Esai 51 - Sră Goh 2018

Bơta lơngai gam sùm sùm làng bol Yàng Tom Trồ in

¹ “Iat tĕ Añ! Ơ bol mê la ală cau ting jat bơta song ring, mơ bol mê jòi Yàng Jehôwa! Sền tĕ di pơnai lŭ klềr mơ bơh tềng hơ̆ bol mê neh geh phàt tơlik, mơ bơh tòm trồm lŭ bol mê neh geh tò.

² Sền tĕ di Abraham ồng pàng bol mê dê, mơ Sara la cau neh tơnggơs bol mê. Tòm tŭ Añ neh hòi khai gen khai gơs mìng dô nă lơm, Añ neh ai lơngai khai in mơ lơh khai in gơlik gơs oă.

³ Bơh Yàng Jehôwa rơp pơndòm pơniang Siôn; Kơnràñ rơp pơndòm pơniang jơh ală tiah rhàng srau gơ dê. Kơnràñ rơp lơh ƀlàng ngềt ngơt gơ dê gơlik be suơn Eden, ƀlàng bràs gơ dê gơlik gơs be suơn Yàng Jehôwa dê, bơta hòn chò mơ bơta chò hòp rơp geh jòi bàn tòm gơ, bal mơ bơta ưnngài mơ sap bơta đơs chò.

⁴ Iat tĕ Añ, ơ làng bol Añ jê; mơ ơn nùs kơlôi di Añ, ơ lơgar Añ jê; bơta bơto sồr rơp lik bơh di Añ; bơta song ring Añ jê la dô nơm bơta àng ală làng bol in.

⁵ Añ rơp cèng bơta dong tă Añ jê tus rềp mhar ngan; bơta dong klàs Añ jê neh lik lòt rau; mơ tơwòr tê Añ jê rơp at bồ hơđang ală làng bol; ală bồt pơlào kơp gơn Añ mơ bol khai gơn kơnòm di tơwòr tê Añ jê.

⁶ Pò tĕ mat bol mê dê tơnggòr ală tap trồ, sền tĕ di plai ù hơđơm; ală tap trồ rơp roh thit be ñhŭ, plai ù rơp klar lơho be ồi ào, mơ ală làng bol ơm hơđang plai ù rơp chơt be smềt. Mơya bơta dong klàs Añ jê rơp gam sùm sùm, bơta dong tă Añ jê rơp ò tŭ lơi lồi.

⁷ Iat tĕ Añ! Ơ bol mê la ală cau git bơta song ring, la làng bol gơs bơta bơto sồr Añ jê tòm nùs bol mê dê; Bañ rngòt di bơta lah pơrhơng kòn mơnus dê, hala rngòt rơm să di jơnau lah sơrpah bol khai dê.

⁸ Bơh mŏ rơp sa roh bol khai kung be sa ồi ào; kih rhài rơp sa bol khai kung be sa sơnò belàt. Mơya bơta dong tă Añ jê rơp gam sùm sùm, bơta dong klàs Añ jê gam sùm jơl jơh ală rài.”

⁹ Kah rngal tĕ, kah rngal tĕ! Soh tĕ bơta pràn kơldang! Ơ tơwòr tê Yàng Jehôwa dê! Kah rngal tĕ kung be tòm ală ngai neh yau, be tòm ală rài neh jŏ jòng rau! Hơ̆ ò di Kơnràñ la Bơtau neh koh Rahap rpot rpet, neh srơp bluh nagrài hơ̆ ò ơ?

¹⁰ Hơ̆ ò di Kơnràñ la Bơtau neh lơh soat dàlềng, lơh soat dà tòm tiah jrô ngan, la Bơtau neh lơh dô nơm gùng lòt tòm ală tiah jrô dàlềng dê, tồ cau geh dong tơwài rgơi tiă gan ò ơ?

¹¹ Behơ̆ làng bol Yàng Jehôwa neh tơwài rơp rê wơl mơ lòt tus hơ Siôn bal mơ bơta đơs chò; bơta hòn chò gam sùm sùm rơp geh tơndau hơđang bồ bol khai. Bol khai rơp dòp geh bơta hòn chò mơ chò hòp, bơta moat jrùng mơ bơta pơt wòl rơp dô ngài.

¹² “Añ, să tòm Añ, la Bơtau pơndòm pơniang bol mê. Bol mê la ñcau mơ rngòt di kòn mơnus òs chơt, dô nă kòn mơnus la cau gơs bơta kis kung be ñhơt taih?

¹³ Bơh bol mê neh hŭi Yàng Jehôwa la Bơtau Crơng Gơs bol mê, la Bơtau neh lì ală tap trồ mơ lă mơnàng plai ù, bol mê kis tòm bơta rngòt rngơt sùm kòp ngai tài bơh bơta gơjrañ cau rồn bơklơn dê, la cau neh lơh nền tơnroh bol mê? Bơh ntềng đah bơta gơjrañ dờng cau rồn bơklơn dê taih?

¹⁴ Ală cau kong rồn bơklơn rơp mhar geh hồ toh; bol khai rơp ò chơt mơ mù tòm bơtô, bol khai kung rơp ò siơ̆u phan sa sơl.

¹⁵ Bơh Añ la Jehôwa Yàng Tom Trồ bol mê dê, la Bơtau lơnggac dàlềng lơh ryà dà gơ dê nggồr ur ur, Yàng Jehôwa Gơnap Gơnoar Dờng la sơnđan Kơnràñ dê.

¹⁶ Añ neh ơn ală jơnau đơs Añ jê tòm bơr bol mê, mơ neh pồn bol mê tòm mƀur mpàng tê Añ jê. Añ neh lì ală tap trồ, mơ neh lă ală mơnàng plai ù dê, mơ đơs mơ Siôn lah: ‘Bol mê la làng bol Añ jê.’”

Mơngàn bơta gơjrañ dờng Yàng Jehôwa dê

¹⁷ Ơ Jerusalem, Guh tĕ, guh mơ ntào tĕ! Bol mê neh hùc bơh di tê Yàng Jehôwa mơngàn bơta gơjrañ dờng Kơnràñ dê, bol mê neh hùc tus di soat mơngàn lơh cau in gơsèng.

¹⁸ Ò gơs dô nă cau lơi nàng lam khai digùl jơh ală kòn khai neh deh; ò gơs dô nă cau lơi tề khai di tê, digùl jơh ală kòn khai neh ròng siam

¹⁹ Bàr bơta rung rài do gơdùh hơđang bol mê, ñcau rgơi nđàc sơngit di bol mê taih? bơta tơrlah tơrlơm mơ bơta tơnroh, bơta jơgloh rung mơ pềs tà, ñcau rgơi pơndòm pơniang bol mê taih?

²⁰ Ală kòn bol mê dê òsô mơ bol khai gơpừ chơt yơh di bồ ală gùng me, be be brê gơkòl yar tòm bơtơng. Bol khai bềng bơta gơjrañ dờng Yàng Jehôwa dê mơ bơta lah pơrhơng Yàng Tom Trồ bol mê dê.

²¹ Behơ̆ tàng iat tĕ jơnau do, ơ bol mê la cau kong jê sồt, la cau bơñul mơya ò di bơh tơrnòm.

²² Yàng Jehôwa At Bồ Hơđang Jơh bol mê dê, la Yàng Tom Trồ bol mê dê mơ la Bơtau dong tò làng bol Kơnràñ dê đơs be do: “Sền do, Añ neh tă bơh di tê bol mê mơngàn lơh cau in lòt gơsèng; bol mê rơp ò hùc mơngàn bơta gơjrañ dờng Añ jê tai.

²³ Añ rơp ơn mơngàn hơ̆ tòm tê ală cau lơh bòl glar jê sồt di bol mê, hơ̆ la ală cau đơs mơ bol mê lah: ‘Bic tĕ hơđơm nàng bol hi lòt hơđang bol mê.’ Mơ bol mê neh lơh ngkòi bol mê dê gơlik gơs be ù, mơ kung be gùng bol khai in lòt hơđang.”