Biblia Todo Logo
Bìoball air-loidhne

- Sanasan -

Esai 58 - Sră Goh 2018


Bơta ơt sa ngan

1 “Driau dờng tĕ, bañ dơh wơl. Yò tơngguh tĕ sap mê dê be dô nơm kơlwòk. Yal tơnggit tĕ làng bol Añ in bơh bơta tòmdră bol khai dê, mơ hìu Jakôp in bơh ală bơta tồi glài bol khai dê.

2 Bơh kòp ngai bol khai jòi Añ; bol khai chò hòp kòñ git ală gùng dà Añ jê; gơlơh be dô nơm làng bol lơh jat bơta song ring mơ ò sang lòi ală bơta lơh nền Yàng Tom Trồ bol khai dê. Bol khai lùp Añ bơh ală bơta cahrña song ring, mơ bol khai chò hòp tus rềp hơ Yàng Tom Trồ.

3 Bol khai đơs lah: ‘Ñchi bơh tài bol hi ơt sa mơ Yàng ò sền gŏ taih? Ñchi bơh tài bol hi pơndêt să bol hi dê mơ Yàng ò cih kah taih?’ Sền ne, bol mê duh broă ală bơta nùs bol mê hàm kòñ tòm ngai bol mê ơt sa, mơ rồn bơklơn jơh ală cau lơh broă bol mê dê.

4 Sền ne, bơta ơt sa bol mê dê mìng cèng tus bơta tòmlah tòm pơndang bal mơ bơta tòmlơh; mơ sơmbat tê iơh bơsak. Bol mê ơt sa kung be bol mê lơh tòm ngai do rơp ò lơh sap đơs bol mê dê geh kơno tòm tiah jơnhoa.

5 Hơ̆ ò di la bơta ơt sa mơ Añ neh sac rwah, la dô ngai nàng dô nă cau pơndêt să ò ơ? Hơ̆ ò di la dô ngai dô nă cau in kun bồ kung be dô nơm gai proh, bic hơđang ƀào sơnò kiat mơ hơđang bùh ò ơ?

6 Hơ̆ la bơta mơ bol mê sơnđan la bơta ơt sa, la dô ngai geh Yàng Jehôwa niam nùs dòp rò, sơl ơ? Hơ̆ ò di la bơta ơt sa mơ Añ neh sac rwah: Nàng hồ ală che sreng ò song ring, hồ ală che kơt di yô, nàng lòi ală cau kong rồn bơklơn lòt khat gơboh, mơ dơrpă kòp nơm yô ò ơ?

7 Hơ̆ ò di la tòmpà phan sa bol mê dê cau jơgloh in, mơ cèng cau rƀah ò gơs hìu ơm mut tòm hìu bol mê dê, tòm tŭ bol mê gŏ cau ơm kuh lòi rồ gen tơnsoh khai in, mơ ò pồn mat bơh di ală cau gơp bơtiàn bol mê dê ò ơ?

8 Gen bơta àng bol mê dê rơp pơnđàng sòl kung be rìng àng drim, mơ ală tềl sồt bol mê dê rơp geh sơmbòi mhar; gen cau dong tò bol mê dê rơp lòt di đap bol mê, mơ bơta gơklŏ Yàng Jehôwa dê rơp ê gàr đah ngkòi bol mê.

9 Gen bol mê rơp hòi, mơ Yàng Jehôwa rơp ho wơl; bol mê rơp rac dan dong kòl, mơ Kơnràñ rơp đơs lah: ‘Gơs Añ do!’ Dilah bol mê tă sang yô bơh digùl bol mê, ò cong tê đơs blac pơrlồm;

10 dilah bol mê ai phan sa bol mê dê cau jơgloh in, mơ lơh hừh nùs ală bơta pal càng cau dồn sa in, gen bơta àng bol mê dê rơp pơnđàng sòl tòm tiah klam jơngo, mơ bơta jơngo bol dê rơp gơlik gơs kung be trồ gùl ngai.

11 Yàng Jehôwa rơp kư̆ tề lam bol mê sùm sùm; Kơnràñ lơh bol mê in hừh nùs ală bơta pal càng tòm dô nơm lơgar rañ rsơh, mơ lơh ntìng bol mê in pràn kơldang. Bol mê rơp gơlik gơs kung be dô nơm suơn geh tuh dà, be dô nơm dà croh ò gơs tŭ lơi soat.

12 Bol mê rơp bơt wơl ală tiah tơrlah tơrlơm lài òr; mê rơp bơtào wơl ală mơnàng bơh ală rài yau dê; bol mê rơp geh sơnđan la cau rcang wơl ală tiah neh tơrlah tơrlơm, mơ la Cau Bơt Wơl ală gùng lòt tiah cau in ơm.

13 Dilah bol mê prap gàr jơng bol mê dê nàng ò lơh tìs ngai Saƀat, bơh ting jat nùs bol mê kòñ tòm ngai sàng goh Añ jê; dilah bol mê sơnđan ngai Saƀat la ngai bol mê niam nùs, mơ ngai sàng goh Yàng Jehôwa dê la pal ki ngàm; mơ dilah mê ki ngàm di ngai hơ̆ mơ ò lòt tòm gùng is bol mê dê, mơ ò lơh jat nùs bol mê kòñ, hala đơs ală jơnau ò kwơ;

14 gen bol mê rơp geh bơta hòn chò tòm Yàng Jehôwa, Añ rơp yò bol mê hào hơđang ală tiah jơnhoa tòm ù tiah dê, Añ rơp ròng siam bol mê mơ sre brê ồng pàng bol mê dê la Jakôp.” Bơh bơr Yàng Jehôwa dê neh đơs behơ̆.

© 2018 United Bible Societies. All rights reserved.

Bible Society Vietnam
Lean sinn:



Sanasan