Esai 34 - Sră Goh 2018

Bơta cahrña hơđang ală làng bol

¹ Ơ ală lơgar, tus rềp tĕ mơ ơm iat; ơ ală làng bol, ơn tĕ tồr iat; Plai ù mơ jơh ală phan tòm gơ, dunnia mơ jơh ală phan geh tơnggơs bơh gơ, iat tĕ!

² Bơh Yàng Jehôwa gơhào nùs tòmdră mơ ală lơgar; bơta gơjrañ dờng Kơnràñ dê tòmdră mơ jơh ală mpồl ling bol khai dê; Kơnràñ lơh bol khai in gơkòl tơnroh, Kơnràñ rơp jào bol khai tòm bơta hàl tơnchơt.

³ Cau kong sreh tơnchơt bol khai dê rơp kòl sang sơrbì, ƀồc bol khai dê rơp ƀô ồm; ală mơnơm rơp hòr bơh mhàm bol khai dê.

⁴ Jơh ală gơnoar hơđang trồ rơp roh thit, ală tap trồ rơp pồt wơl be dô blah sră pồt; jơh ală mpồl sơmañ rơp rung be nha ño ro, hala be plai ƀal ro rung bơh tòm chi ƀal.

⁵ Tòm tŭ đào Añ jê neh ñô hòm hơđang trồ rau; sền ne, gơ rơp mù hơđang Edôm, hơđang làng bol Añ neh lơh nền jào bơta cahrña.

⁶ Yàng Jehôwa gơs dô nơm đào; gơ neh hòm bơh mhàm, neh sa hòm bơh dơngi, mhàm ală belàt kòn mơ ală be, dơngi leh ală belàt dam dê. Bơh Yàng Jehôwa gơs phan ơn pơdơng tòm Bôjra, mơ gơs bơta hàl tơnchơt dờng tòm ù tiah Edôm.

⁷ Ală kơnrồ brê, kơnrồ gam dềt, mơ kơnrồ dam pràn kơldang gen gơpừ jơh bal mơ bol khai. Ù tiah bol khai dê rơp gơkram tòm mhàm, mơ ù bol khai dê rơp bềng lìu bơh dơngi.

⁸ Bơh Yàng Jehôwa neh gơs dô ngai nàng sal tê, gơs dô nam nàng lơh cơng bơh bơta gơrềng tus di Siôn.

⁹ Ală croh dà Edôm dê rơp gơlik gơs cài nho, kơmbuh ù gơ dê gơlik gơs siau, ù tiah gơ dê rơp gơlik gơs cài nho ồs sa hơng.

¹⁰ Ngai mơ mang rơp ò tŭ lơi chơt, ñhŭ gơ par guh gam sùm sùm. Gơ rơp kong sang lòi ngềt ngơt bơh rài do tus hơ rài ne, ò gơs cau lơi rơp lòt gan gơ tai.

¹¹ Klàng iar mơ klàng kò rơp dòp geh tiah hơ̆; klàng bung mơ kơnđà rơp lơh rsòn ơm tềng hơ̆. Yàng Tom Trồ rơp dang che bơta sơlồng sơlàng hơđang gơ, mơ che pơnring sơlồng sơlàng bơta ryŭ ryơm gơ dê.

¹² Cau rơp sơnđan tiah hơ̆ la Ò Gơs Lơgar Bơtau Tềng Hơ̆, mơ jơh ală cau kwang at bồ bol khai dê rơp ò kwơ.

¹³ Tòm lò rơp hòn làm tòm gơlang bơtau, lò mơ lò mrơt hòn tòm theng kơp gàr. Tềng hơ̆ rơp gơlik gơs tiah lòt rê so rhau dê, tiah ơm sềm klàng kò dê.

¹⁴ Phan tòm brê tòmtìp mơ so rhau tềng hơ̆; be dam hòi gơp tềng hơ̆. Tềng hơ̆ ală phan jòi sa trồ mang rơp ơm rlô, mơ bàn dô bă tiah bic rlô.

¹⁵ Tềng hơ̆ klàng kò rơp lơh rsòn mơ krơm tap, gơ rơp cah kòn mơ ròng siam kòn dềt hơđơm mƀur pơnđar gơ dê; kung tòm tiah hơ̆, ală grơt rơp pơjum bal, kòp nơm gơs yô dam mơ me.

¹⁶ Jòi tĕ mơ sền tòm sră Yàng Jehôwa dê: Ò gơs phan lơi tòm jơh ală phan do rơp ò gơs tềng hơ̆, ò gơs dô nơm lơi la ò gơs yô. Bơh bơr Yàng Jehôwa dê neh ai gơnoar sồr; mơ Hwềng Kơnràñ dê rơp pơjum tơrgòm bol gơ.

¹⁷ Kơnràñ neh tă khà bol gơ, tê Kơnràñ neh tòmpà pơnah tiah neh was mơ che rnoas. Bol gơ rơp dòp geh gơ jơl sùm sùm, mơ ơm tềng hơ̆ bơh rài do tus hơ rài ne.