Esai 29 - Sră Goh 2018

Jơnau đơs hwơr tòmdră mơ Jerusalem

¹ Bòl glar ngan mê in, ơ Ariel, Ariel, la ƀòn dờng Dabit neh lơh sàl tềng hơ̆! Bơtơl oă nam; lòi ală ngai pơjum sa kư̆ lòt rlau.

² Bulah behơ̆ Añ rơp gòm gơrwàng gùt dar Ariel; gơ rơp ñìm ƀồc pơt wòl, mơ Jerusalem gơwèt mơ Añ rơp kung be Ariel.

³ Añ rơp bơtào sàl gơrwàng gùt dar tòmdră mơ mê, Añ rơp bơt theng gơrwàng gùt dar mê, mơ bơtào gơs kơ̆ bơta gơrwàng tòmdră mơ mê.

⁴ Bơh tiah jrô tòm ù mê rơp đơs, bơh tòm tiah liah thul ơmul ală jơnau mê dê rơp tus; Sap đơs mê dê rơp guh bơh tòm ù gơlơh kung be sap dô nơm hwềng dê; jơnau đơs mê dê rơp đơs chều lik bơh kơmbuh ù.

⁵ Mơya cau sò tơm mê dê rơp gơbơtơl oă be thul rhền, mpồl oă cau jàñ bơsak rơp gơlik kung be ngkàp kòi càl khồm gơ par thit; bơta hơ̆ rơp gơlik tus mo dô bă nisơna.

⁶ Yàng Jehôwa Gơnap Gơnoar Dờng rơp còp mê, mơ ntơr kơnàs, gơlơnggơr ù mơ ntas nggồr dờng, càl rbut, mơ lơmpiat ồs sa pơrguc.

⁷ Gen mpồl oă jơh ală lơgar neh tòmlơh tòmdră mơ Ariel, neh brồ lơh khai bal mơ ală theng kơ̆ cê khai dê mơ gơrwàng gùt dar khai, rơp kung be dô bơta mpau, mơ bơta gơtơnggŏ tòm trồ mang.

⁸ Hơ̆ kung be tòm tŭ dô nă cau jơgloh mpau sa, mơ kah rngal gen gam jơgloh; hala kung be dô nă cau tơhìr dà mpau hùc dà, mơya kah rngal khai gam tơhìr. Behơ̆ mpồl oă jơh ală lơgar rơp tòmdră mơ mơnơm Siôn, rơp gơlik gơs behơ̆.

⁹ Mơp dơl mơ ai lơh krơi tĕ, lơh tĕ he in jơngo mat mơ ò sền gŏ; Bơñul ñô tĕ, ò di bơh tơrnòm lòt gơtòmsèng tĕ mơya ò di bơh tơrnòm pa.

¹⁰ Bơh Yàng Jehôwa neh tuh hwềng bic lơhă hơđang mê; Kơnràñ neh lềt mat bol mê la ală cau gơnoar hwơr; neh gòm bồ bol mê la ală cau gơs bơta gơtơnggŏ.

¹¹ Gơwèt mơ mê gen jơh dô bơta gơtơnggŏ do mìng la ală jơnau tòm dô pang sră pồt neh tap ƀang kì. Dilah sră pồt do ai dô nă cau rgơi sền sră in mơ sồr khai lah: “Dan sền tĕ sră do,” cau hơ̆ rơp ho lah: “Añ ò rgơi sền, sră neh tap ƀang kì rau.”

¹² Mơ dilah ai sră pồt do cau ò git sền sră in mơ sồr khai lah: “Dan sền tĕ sră do,” gen khai ho lah: “Añ ò git sền sră.”

¹³ Yàng Jehôwa neh đơs lah: “Tài bơh làng bol do mìng ai bơr tus rềp mơ Añ, ai sơndồi jòng ro Añ, mơya nùs bol khai ơm ngài bơh Añ. Bơta bol khai duh khoai Añ mìng la jat bơta sồr lam kòn mơnus dê, bơtê bơta sồr lam mơ ò git wă.

¹⁴ Behơ̆ Añ rơp lơh dô dơ̆ tai, dô bơta crih crài làng bol do in, nrơt nrơl mơ crih crài; bơta jak chài cau git wă dê rơp roh rui, mơ dơngoh jak ală cau git jak dê rơp pồn ndơp.”

¹⁵ Bòl glar cau lơi pồn dô bơta rơndap jrô ndơp ir di Yàng Jehôwa, la cau lơh broă khai dê tòm tiah klam jơngo mơ kơlôi lah: “Ñcau gŏ bol hi taih? Ñcau rơp git taih?”

¹⁶ Bol mê neh lơh sơlơ̆u wơl ală bơta, sền cau chài mòn gri ndròm bal kung be ù kơnàng! Phan neh geh mòn gơs rgơi đơs mơ cau neh mòn gơs he lah: “Khai ò mòn gơs añ;” Dô nơm gri rgơi đơs mơ cau mòn gơs gơ lah: “Khai ò git wă bơta lơi ơ?”

Bơta gơn kơnòm tòm ngai tơnơ̆

¹⁷ Ò di gam dô êt jŏ tai gen Liban rơp gơlik gơs dô bă sre ù bơkah, mơ sre ù bơkah tiah lơngồt sền gơlơh kung be dơr brê ò ơ?

¹⁸ Tòm ngai hơ̆, cau tĭ tồr rơp kơno ală jơnau tòm sră pồt, gar mat cau jơngo rơp sền gŏ bơh bơta lu li mơ klam jơngo.

¹⁹ Cau lơbơn niam rơp dòp geh bơta hòn chò pa tòm Yàng Jehôwa; mơ cau siơ̆u siar rơp hòn chò tòm Bơtau Sàng Goh Israel dê.

²⁰ Cau rhung rhang ò gam jŏ jòng, cau bơrsèl tơnhial rơp dơh wơl, mơ jơh ală cau wèt sền bơta iơh rơp kong tơnroh.

²¹ Hơ̆ la ală cau lơh dô nă cau roh jơh bơta yă wơn; la cau pơt dă cau cahrña di mpồng ƀòn; ai jơnau lơh cơng blac tơnroh bơta song ring cau ò gơs glài dê.

²² Behơ̆ tàng, Yàng Jehôwa neh đơs, la Bơtau neh dong tơwài Abraham, neh đơs bơh hìu Jakôp be do: “Jakôp rơp ò gam ƀàssìl tai, muh mat bol khai dê rơp ò pàl tai.

²³ Bơh tòm tŭ khai gŏ ală kòn sau khai dê, broă lơh tê Añ jê digùl khai, bol khai rơp prap gàr sơnđan Añ sàng goh; bol khai rơp lơh sàng goh Bơtau Sàng Goh Jakôp dê, mơ duh rngòt di Yàng Tom Trồ Israel dê.

²⁴ Ală cau gơs hwềng nùs wil wơl rơp dòp geh bơta git wă; ală cau òs ƀoah pơrhiat rơp dòp jơnau bơto sồr.”