Esai 48 - Sră Goh 2018

Yàng Tom Trồ Bơtau Crơng gơs mơ Bơtau dong tơwài

¹ Ơm iat jơnau do, ơ hìu Jakôp, la cau geh hòi jat sơnđan Israel; mơ neh geh lik bơh tòm ryas Juda, la cau ai sơnđan Yàng Jehôwa mơ srat să, mơ hòi lùp Yàng Tom Trồ Israel dê, mơya ò di bơh jơnau song hala bơta song ring.

² Bol mê la cau sơnđan să he la làng bol ƀòn dờng sàng goh, mơ sơnđìng să di Yàng Tom Trồ Israel dê; Yàng Jehôwa Gơnap Gơnoar Dờng làm Jơh la sơnđan Kơnràñ dê:

³ “Añ neh đơs lài jŏ jòng bơh ală bơta neh rlau rau, ală broă hơ̆ neh lik bơh bơr Añ; mơ Añ neh yal bol khai in git; gen nisơna Añ neh lơh gơs, mơ ală bơta hơ̆ neh gơlik tus rau.

⁴ Bơh Añ neh git mê kơldang nùs la kàr lơi; mơ ară ngko mê dê la lòs, bìng liang mê dê la kòng.

⁵ Gen tàng Añ neh đơs ală bơta do bơh jŏ jòng rau; Añ neh yal ală bơta hơ̆ bol mê in lài mơ tŭ òhềt gơlik gơs tồ bol mê ò rgơi đơs lah: ‘Ală rùp ràk añ jê neh lơh gơ; ală rùp pac sềr mơ chi mơ ală rùp tŏ mơ màh mơ priă neh ai gơnoar sồr ală bơta hơ̆.’

⁶ Bol mê neh kơno ală bơta do; rmê sền tĕ di jơh ală bơta hơ̆, mơ bol mê rơp ò yal wơl ơ? Bơh do jơl hìng nau, Añ rơp yal bol mê in ală bơta pa, ală bơta pồn ndơp mơ bol mê òhềt git.

⁷ Ală bơta hơ̆ pa geh crơng gơs, ò di neh gơs bơh yau òr; lài mơ ngai do mê òhềt kơno bơh bơta hơ̆. Behơ̆, bol mê ò rgơi đơs lah: ‘Ơi, añ neh git bơh ală bơta hơ̆ rau.’

⁸ Bol mê òhềt kơno, kung òhềt git wă; bơh yau òr tồr bol mê òhềt gơ pò. Bơh Añ neh git loh ngan bol mê la ma blac; bol mê geh sơnđan la cau jak tòmdră bơh di tŭ pa deh.

⁹ Tài bơh sơnđan is să tòm Añ jê, Añ òbat tuh bơta gơjrañ Añ jê; tài bơh bơta jòng ro Añ jê, Añ tơnruc wơl gơ bơh di mê; Behơ̆ nàng Añ ò tơnroh bol mê.

¹⁰ Do, Añ neh tŏ tiar bol mê, mơya ò di be tŏ tiar priă; Añ neh lòng bol mê tòm bơnhă ồs bơta rung rài bòl glar.

¹¹ Tài bơh să tòm Añ jê, bơh mìng dô nă Añ, Añ lơh bơta do. Mbe rgơi Añ lòi să tòm Añ kong bơta sền òsơp taih? Añ rơp ò lòi bơta gơklŏ Añ jê dô nă cau ndai in.”

Israel geh hồ toh

¹² Ơ Jakôp, ơ Israel la cau Añ neh hòi, iat tĕ Añ: “Añ la Bơtau hơ̆; Añ la Bơtau sơnròp mơ la Bơtau lồi dut.

¹³ Tê tòm Añ neh bơt ală mơnàng plai ù, mơ tê ma Añ neh lì ală tap trồ; tòm tŭ Añ hòi bol gơ tus, jơh ală bol gơ ntào ơn nùs kơlôi.

¹⁴ Pơjum tơrgòm tĕ, jơh tơl nă bol mê, mơ iat tĕ: Ñcau digùl bol khai neh yal lài ală bơta do taih? Cau Yàng Jehôwa kòñ gơboh; Kơnràñ rơp lơh gơlik gơs tơnggume broă Kơnràñ dê hơđang Babilôn; tơwòr tê Kơnràñ rơp tòmdră mơ cau Kalde.

¹⁵ Añ, să tòm Añ neh đơs, ngan Añ neh hòi khai, Añ cèng khai tus, mơ khai rơp geh pas gơs tòm gùng dà khai in.

¹⁶ Tus tĕ rềp mơ Añ mơ iat jơnau do: Bơh sơnròp Añ òhềt đơs tòm bơta ndơp ndơr; bơh di tŭ bơta hơ̆ gơlik gơs, Añ neh gơs tềng hơ̆ rau. Mơ tŭ do, Yàng Jehôwa At Bồ Hơđang Jơh neh sồr Añ, bal mơ Hwềng Kơnràñ dê.”

¹⁷ Yàng Jehôwa, Bơtau Dong Tơwài mê, Bơtau Sàng Goh Israel dê, đơs be do: “Añ la Yàng Jehôwa, Yàng Tom Trồ bol mê, la Bơtau bơto bơta lơi la niam rlau jơh bol mê in, la Bơtau neh tề lam bol mê tòm gùng bol mê pal lòt.

¹⁸ Ơ hơh kơp kòñ bol mê mìng ơn nùs tồr di ală jơnau sồr Añ jê, gen bơta pas gơs bol mê dê rơp kung be dô nơm hiòng dà, bơta cồng nha bol mê dê rơp be ală ryà dàlềng.

¹⁹ Jơi bơtiàn bol mê dê rơp gơlik gơs oă kung be bràs, kòn sau bol mê dê rơp gơlik gơs kung be ală gar bràs; sơnđan bol khai ò tŭ lơi kòl jùt sang, kung ò kong tơnroh bơh di đap Añ.”

²⁰ Lik tĕ bơh di Babilôn! Dô tĕ bơh di cau Kalđe! Ai tĕ jơnau driau chò mơ yal jơnau do, mơ yal tơnggit tĕ tus di ală tiah lồi dut plai ù; Đơs tĕ lah: “Yàng Jehôwa neh tơwài Jakôp, la cau duh broă Kơnràñ dê.”

²¹ Bol khai rơp ò tơhìr dà tòm tŭ Kơnràñ lam bol khai lòt gan ală ƀlàng bràs; Kơnràñ neh lơh dà gơhòr lik bơh di pơnai lŭ klềr; Kơnràñ pòng bơcah pơnai lŭ klềr, gen dà hòr lik.

²² “Ală cau iơh bơsak ò geh bơta lơngap lơngai,” Yàng Jehôwa đơs behơ̆.