Esai 3 - Sră Goh 2018

Bơta cahrña hơđang Jerusalem mơ Juda

¹ Do, Yàng la Yàng Jehôwa Gơnap Gơnoar Dờng, Bơtau at bồ hơđang rlau jơh rơp tă tơlik bơh di Jerusalem mơ Juda bơta dong kòl mơ ală bơta dòn kơnòm: Kơnràñ rơp tă jơh ală phan sa mơ dà hùc bol khai dê.

² Kơnràñ rơp tă tơlik ală cau tòmlơh jak mơ ală cau ling, ală kwang cahrña, mơ cau gơnoar hwơr, cau sền dà mơ cau kwang kra,

³ cau kwang at bồ ling mơ cau ryŭ ryơm, cau chài bơyai broă, cau chài lơh broă mơ cau gru cau bơjơu.

⁴ Añ rơp bơtào ală cau gam kơnòm să lơh gơs cau kwang at bồ ƀòn lơgar, mơ ală kòn dềt rơp at bồ bol khai.

⁵ Làng bol rơp kong rồn bơklơn, kòp nă tòmdră mơ cau ndai, gơp ƀòn tòmdră mơ gơp ƀòn; cau pơnu rơp dờng nùs mơ cau kra, cau ò diă ò diơng ò duh rngòt cau ryŭ ryơm.

⁶ Gơs cau ƀà ting kup cau jơi bơtiàn he, dô nă tòm oh mi khai dê, mơ đơs lah: “Mê gơs dô blah ào jrùh; mê rơp lơh tĕ cau at bồ bol hi, mơ gơnru bơcah lề do, rơp ơm hơđơm bơta at bồ mê dê!”

⁷ Mơya tòm ngai hơ̆ cau ndai rơp hòi driau mơ đơs lah: “Ò, añ ò di la dô nă cau sơmbòi; tòm hìu añ ò gơs phan sa hala ào soh, bañ pồ bơtào añ lơh gơs kwang at bồ làng bol.”

⁸ Bơh Jerusalem gen gơtup pừ, Juda gen gơtơrlơm; tài bơh ală jơnau đơs mơ broă lơh bol khai dê tòmdră mơ Yàng Jehôwa, bol khai sền òsơp di bơta gơs mat gơklŏ Yàng Tom Trồ dê.

⁹ Muh mat bol khai lơh cơng tòmdră wơl mơ bol khai; bol khai ràng tơlik tồi glài bol khai dê be Sôdôm neh lơh; bol khai ò rgơi pồn gơ. Bòl glar bol khai in! Bơh bol khai neh cèng bơta rung rài hơđang să tòm bol khai.

¹⁰ Yal tĕ cau ò gơs glài in git lah bơtoah ngan bol khai in, bơh bol khai rơp sa bơh cồng nha broă lơh bòl glar bol khai dê.

¹¹ Bòl glar cau iơh bơsak in! Bơh ală bơta tê bol khai neh lơh gen rơp geh tơm wơl bol khai in.

¹² Ơ làng bol añ jê, ală cau kơnòm la cau rồn bơklơn bol khai; ală cau ùr at bồ bol khai. Ơ làng bol añ jê, cau at bồ bol mê lam bol mê lòt tìs nrah, mơ lơh sơlồng sơlàng gùng bơh lài bol mê dê.

¹³ Yàng Jehôwa guh nàng dong tò broă Kơnràñ dê, Kơnràñ ñă ntào mơ cahrña làng bol.

¹⁴ Yàng Jehôwa cahrña tòmdră mơ ală cau kwang kra bal mơ ală cau kwang at bồ làng bol Kơnràñ dê lah: “Bol mê la cau neh sa loan suơn ño Añ jê; phan tòmpìt geh bơh cau rƀah gam prap lòi tòm ală hìu bol mê dê.

¹⁵ Bol mê ò di jă trơm làng bol Añ jê, mơ tơnlề muh mat cau rƀah rƀừp dê.” Añ, Yàng Jehôwa Gơnap Gơnoar Dờng Làm Jơh đơs behơ̆.

¹⁶ Yàng Jehôwa đơs lah: “Tài bơh ală kòn ùr Siôn dê pơnhừ să, pò jòng ngko mơ lik lòt, lơngoh lơngeh sơrkềng gar mat jà pơndòm. Yuơt să tòm tŭ bol khai cơnđòa lòt, lơh ntas kòng di jơng.

¹⁷ Yàng Jehôwa rơp lơh bồ ală kòn ùr Siôn dê gơcat ngkàp, mơ Yàng Jehôwa lơh bol khai in ơm kuh lòi rồ.”

¹⁸ Tòm ngai hơ̆, Yàng Jehôwa rơp tă tơlik ală phan sơmpô să bol khai dê: ală kòng jơng, ală che brài pùt sŏ mơ ală che rơnjài di ngko;

¹⁹ ală bơno di tồr, ală kòng di tê mơ ală bài kơrnìng kìng mat;

²⁰ ală sơgơn, ală che rơnjài jơng mơ ồi kơt but; ală khàr mơñà ƀô, mơ ală phan sơmpô să hàng mơnĕ,

²¹ ală sơmbiat ƀang kì mơ ală bơno blo muh;

²² ală ào jrùh hàng mơnĕ mơ ală ào bơdìh liah tê, ală ào nggòc, mơ ală kơldung dềt at tê;

²³ ală krơh triang muh mat, ală ồi ào mơ bài che dơmài lơbơn, ală sơgơn dềt, mơ ală chèo at tòm tê.

²⁴ Rơp gơs ƀô iơh ala ƀô bơlhu; che cap ala ồi kơt but; bồ lòl ala sŏ tơrkồn; bài sơnò kiat ala ồi ào kas màng; tềl lơhò ala bơta hàng mơnĕ.

²⁵ Cau klau bol mê dê rơp gơpừ di cồng đào, ală cau ling jak bol mê dê rơp kong chơt tòm bơta tòmlơh.

²⁶ Ală mpồng Siôn dê rơp ñìm rac mơ pơt wòl; Khai rơp be dô nă cau ùr nggui tòm ù ngềt ngơt.