Esai 59 - Sră Goh 2018

Tồi glài, bơta yal glài mơ bơta dong tơwài

¹ Ne, tê Yàng Jehôwa dê ò liah ir nàng ò dong tă, hala tồr Kơnràñ dê kung ò tĭ nàng ò kơno.

² Mơya ală bơta tồi glài iơh bơsak bol mê dê neh cah digùl bol mê mơ Yàng Tom Trồ bol mê dê; mơ tồi glài bol mê dê neh cang kìng mat Kơnràñ bơh di bol mê, tian gơs Kơnràñ ò iat.

³ Bơh tê bol mê dê neh ƀơ̆ ƀơl bơh mhàm, ràs tê bol mê dê neh ƀơ̆ ƀơl bơh tìs glài. Sơndồi bol mê neh đơs blac, mơ lơmpiat bol mê đơs òm bơta iơh.

⁴ Ò gơs cau lơi cèng song ring di pal; ò gơs cau lơi lòt tòm bơta duh rngòt dê bơta boh lam. Bol khai kơnòm di bơta tò să ò kwơ, bol khai đơs blac; Bol khai bun bơta iơh bơsak mơ deh tồi glài dờng.

⁵ Bol khai krơm ală tap bơs mơ tàñ che blung. Cau lơi sa tap hơ̆ gen rơp chơt, mơ tòm tŭ dô nơm tap gơ ceh gen gơs dô nơm bơs tur.

⁶ Che blung bol khai dê ò rgơi tàñ gơs ồi ào, bol khai ò rgơi tơnsoh să tòm bol khai in mơ phan bol khai neh lơh gơs. Ală broă lơh bol khai dê la ală broă iơh rmơh, mơ lơh bơta rhung rhang tòm tê bol khai dê.

⁷ Jơng bol khai ntoat mhar tus hơ bơta iơh bơsak, bol khai sơrbac sơrbang lơh gơhòr mhàm ò gơs glài; Ală bơta kơlôi sơnơng bol khai dê la ală bơta kơlôi sơnơng bơh bơta iơh bơsak, bơta tơnroh mơ bơta phà tơrlah ơm tòm gùng dà bol khai dê.

⁸ Bol khai ò git gùng lơngap lơngai, ò gơs bơta song ring tòm ală gùng lòt bol khai dê. Bol khai neh lơh ală gùng bol khai dê gơlik gơs ală gùng rkwet rkwe; Ò gơs cau lơi lòt tòm ală gùng hơ̆ rơp git bơta lơngap lơngai.

⁹ Behơ̆, bơta cahrña song neh ơm ngài mơ bol he, mơ bơta song ring ò tus mơ bol he. Bol he kơp gơn bơta àng mơya jơh ală bơta la klam jơngo; jòi jat bơta àng lơr mơya bol he lòt tòm bơta klam cik.

¹⁰ Bol he tơbư rò gah dơrñang kung be cau jơngo mat; jòi gùng bol he dê kung be ală cau ò gơs gar mat. Di trồ gùl ngai bol he gơtup jơng kung be tòm trồ mòr mang; digùl cau pràn kơldang mơ bol he kung be cau neh chơt.

¹¹ Bol he jơh tơl nă ơnung kung be ală jơgơu, mơ ñìm rac pơt wòl kung be ală sềm ntòp. Bol he jòi jat bơta song ring, mơya jòi ò bàn, jòi jat bơta dong klàs mơya gơ ơm ngài ngan.

¹² Bơh ală bơta tìs glài bol hi dê la oă ngan di đap mat Kơnràñ, mơ ală tồi glài bol hi dê lơh cơng tòmdră mơ bol hi. Ală bơta tìs glài bol hi dê gơ ơm sùm sùm mơ bol hi, mơ bol hi git ală bơta tồi glài iơh bơsak bol hi dê:

¹³ Bol hi neh tòmdră mơ pơndang sang Yàng Jehôwa, pơrlac ngài bơh di Yàng Tom Trồ bol hi dê, bol hi chồl bơta rồn bơklơn mơ tòmdră, bol hi đơs ală jơnau blac mơ bol hi neh đung tòm nùs.

¹⁴ Behơ̆ bơta cahrña song neh ruc wơl, mơ bơta song ring ơm ntào ngài; jơnau song neh gơtup pừ tòm ală hìu dờng mpồl jơnum dê, bơta song ngan ò rgơi mut.

¹⁵ Siơ̆u Jơnau song, mơ cau lơi pleh ngài di bơta iơh gen kong phà kup. Yàng Jehôwa sền gŏ, mơ ò niam nùs tài bơh ò gơs bơta song ring.

¹⁶ Kơnràñ neh gŏ ò gơs dô nă cau lơi, Kơnràñ ai lơh crih crài tài bơh ò gơs cau lơi hòi dan ala; gen tơwòr tê tòm Kơnràñ dê neh cèng tus bơta pha lin rlau, mơ bơta song ring Kơnràñ dê yò đo Kơnràñ.

¹⁷ Kơnràñ soh bơta song ring lơh gơs kung be ào lòs, mơ dô nơm sơgơn lòs bơta dong klàs hơđang bồ Kơnràñ; Kơnràñ soh ồi ào bơta sal tê, mơ pùt să Kơnràñ mơ bơta gơjrañ dờng kung be dô nơm ào jrùh.

¹⁸ Kơnràñ rơp tơm wơl jat be broă bol khai neh lơh: bơta gơjrañ dờng hơđang ală cau sò tơm di Kơnràñ, mơ bơta sal tê di ală cau tòmdră mơ Kơnràñ; Kơnràñ rơp tơm wơl ală bồt pơlào in.

¹⁹ Behơ̆ ală cau đah mattơngai mut rơp rngòt di sơnđan Yàng Jehôwa, mơ ală cau bơh đah mattơngai lik rơp ki ngàm di bơta gơklŏ Kơnràñ dê. Bơh Kơnràñ rơp tus kung be dà tih, mơ càl Yàng Jehôwa cèng pơrdô khai.

²⁰ “Mơ Kơnràñ rơp tus bơh Siôn be Bơtau Dong Tơwài, tus hơ ală cau gơrê bal mơ Jakôp, la cau git gơjrañ sang ală tồi glài bol khai dê,” Yàng Jehôwa đơs behơ̆.

²¹ Yàng Jehôwa đơs lah: “Đah mơ Añ, do la bơta ho bal Añ neh bơt bơtào mơ bol khai. Hwềng Añ la Bơtau ơm hơđang bol mê, mơ ală jơnau Añ neh ơn tòm bơr bol mê rơp ò lik bơh di bơr bol mê, hala bơh di bơr kòn sau bol mê, hala bơh di bơr kòn sau bol khai dê bơh tŭ do jơl tus sùm sùm,” Yàng Jehôwa đơs behơ̆.