Esai 4 - Sră Goh 2018

¹ Poh nă cau ùr rơp sơmbat kup dô nă cau klau tòm ngai hơ̆, mơ đơs lah: “Bol hi rơp sa phan tòm hi dê, soh ồi ào tòm hi dê; mìng lòi bol hi in geh hòi jat sơnđan mê dê; dan tă tơlik ngài bơta ƀàssìl bol hi dê!”

Bơta gơklŏ ngai tơnơ̆ ală cau gam wơl tòm Siôn

² Tòm ngai hơ̆, ntê Yàng Jehôwa dê rơp hàng mơnĕ mơ gơklŏ, plai đo ù tiah dê rơp lơh gơs bơta jòng să mơ bơta gơklŏ ală cau in gam kis tòm Israel dê.

³ Ală cau gam wơl tòm Siôn, mơ ală cau gam ơm wơl tòm Jerusalem, hơ̆ la jơh ală cau geh sơnđan la sàng goh, jơh tơl nă cau geh cih tòm sră cau kis dê tòm Jerusalem.

⁴ Yàng Jehôwa rào goh bơta ƀơ̆ ƀơl ală kòn ùr Siôn dê dô dơ̆, Kơnràñ rơp jùt goh ală tềl mhàm bơh digùl Jerusalem mơ kơnòm di hwềng bơta cahrña mơ hwềng chu pơrguc dê.

⁵ Gen Yàng Jehôwa rơp crơng gơs hơđang làm jơh mơnơm Siôn mơ hơđang ală tiah cau neh tus pơjum, gơs dô puk mhwal ñhŭ tòm trồ ngai mơ dô nơm jrong ồs pơnđàng tòm trồ mang; ngan hơđang jơh bơta gơklŏ rơp gơs dô nơm bài kơrnìng.

⁶ Gơ rơp duh broă be dô nơm sàl gơs mƀur klàs di bơta duh trơàl tòm trồ ngai, mơ dô bă tiah kìng crŭ pồn să klàs bơh di càl rbut dờng mơ mìu.