Esai 46 - Sră Goh 2018

Ală yàng Babilôn dê

¹ Bel kun tơmù, Nebô gơpừ; ală rùp ràk bol khai dê geh pơdiang hơđang phan poan jơng mơ kơnrồ. Ală rùp duh khoai bol mê tùng tơnàñ kơnjơ̆ hơđang ală phan poan jơng òsô.

² Bol khai gơpừ mơ kun tơmù bal mơ gơp; ò rgơi dong tă bơta ơnòng kơnjơ̆, bơh să tòm bol khai kung gơkòl kup cèng.

³ Ơ hìu Jakôp, iat tĕ Añ, Ơ jơh ală bol mê la cau gam wơl hìu Israel dê, bol mê la ală cau Añ neh tơnggơs bơh tŭ mê pa deh, mơ cèng mê bơh tòm kơndul mè.

⁴ Jơl tus di tŭ bol mê kra bồ kò sŏ, añ la bơtau, Añ la bơtau rơp àñ ơnòng bol mê. Añ neh tơnggơs bol mê mơ Añ rơp kơnđơt kơnđu bol mê; Añ àñ ơnòng bol mê mơ Añ rơp dong tă bol mê.

⁵ Bol mê rơp pơndròm Añ mơ ñcau hala sền Añ ndròm bal mơ ñcau taih? Bol mê pơndròm Añ mơ ñcau nàng bol hi ndròm bal taih?

⁶ Gơs cau tă tơlik màh bơh kơldung khai dê, mơ kơr priă hơđang ală phan kơr; bol khai ơpah cau chài tŏ gơs dô nă yàng, mơ bol khai tơmbic să duh khoai gơ.

⁷ Bol khai yò ơn gơ hơđang pơnì mơ tui gơ, bol khai bơtào gơtòm tiah gơ dê, mơ gơ ntào tềng hơ̆. Bơh tềng hơ̆ gơ ò rgơi ơwañ. Dilah gơs dô nă cau hòi dan mơ gơ gen gơ ò ho wơl, gơ ò rgơi dong dô nă cau lơi klàs bơh ală bơta rung rài.

⁸ Ơ ală cau jak tòmdră, kah tĕ bơta hơ̆, ơn tĕ tòm dơngoh jak, prap tĕ tòm nùs.

⁹ Kah tĕ ală bơta bơh yau òr; Añ la Yàng Tom Trồ, mơ ò gơs yàng lơi ndai tai; Añ la Yàng Tom Trồ, mơ ò gơs cau lơi ndròm bal be Añ.

¹⁰ Añ neh yal tơlik bơta lồi dut bơh tŭ sơnròp, bơh ală tŭ tơngai rài yau, ală bơta òhềt gơlik gơs. Añ đơs lah: “Tơnggume broă Añ jê rơp bơtào kơ̆, mơ Añ rơp lơh gơlik gơs ală bơta niam nùs Añ jê.”

¹¹ Añ hòi sềm sa poac tus bơh đah mattơngai lik, mơ hòi dô nă cau lơh wil tơl tơnggume broă Añ jê tus bơh lơgar ngài. Bơta Añ neh đơs gen Añ rơp lơh gơlik gơs; bơta Añ neh rơndap gen Añ rơp lơh.

¹² Ơ ală cau kơldang nùs, ơm ngài bơh bơta song ring, iat tĕ Añ!

¹³ Añ cèng bơta song ring Añ jê tus rềp, gơ ò ơm ngài; mơ bơta dong klàs Añ jê rơp ò lơh òbat nyà. Añ rơp ai bơta dong klàs Siôn in, bơta gơklŏ Añ jê Israel in.