Esai 54 - Sră Goh 2018

Bơta ho bal ring lơngai gam sùm sùm dê

¹ “Đơs chò tĕ ơ cau ơm kơnền la cau ò tŭ lơi deh dô nă kòn; ai sap đơs chò driau dờng tĕ! Ơ ală cau ò tŭ lơi kong jê deh; tài bơh cau ùr gơkòl sang lòi rơp gơs oă kòn rlau mơ cau ùr gơs bau klau.” Yàng Jehôwa đơs behơ̆.

² “Pò tĕ dờng tiah sàl ai dê, lì tĕ ơnàng bài kơrnìng tiah ơm ai dê, bañ hwài tơnruc wơl; dang tĕ jòng ală che kơt, mơ pơng kơ̆ gai jơrmơng ai dê.

³ Bơh ai rơp pò ơnàng làm đah ma mơ đah kiau; jơi bơtiàn ai rơp dòp geh lơgar lơh gơs tiah tòm, mơ rơp ơm tòm ală ƀòn dờng sang lòi ngềt ngơt.

⁴ Bañ rngòt, bơh ai rơp ò kòl ƀàssìl. Bañ ruc wơl bơh ai rơp ò gơkòl sền òsơp; Ai rơp hŭi bơta ƀàssìl tŭ ai gam ơruh, mơ ò tai kah bơta sền òsơp tòm tŭ ai ơm bơnrau.

⁵ Bơh Bơtau Crơng Gơs ai la bau klau ai dê, Sơnđan Kơnràñ la Yàng Jehôwa Gơnap Gơnoar Dờng Bơtau Sàng Goh Israel dê la Bơtau dong tơwài ai, Kơnràñ geh sơnđan la Yàng Tom Trồ jơh plai ù dê.

⁶ Bơh Yàng Jehôwa neh hòi ai, be bau ùr neh kong sang lòi mơ jê sồt moat jrùng tòm hwềng nùs, be dô nă bau ùr neh tòmbau tòm tŭ gam ơruh mơ neh kong sang lòi.” Yàng Tom Trồ ai dê đơs behơ̆.

⁷ “Tòm dô ơthoa Añ neh sang lòi ai; mơya Añ rơp ai nùs kòñ nđàc dờng ơnàng mơ cèng brê ai wơl.

⁸ Tòm bơta gơhào gơjrañ, Añ neh pồn mat mơ ai tòm dô êt jŏ, mơya bơh nùs kòñ gơboh gam sùm sùm, Añ rơp kòñ nđàc di ai,” Bơtau Dong tơwài ai la Yàng Jehôwa đơs behơ̆.

⁹ “Gơwèt mơ Añ, bơta hơ̆ kung be ală ngai tòm rài Nôe, tòm tŭ Añ srat să ho nền lah dà kŏ tòm rài Nôe rơp ò tŭ lơi ngŏ hơđang ù tai. Behơ̆ tŭ do Añ srat să ho nền lah Añ rơp ò gơjrañ di ai tai, mơ rơp ò tŭ lơi lah pơrhơng ai tai.

¹⁰ Bulah ală mơnơm gơ dô mơ ală dòr kòl ntròn bơh di tiah gơ dê, mơya bơta kòñ gơboh kơ̆ dơn Añ jê rơp ò cah ngài bơh ai, mơ bơta ho bal lơngap lơngai Añ jê rơp ò tŭ lơi tòmgơl,” Yàng Jehôwa đơs behơ̆ la Bơtau neh kòñ nđàc ai.

¹¹ “Ơ ală cau jê sồt bòl glar, kong càl rbut dờng khồm tơlo mơ ò geh pơndòm pơniang, Añ rơp bơt bơtào ai mơ lŭ kĕ tơlir, bơt ală mơnàng ai dê mơ lŭ màng tơlir trồ.

¹² Añ rơp bơt ală dơrñang ƀòn gơs tiah kơp gàr ai dê mơ lŭ kĕ pơrhê, bơt ală mpồng ƀòn ai dê mơ ală lŭ kràng màng gơcrà, mơ jơh ală dơrñang ai dê mơ ală lŭ màng.

¹³ Jơh ală kòn klau ai dê rơp geh Yàng Jehôwa bơto sồr, mơ bơta lơngap lơngai pas gơs kòn sau ai dê rơp dờng ngan.

¹⁴ Ai rơp geh bơt bơtào kơ̆ tòm bơta song ring, bơta rồn bơklơn rơp ơm ngài bơh ai, ai rơp ò gơs bơta rngòt. Bơta rngòt rngơt rơp ò tus rềp di ai.

¹⁵ Dilah gơs cau guh brồ lơh ai, bơta hơ̆ rơp ò di tus bơh Añ; cau lơi brồ lơh ai rơp kong alah di đap ai.

¹⁶ Sền ne, Añ neh crơng gơs cau chài tiar, la cau ơsuh ồs rnga hơng nàng tiar dô nơm phan tòmlơh ngui tòm bơta gơs kwơ. Mơ Añ neh crơng gơs cau phà tơnroh nàng tơnroh.

¹⁷ Ò gơs phan tòmlơh lơi neh tiar rgơi tòmdră pha rlau mơ ai, mơ ai rơp pơndang sang kòp nơm lơmpiat yă ai tòm tiah cahrña. Hơ̆ la pơnah sre brê ală cau duh broă Yàng Jehôwa dê, mơ bơta tò să bol khai dê tus bơh di Añ.” Yàng Jehôwa đơs behơ̆.