòm hơ̆.’ Behơ̆ Añ rơp lơh bơh ală cau duh broă Añ jê; mơ ò tơnroh jơh tơl nă bol khai.

⁹ Añ rơp lơh ală kòn sau lik bơh Jakôp, mơ bơh Juda gơlik ală cau pơrdòn ală mơnơm Añ jê; làng bol sac rwah Añ jê rơp pơrdòn gơ, mơ tềng hơ̆ ală cau duh broă Añ jê rơp ơm.

¹⁰ Sarôn rơp gơlik gơs dô nơm ƀlàng ñhơt ală mpồl belàt in, mơ thòng Akôr la tiah ơm rlô ală mpồl phan poan jơng in, mơ làng bol Añ in la cau jòi jat Añ.

¹¹ Mơya bol mê la cau sang lòi Yàng Jehôwa, mơ hŭi mơnơm sàng goh Añ jê, la cau neh rcang yò cơnòng sa yàng bơta bơtoah mơ bơta sơbơng roh in, mơ tròc tơrnòm neh bơcă bềng mơngàn yàng lơh nền rài kis dê.

¹² Añ rơp lơh nền bol mê pal kong pềs tà, mơ bol mê jơh tơl nă pal kun să di đap cau sreh tơnchơt cau; bơh Añ neh hòi mơya bol mê ò ho wơl, Añ neh đơs mơya bol mê ò iat. Bol mê neh lơh bơta iơh di đap mat Añ, mơ neh sac rwah bơta ò niam nùs Añ.”

¹³ Behơ̆ tàng Yàng Jehôwa la Yàng Tom Trồ đơs be do: “Ală cau duh broă Añ rơp sa, mơya bol mê rơp kong jơgloh; ală cau duh broă Añ rơp hùc, mơya bol mê rơp kong tơhìr; ală cau duh broă Añ rơp hòn chò, mơya bol mê rơp kong ƀàssìl ƀàsso.

¹⁴ Ală cau duh broă Añ rơp đơs chò bơh nùs bềng bơta chò hòp, mơya bol mê rơp ñìm rac bơh nùs moat jrùng, rac ròc bơh hwềng nùs sràt bơtang.

¹⁵ Bol mê rơp lòi wơl sơnđan bol mê lơh gơs dô jơnau srat rma ală cau mơ Añ neh sac rwah; mơ Jehôwa Yàng Tom Trồ rơp tơnchơt bol mê; mơya ală cau duh broă Añ jê rơp ai dô sơnđan krơi.

¹⁶ Cau lơi hòi dan dô bơta lơngai tòm lơgar gen rơp ai lơngai bơh Yàng Tom Trồ bơta dòn song dê; cau lơi srat să ho nền tòm lơgar gen rơp srat să bơh Yàng Tom Trồ bơta dòn song dê. Bơh ală bơta bòl glar kalke lài òr neh hŭi jơh mơ neh pồn ndơp bơh di mat Añ.

Ală bơta gơklŏ bơta crơng gơs pa dê

¹⁷ Do, Añ rơp crơng gơs ală tap trồ pa mơ plai ù pa. Ală bơta yau rơp ò kah tai, ò gam rê wơl tòm dơngoh.

¹⁸ Mơya hòn chò tĕ mơ chò hòp tĕ gam sùm sùm tòm bơta Añ crơng gơs, bơh Añ rơp crơng gơs Jerusalem lơh gơs dô bơta chò hòp, mơ làng bol gơ dê lơh gơs dô bơta hòn chò.

¹⁹ Añ rơp hòn chò tòm Jerusalem, mơ rơp chò hòp tòm làng bol Añ jê; tềng hơ̆ rơp ò gam kơno jơnau ñìm rac hala jơnau driau dờng tai.

²⁰ Tềng hơ̆ rơp ò tŭ lơi gơs dô nă kòn kis mìng dô êt ngai, hala dô nă cau kra ò kis tơl jơh ală nam khai dê; cau lơi chơt tòm tŭ neh gơs dô rhiang nam rơp kòp la chơt gam pơnu; mơ cau ò kis tus di dô rhiang nam rơp kòp la cau kong srat rma.

²¹ Bol khai rơp bơt ală hìu mơ ơm tòm hơ̆; bol khai rơp tam ală suơn ño mơ sa plai gơ dê.

²² Bol khai ò tai bơt ală hìu mơ gơs ală cau ndai ơm tòm hơ̆, hala tùc tam mơ cau ndai sa. Bơh khà nam làng bol Añ jê rơp kung be khà nam dô nơm chi; ală cau sac rwah Añ jê rơp dòp geh hòn chò jŏ jòng cồng nha bơh broă tê bol khai neh lơh.

²³ Bol khai rơp ò lơh broă gơlik ò kwơ, bol khai tơnggơs kòn sau nàng kong bơta rung rài; bơh bol khai la dô nơm làng bol geh Yàng Jehôwa ai lơngai lơngò, bol khai bal mơ ală kòn sau bol khai dê.

²⁴ Lài mơ tŭ bol khai hòi dan Añ rơp ho wơl; tòm tŭ bol khai ơm đơs Añ rơp kơno.

²⁵ So rhau mơ belàt kòn rơp sa bal, klìu triă rơp sa rhe kung be kơnrồ, mơya bơs rơp sa ù. Bol khai rơp ò kong cau lơh jê sồt hala tơnroh, tòm jơh mơnơm sàng goh Añ jê,” Yàng Jehôwa đơs behơ̆.