Esai 45 - Sră Goh 2018

Jơnau đơs hwơr bơh Sirus

¹ Do la jơnau Yàng Jehôwa đơs mơ Sirus, la cau geh bong mơñà Kơnràñ dê, be do: Cau mơ Añ neh at di tê ma khai dê, nàng lơh ală lơgar dòn duh di đap khai, hồ che kơt but ală cau bơtau dê, pò ală mpồng di đap khai, mơ ală mpồng ƀòn dờng ò til wơl:

² “Añ rơp lòt di đap mê, pơnring ală mơnơm; Añ rơp lơh bơcah rpot rpet ală mpồng lơh mơ kòng, koh dơrpă ală kai kal mpồng mơ lòs.

³ Añ rơp ai mê in ală đam jàr phan màng tòm tiah jơngo, bơta pas gơs neh prap lòi tòm ală tiah ndơp ndơr, nàng mê in git Añ la Yàng Jehôwa, Yàng Tom Trồ Israel dê, la Bơtau neh hòi mơ sơnđan mê dê.

⁴ Tài bơh Jakôp, cau duh broă Añ jê, mơ tài bơh Israel, cau sac rwah Añ jê, Añ hòi mê mơ sơnđan mê dê, mơ ai mê in dô nơm sơnđan ryŭ ryơm bulah mê ò git Añ.

⁵ Añ la Yàng Jehôwa, ò gơs bơtau lơi ndai; rlau mơ Añ ò gơs Yàng Tom Trồ lơi ndai tai. Bulah mê neh ò git Añ, Añ rơp bơtơl pràn mê in,

⁶ tồ bol khai rgơi git bơh di đah mattơngai lik tus di đah mattơngai mut ò gơs yàng lơi ndai tai rlau mơ Añ. Añ la Yàng Jehôwa, ò gơs bơtau lơi ndai tai.

⁷ Añ lơh gơs bơta àng mơ mòn gơs bơta klam jơngo, Añ ai bơta lơngai lơngò mơ crơng gơs bơta rung rài; Añ, Yàng Jehôwa, lơh jơh ală bơta hơ̆.

⁸ Ơ ală tap trồ hơđang đùh tĕ dà tŭ, mơ lòi tĕ ală tap trồ đùh mìu bơta song ring. Lòi tĕ plai ù gơ pò, nàng hòn cat bơta dong klàs, lòi tĕ bơta song ring kung hòn cat. Añ la Yàng Jehôwa neh crơng gơs gơ.”

⁹ Bòl glar ală cau in pơnđơl pơrlòng mơ Bơtau neh crơng gơs he, khai mìng la dô nơm gri mơ ù tòm ală gri lơh mơ ù. Ù kơnàng rgơi đơs sơl mơ cau chài mòn gơ lah: “Ñchi mê lơh taih?” Hala đơs: “Ală phan mê lơh gơs ò hoan chài tê,” sơl ơ?

¹⁰ Bòl glar cau lơi đơs mơ bèp khai lah: “Ñchi mê neh tơnggơs taih?” Hala đơs mơ mè khai lah: “Ñchi ai neh deh taih?”

¹¹ Yàng Jehôwa, Bơtau Sàng Goh Israel dê, mơ la Bơtau neh lơh gơs Israel, đơs be do: “Lùp tĕ Añ bơh ală kòn sau Añ jê, lùp tĕ Añ bơh ală bơta rơp gơlik tus. Hala ai añ in jơnau sồr bơh broă tê Añ lơh sơl?

¹² Hơ̆ la să tòm Añ neh lơh gơlik gơs plai ù, mơ crơng gơs jơi kòn mơnus ơm hơđang gơ. Tê Añ neh lì ală tap trồ; Añ neh rơndap ală mpồl sơmañ gơ dê.

¹³ Añ rơp tơngguh Sirus tòm bơta song ring, Añ rơp bơsong jơh ală gùng dà khai dê. Khai rơp bơt bơtào wơl ƀòn dờng Añ jê, mơ hồ toh ală cau kong kup cèng Añ jê geh khat gơboh, mơya ò di bơh khà jền hala nàng geh phan ƀàn, Yàng Jehôwa Gơnap Gơnoar Dờng đơs behơ̆.”

¹⁴ Do la jơnau Yàng Jehôwa đơs: “Phan mơna Ejiptơ dê, mơ ală phan kă bro Ethiôpi dê, mơ ală cau Sabe să jan jơnhoa, bol khai rơp tus hơ mê mơ rơp gơrê mơ mê; bol khai rơp lòt jat mê; bol khai rơp tus hơ mê tòm che sreng mơ kun bồ di đap mê, rac dan mơ mê lah: ‘Yàng Tom Trồ ơm mơ mê lơm; ò gơs yàng lơi ndai, ò gơs Yàng Tom Trồ lơi ndai tai.’”

¹⁵ Ngan, Kơnràñ la Yàng Tom Trồ pồn is să Kơnràñ; Ơ Yàng Tom Trồ Israel dê mơ la Bơtau Dong Klàs,

¹⁶ Jơh ală cau chài lơh rùp ràk rơp kong ƀàssìl mơ kong sền òsơp; bol khai rơp lòt bal tòm bơta kòl sền òsơp.

¹⁷ Mơya Israel rơp geh Yàng Jehôwa dong klàs, mơ bơta dong klàs gam sùm sùm ò lồi; Mê rơp ò tŭ lơi gơkòl tòm bơta ƀàssìl hala gơkòl sền òsơp jơl tus jơh ală rài.

¹⁸ Bơh Yàng Jehôwa la Bơtau neh crơng gơs ală tap trồ, Kơnràñ la Yàng Tom Trồ; Kơnràñ neh mòn mơ lơh gơs plai ù, Kơnràñ neh bơt bơtào gơ: Kơnràñ ò di neh crơng gơs gơ la ngềt ngơt ò gơs cau ơm, mơya neh lơh gơs nàng làng bol in ơm, Kơnràñ đơs be do: “Añ la Yàng Jehôwa, ò gơs yàng lơi ndai tai ò!

¹⁹ Añ neh ò đơs ndơp ndơr, tòm dô nơm lơgar klam jơngo. Añ ò di neh đơs mơ jơi bơtiàn Jakôp lah: ‘Bol mê jòi Añ la ò kwơ.’ Añ la Yàng Jehôwa, đơs jơnau song, bơto yal jơnau di.”

²⁰ Bol mê la ală cau gam kis bơh di ală lơgar, pơjum bal tĕ mơ tus, ală cau tùng ală rùp ràk lơh mơ chi, mơ hòi dan mơ ală yàng ò rgơi dong klàs, bol khai la ală cau ò gơs bơta git wă.

²¹ Yal tơnggit tĕ, ràng tơlik tĕ gơ, lòi bol khai tòmbơyai bal. Ñcau neh yal bơta do bơh lài òr taih? Ñcau neh yal tơnggit gơ bơh tŭ neh jŏ jòng taih? Ò di Añ, la Yàng Jehôwa ò ơ? Rlau mơ Añ ò gơs Yàng Tom Trồ lơi ndai tai! Ò gơs Yàng Tom Trồ song ring mơ Yàng Dong Klàs; rlau mơ mìng dô nă Añ.

²² Ơ jơh ală cau ơm tòm jơh ală tiah lồi dut plai ù dê, rê wơl tĕ mơ Añ rơp geh dong klàs! Bơh Añ la Yàng Tom Trồ, ò gơs yàng lơi ndai tai.

²³ Añ neh ai să tòm Añ mơ srat să, bơr Añ neh đơs tòm bơta song ring, dô jơnau rơp ò tŭ lơi rê wơl: Di đap Añ jơh ală gơltang rơp cùn, kòp nơm lơmpiat rơp srat să ho nền.

²⁴ Bol khai rơp đơs bơh Añ lah: “Bơta song ring mơ bơta pràn kơldang mìng ơm tòm Yàng Jehôwa lơm.” Jơh ală cau gơhào gơjrañ tòmdră mơ Kơnràñ rơp lòt tus mơ Kơnràñ mơ kong bơta ƀàssìl ƀàsso.

²⁵ Mơya tòm Yàng Jehôwa, jơh ală kòn sau Israel dê rơp geh pha lin mơ gơklŏ.