Esai 39 - Sră Goh 2018

Ală cau ala mat bơtau Babilôn dê

¹ Tòm tŭ hơ̆, Bơtau Babilôn la Merôdak Baladan, kòn bơtau Baladan, sồr cau kong lòt pơyoa sră mơ phan pà bơtau Ejekia in; tài bơh bơtau neh kơno khai kòp jê mơ geh sơmbòi.

² Ejekia wă rò bol khai mơ sơnio bol khai in đam jàr phan màng, ală priă, màh, kơlhô, mơñà màng, jơh ală phan tòmlơh, mơ jơh ală phan màng khai dê. Ò gơs phan lơi tòm gơlang khai dê mơ tòm jơh lơgar khai dê mơ Ejekia ò sơnio bol khai in sền.

³ Gen cau gơnoar hwơr Esai tus mơ bơtau Ejekia mơ lùp lah: “Ñchi jơnau ală cau hơ̆ đơs, mơ bol khai tus bơh lơi taih?” Ejekia ho lah: “Bol khai tus mơ añ bơh lơgar ngài, bol khai tus bơh lơgar Babilôn.”

⁴ Cau gơnoar hwơr lùp tai: “Ñchi phan bol khai sền gŏ tòm gơlang bơtau taih?” Ejekia đơs lah: “Bol khai neh sền gŏ jơh ală phan tòm gơlang añ; ò gơs phan lơi tòm đam jàr añ jê mơ añ ò sơnio bol khai in.”

⁵ Gen Esai đơs mơ Ejekia lah: “Dan iat tĕ jơnau Yàng Jehôwa Gơnap Gơnoar Dờng neh đơs:

⁶ ‘Ală ngai rơp tus, tòm tŭ jơh ală phan tòm gơlang bơtau dê mơ jơh ală phan mơ ồng pàng bơtau dê neh prap lòi jơl tus di ngai do rơp cèng pơrdô jơh hơ Babilôn; ò gam dô nơm phan lơi!’ Yàng Jehôwa đơs behơ̆.

⁷ ‘Dô pơnah tòm ală kòn sau bơtau dê, la ală cau rơp geh deh bơtau in, bol khai rơp kong kup cèng mơ rơp lơh gơs kwang kơndời tòm gơlang bơtau Babilôn dê.’”

⁸ Ejekia ho wơl Esai lah: “Jơnau đơs Yàng Jehôwa dê mơ ồng pa yal wơl añ in iat hơ̆ la niam,” bơh bơtau kơlôi lah: “Rơp geh ring lơngai mơ ring niam tòm rài añ jê.”