Esai 60 - Sră Goh 2018

Bơta gơklŏ Siôn dê

¹ Guh tĕ, pơnđàng sòl tĕ, bơh bơta àng mê dê neh tus, mơ bơta gơklŏ Yàng Jehôwa dê neh pơnđàng hơđang mê.

² Bơh bơta jơngo rơp jơm gòm plai ù, bơta klam jơngo cik ală làng bol dê; mơya Yàng Jehôwa rơp pơnđàng sòl hơđang mê, mơ bơta gơklŏ Kơnràñ dê rơp tơlik să hơđang mê.

³ Ală làng bol rơp tus hơ bơta àng mê dê, mơ ală cau bơtau rơp tus hơ bơta àng gơcrà rìng àng drim mê dê.

⁴ Pò tĕ mat mê dê mơ sền gùt dar: Jơh tơl nă pơjum bal mơ lòt tus hơ mê; ală kòn klau mê dê tus bơh tiah ngài, mơ ală kòn ùr mê dê rơp geh ròng kơnđu tòm tơwòr tê.

⁵ Gen mê rơp sền gŏ mơ gơs muh mat àng lơr, nùs mê rơp rơm ngòt mơ bơta hòn chò; tài bơh bơta tơngkah tơngkañ ală dàlềng dê rơp geh cèng tus hơ mê, bơta pas gơs ală lơgar dê rơp tus hơ mê.

⁶ Dô mpồl oă làkđa rơp jơm mê, ală làkđa kòn tòm Midian mơ Ephah. Jơh ală cau bơh Seba rơp tus, bol khai rơp cèng màh mơ kơlhô, mơ yal tơlik jơnau jòng ro Yàng Jehôwa.

⁷ Jơh ală mpồl phan poan jơng bơh Kedar rơp geh tơrgòm wơl tus hơ mê, ală belàt dam Nebayôt dê rơp lơh gơs phan duh broă mê in; bol gơ rơp geh dòp lơh gơs phan ơn hơđang cơnòng duh khoai Añ jê, mơ Añ rơp lơh gơklŏ hìu duh khoai gơklŏ Añ jê.

⁸ Ală cau hơ̆ la ñcau mơ par kung be dô puk mhwal, kung be ală sềm ntòp rê wơl hơ rsòn gơ dê, taih?

⁹ Bơh ală bồt pơlào rơp kơp gơn Añ; gơs ală ơhò Tarsi sơnròp ngan, cèng brê ală kòn sau mê dê rê wơl bơh tiah ngài, bol khai cèng bal priă mơ màh bol khai dê, tài bơh sơnđan Jehôwa Yàng Tom Trồ mê dê, mơ bơh Bơtau Sàng Goh Israel dê, bơh Kơnràñ neh lơh gơklŏ mê in.

¹⁰ Ală cau làng bơdìh rơp bơt wơl ală dơrñang mê dê, mơ ală cau bơtau bol khai dê rơp duh broă mê. Bơh tòm bơta gơjrañ Añ jê, Añ neh pù lơh mê; mơya tòm bơta nđàc Añ jê Añ rơp kòñ nđàc di mê.

¹¹ Ală mpồng dờng mê dê rơp pò sùm, ngai mơ mang bol gơ rơp ò tŭ lơi til, nàng ală lơgar rơp cèng tus hơ mê bơta pas gơs bol khai dê; mơ ală bơtau bol khai dê lam lòt tòm dô mpồl gơs oă cau lòt jat.

¹² Bơh làng bol hala lơgar lơi ò duh broă mê gen rơp roh rui; jơh ală làng bol mơ lơgar hơ̆ rơp gơkòl lòi srau gòi.

¹³ Bơta gơklŏ Liban dê rơp tus hơ mê, chi nho, chi pơnggŏ, bal mơ tòm cha rơp bơka hàng mơnĕ tiah sàng goh Añ jê; mơ Añ rơp lơh gơklŏ tiah kơrnòl ơn jơng Añ jê.

¹⁴ Ală kòn sau ală cau rồn bơklơn mê rơp tus kun tơnliah di đap mê; jơh ală cau sền òsơp di mê rơp cùn khoai di jơng mê, mơ mê rơp geh sơnđan la Ƀòn Dờng Yàng Jehôwa dê, la Siôn gơrê mơ Bơtau Sàng Goh Israel dê.

¹⁵ Bulah mê neh kong sang lòi mơ gơjrañ kơuềng, ò gơs cau lơi lòt gan di mê; Añ rơp lơh mê in geh ryŭ ryơm gam sùm sùm, mơ dô bơta hòn chò bơh rài do tus rài ne in.

¹⁶ Mê rơp hùc dà toh ală lơgar dê, mê rơp pô toh ală cau bơtau dê. Gen mê rơp git Añ, Yàng Jehôwa la Bơtau Dong klàs mê, Bơtau Dong Tơwài mê, mơ la Bơtau Gơnap Gơnoar Dờng Jakôp dê.

¹⁷ Añ rơp ai màh mê in ala kòng, ai priă ala lòs, Añ rơp cèng mê in kòng ala chi, lòs ala lŭ. Añ rơp ai bơta lơngap lơngai be cau sền gàr mê dê, mơ bơta song ring be cau at bồ ală cau lơh broă mê dê.

¹⁸ Bơta jàñ bơsak rơp ò gam kơno tai tòm lơgar mê dê, mơ bơta phà tơrlah hala bơta tơnroh kung rơp ò tai gơlik tus tòm nhàr lơgar mê dê, mơya mê rơp sơnđan ală dơrñang mê dê la “Bơta Dong Klàs” mơ ală mpồng dờng mê dê la “Bơta Jòng Ro.”

¹⁹ Mattơngai rơp ò gam la bơta àng mê dê tòm trồ ngai, mơ bơta àng gơcrà mat kơnhai dê kung ò gam sòl pơnđàng tòm trồ mang mê dê; Mơya bơh Yàng Jehôwa rơp la bơta àng gam sùm sùm mê dê, mơ Yàng Tom Trồ mê dê rơp la bơta gơklŏ mê dê.

²⁰ Mattơngai mê dê rơp ò ñơp tai; mơ mat kơnhai mê dê rơp ò siar tai; Yàng Jehôwa rơp la bơta àng gam sùm sùm mê dê, mơ ală ngai moat jrùng ñìm rac mê dê rơp lồi.

²¹ Gen jơh làng bol mê dê rơp geh song ring, mơ bol khai rơp dòp geh lơgar gam sùm sùm. Bol khai la sơmbut Añ neh tam, la broă tê Añ neh lơh gơs nàng ràng tơlik bơta gơklŏ Añ jê.

²² Cau dô êt rlau jơh tòm mê rơp gơlik gơs dô jơi bơtiàn, cau dềt rhền rlau jơh rơp gơlik dô nơm làng bol pràn kơldang. Añ la Yàng Jehôwa, di di tŭ tơngai gơ dê, Añ rơp lơh gơlik gơs mhar ală bơta hơ̆!