Esai 36 - Sră Goh 2018

Pơnah bơtơl bơh bơta yal yau. – Ejekia mơ Sennacerip. – Cau kong sồr Merôdak Baladan dê ( 36:1 – 39:8 ) Sennacerip khơm lơh Jerusalem

¹ Tòm nam dơ̆ jơt poan rài bơtau Ejekia at bồ, Sennacerip, bơtau Asiri dê, brồ lơh mơ tòmdră mơ ală ƀòn dờng kơ̆ cê Juda mơ tòmpìt geh.

² Bơtau Asiri sồr Rapsake bal mơ dô mpồl ling pràn kơldang bơh Lakis tus hơ bơtau Ejekia tòm Jerusalem. Rapsake ntào di gah bòng dà tơnau hơđang, tòm gùng me lòt hơ ƀlàng cau chài ñòm brài.

³ Gen gơs Eliakim, kòn klau Hilkia, la cau kwang at bồ gơlang bơtau, Sepna la cau gơnoar cih, mơ Jôa kòn klau Asap dê, la cau kwang cih sră yal yau lơgar dê lòt tus hơ khai.

⁴ Rapsake đơs mơ bol khai lah: “Yal tĕ mơ bơtau Ejekia lah bơtau dờng la bơtau Asiri đơs be do: ‘Bơta gơn kơnòm bol mê dê ơn hơđang bơta lơi taih?

⁵ Mê kơlôi lah mìng jơnau đơs gòi rgơi tòmgơl bơta rơndap tòmlơh mơ bơta pràn tòmlơh sơl ơ? Mê kơnòm di ñcau mơ tòmdră mơ añ taih?

⁶ Sền ne, mê kơnòm di Ejiptơ la dô nơm tòm proh pă lơh gơs gai jra, cau lơi sơnđìng di gơ gen rơp srơp bluh tê! Pharaôn bơtau Ejiptơ, gơwèt mơ jơh ală cau gơn kơnòm di khai la behơ̆.

⁷ Mơya dilah mê đơs mơ añ lah: “Bol hi dòn kơnòm di Jehôwa Yàng Tom Trồ bol hi dê.” Hơ̆ ò di la Bơtau hơ̆ mơ Ejekia neh tă sang jơh ală tiah jơnhoa mơ ală cơnòng duh khoai, gen đơs mơ Juda mơ Jerusalem lah: “Bol mê pal duh khoai di đap ală cơnòng duh khoai do,” ò ơ?

⁸ Behơ̆ tŭ do, tòmpơrlòng tĕ mơ cau tòm añ jê la bơtau Asiri: Añ rơp ai bol mê in bàr rbô nơm ơseh, dilah mê rgơi gơs tơl cau ling hào gơ!

⁹ Mbe mê rgơi tòmdră jai mơ dô nă cau kwang dềt rhền rlau jơh tòm mpồl cau duh broă cau tòm añ jê, bulah mê kơnòm di Ejiptơ rơndeh lòs tòmlơh mơ ling hào ơseh taih?

¹⁰ Rlau mơ hơ̆, ò di la bơh gơnoar sồr Yàng Jehôwa dê mơ añ lòt tus nàng brồ lơh mơ tơnroh lơgar do ò ơ? Yàng Jehôwa neh đơs mơ añ lah: Lòt tus tòmlơh mơ lơgar do mơ tơnroh gơ.’”

¹¹ Eliakim, Sepna mơ Jôa, đơs mơ Rapsake lah: “Dan đơs mơ jơnau Aram mơ ală cau duh broă ồng dê, bơh bol hi git wă jơnau đơs hơ̆. Bañ đơs mơ bol hi tòm jơnau Hebrơ nàng làng bol ơm hơđang dơrñang ƀòn in ò kơno.”

¹² Mơya Rapsake ho wơl lah: “Cau tòm añ sồr añ đơs ală jơnau hơ̆ mìng mơ cau tòm bol mê dê bal mơ bol mê in lơm, mơ ò di kung đơs mơ ală cau nggui hơđang dơrñang ƀòn, la ală cau bal mơ bol mê rơp sa è tòm mơ hùc dà đồm tòm he dê ò ơ?”

¹³ Behơ̆ Rapsake ñă ntào hòi driau dờng tòm jơnau Hebrơ lah: “Iat tĕ jơnau đơs bơtau dờng, la bơtau Asiri.

¹⁴ Bơtau đơs be do: ‘Bañ lòi bơtau Ejekia pơrlồm bol mê; bơh khai ò rgơi dong tă bol mê!

¹⁵ Bañ lòi bơtau Ejekia bơto pơndòm bol mê dòn kơnòm di Yàng Jehôwa, bơh khai đơs lah: “Yàng Jehôwa ngan rơp dong tă bol he, mơ ƀòn dờng do rơp ò phi tòm tê bơtau Asiri dê!”

¹⁶ Bañ iat jơnau bơtau Ejekia dê; bơh bơtau Asiri đơs be do: Lơh tĕ gơtòmsòr mơ añ, mơ lik tus tĕ mơ añ, gen jơh tơl nă bol mê rơp sa plai ño mơ plai ƀal tòm he dê, hùc dà tơrlung tòm he dê,

¹⁷ jơl tus di tŭ añ tus nàng cèng bol mê mut tòm dô nơm lơgar be lơgar tòm bol mê dê, hơ̆ la lơgar gơs kòi mơ tơrnòm, dô nơm lơgar gơs phan sa mơ suơn ño.

¹⁸ Bañ lòi bơtau Ejekia pơndòm pơrlồm bol mê tòm tŭ khai đơs lah: “Yàng Jehôwa rơp dong tă bol he!” Gơs yàng lơgar lơi ndai neh dong tă lơgar khai dê klàs bơh di tê bơtau Asiri sơl ơ?

¹⁹ Ntềng đah ală yàng Hamas mơ Arpat taih? Ntềng đah ală yàng Sepharbaim taih? Ală yàng hơ̆ neh dong tă Samari klàs bơh tê añ sơl ơ?

²⁰ Tòm jơh ală yàng ală lơgar hơ̆ dê, gơs yàng lơi rgơi dong tă lơgar he dê klàs bơh di tê añ sơl? Behơ̆ mbe Yàng Jehôwa rgơi dong tă Jerusalem klàs bơh di tê añ taih?’”

²¹ Mơya làng bol ơm mŏ mŏ, ò ho dô jơnau lơi tài bơh cau bơtau neh ai gơnoar sồr lah: “Bañ ho khai wơl.”

²² Gen Eliakim, kòn klau Hilkia, cau kwang at bồ gơlang bơtau, bal mơ cau gơnoar cih Sepna, mơ Jôa kòn klau Asap, cau kwang cih sră yal yau lơgar dê, crè ào bol khai dê, rê wơl mơ bơtau Ejekia, mơ yal wơl ală jơnau Rapsake neh đơs.