Esai 6 - Sră Goh 2018

Bơta gơtơnggŏ Esai dê khai geh pồ bơtào gơs cau gơnoar hwơr

¹ Tòm nam bơtau Ôsia sang rài, añ gŏ Yàng Jehôwa nggui hơđang dô nơm sơbàn jơnhoa ngan, tiang ào jrùh Kơnràñ dê bềng hìu duh khoai.

² Ală seraphim ơm ntào gùt dar Kơnràñ, kòp nơm gơs prau nơm pơnđar: bàr nơm jơm mat, bàr nơm jơm jơng mơ bàr nơm ngui nàng par.

³ Ală seraphim đơs tòmho bal lah: “Sàng goh, sàng goh, sàng goh la Yàng Jehôwa Gơnap Gơnoar Dờng; Làm jơh plai ù bềng lìu bơta gơklŏ Kơnràñ dê.”

⁴ Ală jrong di mpồng mut gơlơnggơr bơh sap đơs bol khai dê, mơ hìu duh khoai gơs bềng ñhŭ.

⁵ Tŭ hơ̆ añ đơs: “Bòl glar añ in! Dut rài añ rau! Bơh añ la cau gơs sơndồi ƀơ̆ ƀơl, mơ añ kis digùl dô nơm làng bol gơs sơndồi ƀơ̆ ƀơl, mơ bơh mat añ neh gŏ Bơtau la Yàng Jehôwa Gơnap Gơnoar Dờng.”

⁶ Gen dô nơm seraphim par tus hơ añ, tòm tê gơs rnga ồs hơng neh tă mơ cơkap bơh cơnòng ơn phan duh khoai.

⁷ Seraphim tup rnga ồs hơ̆ di bơr añ, mơ đơs lah: “Tŭ do, ồs do neh tup di sơndồi mê, bơta tìs glài mê dê neh geh tă sang rau mơ tồi glài mê dê neh jùt goh rau.”

⁸ Gen añ kơno sap Yàng Jehôwa đơs lah: “Añ rơp sồr ñcau taih? Mơ ñcau rơp lòt bol he in taih?” Añ đơs lah: “Gơs añ do, dan sồr añ lòt!”

⁹ Kơnràñ đơs lah: “Lòt tĕ mơ đơs mơ làng bol do lah: ‘Iat tĕ! Mơya ò tŭ lơi dòp git; Sền tĕ! Mơya ò tŭ lơi git wă.’

¹⁰ Lơh tĕ nùs làng bol do kră kơldang, lơh tồr bol khai tĭ, mơ lơh mat bol khai gơ tơñềm. Nàng mat bol khai ò rgơi sền mơ tồr bol khai ò rgơi kơno, mơ nùs bol khai dê rgơi git wă, bol khai rê wơl mơ geh sơmbòi.”

¹¹ Gen añ đơs lah: “Khoai Yàng Jehôwa, jơl tus di tŭ lơi taih?” Mơ Kơnràñ ho lah: “Jơl tus di tŭ ală ƀòn dờng sang srau gòi, ò gơs cau ơm, mơ ală hìu ò gơs cau ơm, mơ ù tiah gơlik ngềt ngơt;

¹² jơl tus di tŭ Yàng Jehôwa cèng pơrdô ngài jơh tơl nă cau, mơ oă tiah ò gơs cau ơm tòm lơgar.

¹³ Bulah dô pơnah jơt gam ơm tòm lơgar, gơ rơp kong chu tai. Be tòm nho hala tòm cha, tơnggu gơ gam ơm ntào, tòm tŭ cau kơl gơ. Gar sơntìl sàng goh la tơnggu gơ dê.”