Esai 50 - Sră Goh 2018

Tồi glài Israel dê mơ bơta dòn bơr cau duh broă dê

¹ Yàng Jehôwa đơs be do: “Ntềng đah sră cơng tàng lòi bau mơ Añ neh lơh nàng sang lòi mè mê dê taih? Hala sră mơ Añ neh tac bol mê mơ cau tòm dồs taih? Tài bơh tồi glài bol mê dê tàng bol mê gơkòl tac; tài bơh bơta tìs glài mè bol mê dê tàng kong sang lòi.

² Ñchi bơh tài tòm tŭ Añ tus, ò gơs dô nă cau lơi taih? Ñchi bơh tài tòm tŭ Añ hòi, ò gơs dô nă cau lơi ho wơl taih? Tơwòr tê Añ la liah ngan tian gơs ò rgơi tơwài bol mê sơl ơ? Añ ò tơl pràn nàng dong tă bol mê sơl ơ? Mìng bơh dô jơnau lah pơrhơng mơ Añ neh lơh soat dàlềng, Añ lơh ală hiòng dà gơlik gơs ƀlàng bràs; ka tòm dà gơ dê chơt ồm bơh siơ̆u dà, mơ chơt tơhìr dà.

³ Añ tơnsoh tap trồ mơ bơta klam jơngo mơ lơh ƀào sơnò kiat gơs phan jơm gòm gơ.

Bơta pơndêt să mơ bơta tò să cau duh broă dê

⁴ Yàng Jehôwa la Yàng Tom Trồ neh ai Añ in dô nơm lơmpiat dô nă cau bơto dê, tồ Añ in git ngui jơnau mbe lơi nàng yò đo cau bòl glar gơplơ̆ nùs. Kơnràñ pơrlai Añ kòp àng drim, Wàs tồr Añ nàng iat kung be dô nă cau geh bơto sồr.

⁵ Yàng Jehôwa la Yàng Tom Trồ neh pò tồr Añ, Añ ò gam tòmdră, Añ neh ò ruc wơl.

⁶ Añ neh ai ngkòi Añ cau in pù lơh, ai tơrmồ Añ cau in dŭi sơnò tềp; Añ ò pồn mat bơh di cau dơñŏ tơnhial mơ choh dà diau hơđang Añ.

⁷ Tài bơh Yàng Jehôwa la Yàng Tom Trồ dong kòl Añ, gen tàng Añ rơp ò kong cau sền òsơp. Gen tàng Añ lơh muh mat Añ kră be lŭ ồs mơ Añ git Añ rơp ò kong bơta ƀàssìl.

⁸ Bơtau đơng kừh Añ ơm rềp mơ Añ. Ñcau rơp jòi jơnau tòmdră mơ Añ taih? Lòi tĕ khai mơ Añ tòm mat bal! Ñcau la cau yă Añ taih? Lòi khai tòm mat mơ Añ!

⁹ Yàng Jehôwa la Yàng Tom Trồ Bơtau dong kòl Añ. Ñcau la cau rơp lơh nền glài Añ taih? Bol khai jơh tơl nă rơp klar yau kung be ồi ào, mŏ tu rơp sa roh bol khai jơh.

¹⁰ Ñcau tòm bol mê la cau duh rngòt di Yàng Jehôwa, mơ dòn bơr lơh jat jơnau cau duh broă Kơnràñ dê taih? Lòi ală cau lòt tòm tiah klam jơngo, la cau mơ ò gơs bơta àng, dòn tĕ di sơnđan Yàng Jehôwa, mơ kơnòm tĕ Yàng Tom Trồ khai dê.

¹¹ Mơya tŭ do, jơh ală bol mê la cau sing ồs mơ rcang lài să tòm he in ală sơmpòl ồs; Ñă tĕ! Lòt tòm bơta àng ồs bol mê dê, mơ tòm bơta àng ală sơmpòl ồs mơ bol mê neh chu. Do la bơta mơ bol mê rơp dòp geh bơh tê Añ: Bol mê rơp bic tòm bơta jê sồt bòl glar.”