Esai 42 - Sră Goh 2018

Cau duh broă Yàng Jehôwa dê

¹ “Do la cau duh broă Añ jê, la cau Añ yò đo; la cau sac rwah Añ jê, la cau Añ niam nùs. Añ rơp ơn Hwềng Añ hơđang Khai, Khai rơp cèng bơta song ring ală làng bol in.

² Khai rơp ò driau dờng hala pò bơr, ò đơs sap dờng tòm ală gùng me.

³ Khai rơp ò dơrkă gai proh neh pă pơnie rau, ò tơnchơt ồs mòr chơt di brài đèng. Khai rơp ai bơta dòn song ràng tơlik bơta song ring,

⁴ Khai rơp ò lơbơn òsô hala gơplơ̆ nùs, jơl tus di tŭ neh bơt bơtào bơta song ring hơđang ù; ală bồt pơlào rơp gơn kơnòm di bơta bơto sồr Khai dê.”

⁵ Do la jơnau đơs Jehôwa Yàng Tom Trồ dê, la Bơtau neh crơng gơs mơ pò ală tap trồ, mơ lă plai ù bal mơ jơh ală phan lik bơh gơ, la Bơtau ai nhơm tă ală làng bol ơm hơđang gơ, mơ ai hwềng ală cau cơnđòa lòt hơđang gơ:

⁶ “Añ, Yàng Jehôwa, neh hòi sac mê tòm bơta song ring; Añ rơp at tê mê mơ Añ rơp sền gàr mê mơ ai mê in gơlik gơs dô bơta ho bal làng bol in, mơ dô bơta àng làng bol bơdìh in,

⁷ nàng pò mat cau jơngo in, hồ cau kòl krơ̆ bơh hìu jàm, mơ toh cau nggui tòm tiah jơngo hìu jàm dê.

⁸ Añ la Yàng Jehôwa; hơ̆ la sơnđan Añ! Añ ò lòi bơta gơklŏ Añ jê cau ndai in, kung ò ai bơta jòng ro Añ jê ală rùp ràk in.

⁹ Sền ne, ală bơta yau neh gơlik gơs rau, mơ Añ yal tơnggit ală bơta pa; Añ yal tơnggit bol mê in lài mơ tŭ gơ gơlik tus.”

Jơnau đơs chò jòng ro Yàng Jehôwa

¹⁰ Đơs chò tĕ Yàng Jehôwa in dô bơta đơs chò pa, bơta đơs chò jòng ro Kơnràñ bơh tiah lồi dut plai ù dê. Ơ ală cau lòt tòm dàlềng mơ ală phan tòm hơ̆, ală bồt pơlào mơ jơh ală cau kis tòm gơ.

¹¹ Lòi ƀlàng ngềt ngơt mơ ală ƀòn dờng tòm hơ̆ tơlik sap gơ dê, lòi ală ƀòn la tiah Kedar ơm, chò hòp tĕ Lòi làng bol Sela hòn chò đơs chò tĕ, lòi bol khai driau dờng tĕ hơđang ală bồ mơnơm.

¹² Lòi bol khai ơn tĕ bơta gơklŏ Yàng Jehôwa in, mơ yal tơlik bơta jòng ro Yàng tòm ală bồt pơlào.

¹³ Yàng Jehôwa rơp lik lòt hơđap be cau ling pràn kơldang, be dô nă cau ling jak chồl bơtrut nùs ngac ngar Kơnràñ dê, Kơnràñ driau dờng tòmlơh; mơ rơp pha lin rlau mơ ală cau sò tơm Kơnràñ dê.

¹⁴ Bơh jŏ rau, Añ neh ơm mŏ mŏ, Añ kư̆ ơm mŏ mŏ, mơ ruc wơl să tòm Añ. Tŭ do, Añ rơp driau dờng, be cau ùr jê deh, Añ rơp tă nhơm bòl òsô tai.

¹⁵ Añ rơp lơh jơh ală mơnơm mơ ală dòr in gơlik tiah sang lòi ngềt ngơt, lơh jơh ală chi che gơ dê ro jrùh; Añ rơp tòmgơl ală hiòng gơlik bồt pơlào, mơ ală tơrlung dà soat jơh.

¹⁶ Añ rơp tề ală cau jơngo lòt tòm ală gùng bol khai ò git, Añ rơp lam bol khai tòm ală gùng bol khai òhềt mòng git; Añ rơp tòmgơl bơta jơngo gơlik gơs bơta àng di đap bol khai, mơ lơh ală tiah ò ring gơlik gơs ring niam. Hơ̆ la ală bơta Añ rơp lơh; mơ Añ rơp ò sang lòi bol khai.

¹⁷ Bol khai rơp kòl ruc wơl mơ kong ƀàssìl, hơ̆ la ală cau dòn kơnòm di ală rùp ràk, ală cau đơs mơ ală rùp pac sềr lah: “Ală kơnràñ la yàng bol hi dê.”

Israel jơngo mat mơ tĭ tồr

¹⁸ Ơ ală cau tĭ tồr; iat tĕ; mơ bol mê la cau jơngo mat, sền tĕ mơ gŏ!

¹⁹ Ñcau la cau jơngo, mơya la cau duh broă Añ jê, mơ cau tĭ tồr kung be cau kong sồr mơ Añ neh sồr lòt taih? Ñcau la jơngo kung be cau ơn să Añ in, hala cau jơngo kung be cau duh broă Yàng Jehôwa dê taih?

²⁰ Mê neh gŏ oă bơta, mơya ò sền sơwì dô êt lơi; mê gơs trồm tồr àng loh, mơya mê ò kơno dô êt lơi.

²¹ Yàng Jehôwa niam nùs bơh bơta song ring Kơnràñ dê, lơh bơta boh lam Kơnràñ dê dờng màng mơ gơklŏ.

²² Mơya do la dô nơm làng bol kong phà kong kơñau, jơh tơl nă bol khai yar dă dùh tòm trồm jrô, mơ pồn ndơp tòm ală hìu jàm. Bol khai gơlik gơs phan tòmpìt geh mơ ò gơs cau lơi dong tă; lơh gơs phan kup geh mơ ò gơs cau lơi đơs lah: “Lòi tĕ bol khai rê wơl.”

²³ Ñcau tòm bol mê rơp ơn nùs di bơta do hala kơrhia mơ ai tồr iat bơh tŭ tơngai rơp tus taih?

²⁴ Ñcau neh jào Jakôp nàng gơkòl cau kup geh, mơ phi Israel nàng cau phà kơñau taih? Hơ̆ ò di la Yàng Jehôwa, la Bơtau mơ bol he neh tìs glài tòmdră mơ Kơnràñ ò ơ? Bơh bol khai ò bài lòt jat ală gùng dà Kơnràñ dê; bol khai ò dòn bơr lơh jat bơta boh lam Kơnràñ dê.

²⁵ Behơ̆ tàng Kơnràñ neh tuh hơđang bol khai bơta gơjrañ duh hơng Kơnràñ dê, la bơta gơhào gơjrañ bơta kơlìn dê. Gơ gơrwàng bol khai tòm ồs, mơya khai kung ò git wă; gơ chu pơrguc khai, mơya khai kung ò ơn nùs bơh bơta hơ̆.