Esai 53 - Sră Goh 2018

Bơta jê sồt mơ gơklŏ Bơtau Mesia dê

¹ Ñcau neh dòn ală jơnau bol he kơno? Mơ tơwòr tê Yàng Jehôwa dê neh geh ràng tơlik ñcau in taih?

² Bơh Khai neh brồ dờng di đap Yàng Jehôwa kung be dô nơm sơmbut, mơ kung be dô nơm ryas gơcat bơh di ù rañ rsơh. Kơnràñ ò gơs rùp să hàng mơnĕ hala ryŭ ryơm tồ bol he sền di Kơnràñ, ò gơs bơta lơi tòm rùp să Kơnràñ lơh bol he in gơboh gơbài di Kơnràñ.

³ Kơnràñ neh kong cau sền òsơp mơ sang lòi, git làm bơta moat jrùng, mòng mơ bơta jê sồt; be dô nă cau neh kong sền òsơp kung be cau mơ kòn mơnus pồn mat ò bài sền; bol he kung sền òsơp di Kơnràñ sơl.

⁴ Ngan Kơnràñ neh àñ bơta kòp jê bol he dê, neh ơnòng bơta moat jrùng bol he dê bulah behơ̆ bol he neh kơlôi lah Kơnràñ neh kong Yàng Tom Trồ pù lơh, mơ lơh pơnjê pơngkồr.

⁵ Mơya Kơnràñ neh bơh tồi glài bol he dê mơ kong tềl sồt, bơh bơta iơh bơsak bol he dê mơ kong tơnlề; bơh bơta lơh glài Kơnràñ kong mơ bol he geh lơngap lơngai, bơh tềl sồt Kơnràñ dê mơ bol he geh sơmbòi.

⁶ Bol he jơh tơl nă kung be belàt lòt tìs nrah, kòp nă neh lòt jat gùng is he dê; mơ Yàng Jehôwa neh ơn tồi glài jơh tơl nă bol he dê hơđang Kơnràñ.

⁷ Kơnràñ neh kong rồn bơklơn mơ neh kong pơnjê pơngkồr, bulah behơ̆ Kơnràñ neh ò pò bơr Kơnràñ dê; Kơnràñ neh kong tề kung be dô nơm belàt kòn tus hơ tiah lơh poac, kung be dô nơm belàt ơm mŏ mŏ di đap cau siat sơnò gơ, Kơnràñ neh ò pò bơr Kơnràñ dê.

⁸ Bơh bơta cahrña rkwet rkwe mơ Kơnràñ neh kong tă tơlik; ñcau rgơi kơlôi lài bơh ñchi bơta rơp gơlik tus Kơnràñ in taih? Bơh Kơnràñ neh kong tă tơlik bơh di ù tiah cau kis, neh kong jê sồt bơh tồi glài làng bol Añ jê.

⁹ Bol khai neh lơh bơtô ƀồc Kơnràñ dê bal mơ cau iơh bơsak, mơ bơta chơt Kơnràñ dê bal mơ cau pas sơm, bulah Kơnràñ neh ò lơh bơta jàñ bơsak, tòm bơr Kơnràñ dê ò gơs bơta lơi blac pơrlồm.

¹⁰ Bulah behơ̆, hơ̆ la nùs kòñ Yàng Jehôwa dê mơ Kơnràñ kong pơnjê pơngkồr mơ kong jê sồt, mơ bulah Yàng Jehôwa neh lơh bơta kis Kơnràñ dê gơs phan ơn tơwài tồi glài, Kơnràñ rơp gŏ jơi bơtiàn Kơnràñ mơ rơp geh bơtơl jŏ jòng ală ngai Kơnràñ dê, mơ nùs kòñ Yàng Jehôwa dê rơp geh cồng nha niam tòm tê Kơnràñ.

¹¹ Tơnơ̆ mơ tŭ hwềng soàn Kơnràñ neh kong jê sồt, Kơnràñ rơp gŏ bơta àng mơ bơta hừh nùs, gan di bơta git wă Kơnràñ dê. Cau duh broă song ring Añ jê rơp lơh oă bơta song ring, mơ Kơnràñ rơp àñ ơnòng ală bơta tồi glài bol khai dê.

¹² Gen tàng Añ rơp ai Kơnràñ in dô pơnah bal mơ ală cau dờng ryŭ, Kơnràñ rơp tòmpà ală phan tòmpìt geh bal mơ ală cau pràn kơldang, tài bơh Kơnràñ neh tuh bơta kis Kơnràñ dê jơl chơt, mơ neh kong kòp bal mơ cau tìs glài. Bơh Kơnràñ neh àñ tồi glài oă cau in, mơ hòi dan ala ală cau tìs glài in.