Esai 64 - Sră Goh 2018

Jơnau hòi dan làng bol Yàng dê

¹ Ơ hơh! Kơp kòñ Kơnràñ crè ală tap trồ mơ mù, bơh hơ̆ ală mơnơm gơlơnggơr di đap Kơnràñ!

² Kung be tòm tŭ ồs sa ală rlau lò, mơ ồs lơh dà in khuh, nàng lơh ală cau sò tơm Kơnràñ dê git sơnđan Kơnràñ, mơ lơh ală làng bol rơm să di đap Kơnràñ!

³ Tòm tŭ Kơnràñ neh lơh ală bơta pal rngòt rngơt mơ bol hi ò kơp kòñ, Kơnràñ neh mù, mơ ală mơnơm neh gơlơnggơr di đap bơta gơs mat Kơnràñ.

⁴ Bơh di ală rài yau òr, ò gơs cau lơi neh kơno, kung ò gơs tồr lơi neh iat, ò gơs gar mat lơi neh gŏ gơs Yàng Tom Trồ lơi ndai rlau mơ Kơnràñ, neh lơh gơs broă ală cau in kơp gơn di Kơnràñ.

⁵ Kơnràñ neh tus tìp ală cau chò hòp lơh bơta di, la ală cau kah bơh Yàng mơ lòt tòm ală gùng dà Kơnràñ dê. Mơya tòm tŭ bol hi kư̆ tìs glài tòmdră, gen Kơnràñ neh gơhào gơjrañ. Tài bơh Kơnràñ neh pồn să tòm Kơnràñ bơh bơta tìs glài bol hi dê.

⁶ Bol hi jơh tơl nă neh gơlik gơs kung be dô nă cau ƀơ̆ ƀơl, mơ jơh ală broă song ring bol hi dê la kung be ală ào ƀơ̆ ƀơl; bol hi jơh tơl nă ñòp ro kung be dô nơm nha, mơ tồi glài bol hi dê kung be càl khồm pơrdô bol hi roh thit.

⁷ Ò gơs dô nă cau lơi hòi dan di sơnđan Kơnràñ, hala pơnđơl pràn nàng at di Kơnràñ; bơh Kơnràñ neh pồn mat bơh di bol hi, mơ lòi bol hi kong roh rui tài bơh tồi glài bol hi dê.

⁸ Bulah behơ̆, Ơ Yàng Jehôwa, Kơnràñ la Bèp bol hi dê! Bol hi la ù kơnàng, Kơnràñ la Cau Tòm mòn gri; bol hi jơh tơl nă la broă tê Kơnràñ lơh.

⁹ Ơ Yàng Jehôwa, dan Kơnràñ bañ gơjrañ oă ir, dan bañ kah ală tồi glài bol hi dê sùm sùm. Tŭ do dan Kơnràñ wèt sền di bol hi, bơh bol hi jơh tơl nă la làng bol Kơnràñ dê.

¹⁰ Ală ƀòn dờng sàng goh Kơnràñ dê neh gơlik gơs dô nơm ƀlàng bràs; Siôn neh gơlik gơs la dô nơm ƀlàng ngềt ngơt, Jerusalem la tiah sang lòi srau gòi.

¹¹ Hìu duh khoai sàng goh mơ gơklŏ bol hi dê la tiah ồng pàng bol hi dê jòng ro Kơnràñ, neh kong chu mơ ồs; mơ jơh ală tiah dờng màng bol hi in neh kong phà tơnroh.

¹² Ơ Yàng Jehôwa, tơnơ̆ mơ jơh ală bơta do, Kơnràñ rơp kong ơt să tòm Kơnràñ dê ơ? Kơnràñ rơp kư̆ ơm mŏ mŏ mơ lơh glài bol hi kơnjơ̆ rlau tai sơl ơ?