Esai 33 - Sră Goh 2018

Jơnau đơs hwơr bơta dong tă bơh cau sò tơm

¹ Bòl glar mê in, ơ cau tơnroh cau, mê la cau òhềt kong tơnroh! Ơ mê la cau pơrlơ̆ dră, mơ ală cau òhềt kong pơrlơ̆ dră! Tòm tŭ mê neh sir tơnroh cau, mê rơp kong tơnroh; mơ tòm tŭ mê sir pơrlơ̆ dră di cau, mê rơp kòl cau pơrlơ̆ dră.

² Ơ Yàng Jehôwa, dan nđàc sơngit di bol hi; bol hi kơp gơn Yàng; dan ai bơta pràn kơldang bol hi in kòp àng drim, bơta dong klàs bol hi in tòm tŭ bòl glar!

³ Kơno sap nggồr nggàc, ală làng bol dô pồn: di đap bơta ryŭ ryơm Kơnràñ dê, ală lơgar nrah nring.

⁴ Ơ ală lơgar, phan kup geh bol mê dê rơp kòl tơrgòm be ală tu kòng kìm; cau brồ tus hơđang gơ be dô mpồl srah nting.

⁵ Yàng Jehôwa geh yò tơngguh bơh Kơnràñ ơm hơđang tiah jơnhoa; Kơnràñ lơh bềng lìu Siôn mơ bơta song ngan mơ song ring.

⁶ Kơnràñ rơp la bơta kơ̆ nền tŭ tơngai mê dê, la bơta dong klàs tơngkah tơngkañ, bơta jak chài mơ bơta git wă; Bơh bơta duh rngòt di Yàng Jehôwa la đam jàr Siôn dê.

⁷ Iat tĕ, ală cau khin cha bol khai dê nggà ñìm tòm ală gùng lòt; ală cau kong sồr lòt lơh gơtòmsòr ñìm rac sràt bơtang.

⁸ Gùng me ngềt ngơt, ò gơs cau lòt rê tòm gùng: Bơta ho bal neh jơh, ală jơnau srat să kòl sền òsơp, ò gơs bơta ơn nùs di bơta pal lơh.

⁹ Ù tiah ñìm rac mơ siar roh, Liban gơkòl lơh roh gơprah mơ ñòp ro; Sarôn gơlik kung be tiah ƀlàng bràs, Basan mơ Karmel ro jrùh jơh nha.

¹⁰ Yàng Jehôwa đơs: “Tŭ do Añ rơp guh, tŭ do Añ rơp geh yò tơngguh să tòm Añ hơđang.

¹¹ Bol mê rơp bun nsiap mơ deh rhe; nhơm tă bol mê dê la ồs rơp chu pơrguc bol mê.

¹² Ală làng bol rơp kong chu be cùr, be tòm lò neh koh mơ chu tòm ồs.

¹³ Bol mê la cau ơm ngài, iat tĕ broă Añ neh lơh; bol mê la cau ơm rềp, đal git tĕ gơnap gơnoar Añ jê.”

¹⁴ Ală cau tồi glài tòm Siôn rngòt rngơt; ală cau ò dòn duh rơm să rngòt. “Ñcau tòm bol he rgơi ơm digùl ồs sa loan taih? Ñcau tòm bol he rgơi ơm tòm ồs hơng gam sùm taih?”

¹⁵ Hơ̆ la cau lơh lòt song ring, đơs jơnau di ngan, sền òsơp di phan sa kwì, ò bài dòp phan sa loă, sềt tồr ò bài iat bơta bơyai lơh gơtuh mhàm, ñềm mat ò bài sền gŏ bơta iơh.

¹⁶ Bol khai rơp ơm tòm tiah jơnhoa; tiah kìng crŭ bol khai dê tòm tiah kơp gàr hơđang pơnai lŭ klềr; phan sa bol khai dê rơp geh ai bơtơl, mơ dà hùc bol khai dê rơp ò tŭ lơi siơ̆u.

Ù tiah Bơtau Ryŭ Ryơm dê

¹⁷ Gar mat mê rơp sền gŏ bơtau tòm bơta hàng mơnĕ Kơnràñ dê, mơ gŏ dô nơm lơgar pò ơnàng.

¹⁸ Tòm ală bơta kơlôi sơnơng mê dê, mê rơp kơlôi bơta rngòt rngơt mơ lah: “Ntềng đah cau kwang kòp khà taih? Ntềng đah cau boh dia taih? Ntềng đah ală cau at bồ sền sơwì tiah kơp gàr taih?”

¹⁹ Mê rơp ò gŏ ală cau jàñ bơsak tai, hơ̆ la làng bol gơs jơnau đơs ndai, jơnau đơs krơi is mơ cau ò rgơi wă wơng.

²⁰ Sền tơnggòr tĕ Siôn, la ƀòn dờng sac rwah ngai pơjum sa bol he dê; Gar mat mê rơp gŏ Jerusalem, la tiah ơm ring lơngai, la dô nơm sàl rơp ò kòl tă pơrdô tai, ală gai jơrmơng gơ dê rơp ò tŭ lơi kòl bŭi, ò gơs dô dang che lơi gơ dê rơp gơkòl tac.

²¹ Mơya bơta ryŭ ryơm Yàng Jehôwa ơm bal mơ bol he tềng hơ̆, la tiah gơs hiòng mơ croh dà dờng ơnàng, rơp ò gơs ơhò dờng mơ plung bềl yàl lòt gan.

²² Bơh Yàng Jehôwa la Bơtau cahrña bol he dê, Yàng Jehôwa la Bơtau bol he, Yàng Jehôwa la Bơtau at bồ bol he dê; Kơnràñ rơp dong klàs bol he!

²³ Ală che kơt bol mê dê neh sơntă: Jrong bềl yàl ò ntào kơ̆ di tiah gơ dê, ò rgơi lì bềl yàl. Gen phan kup geh tơngkah tơngkañ rơp tòmpà; tian gơs cau kwet gơlte kung gơs pơnah tòm bơta phà kup sơl.

²⁴ Ò gơs cau lơi ơm tòm Siôn rơp đơs lah: “Añ kòp jê,” cau ơm tềng hơ̆ rơp geh toh bơta tồi glài bol khai dê.