Esai 25 - Sră Goh 2018

Jòng ro Yàng Jehôwa

¹ Ơ Yàng Jehôwa, Kơnràñ la Yàng Tom Trồ añ jê; añ rơp yò tơngguh bơta gơklŏ Kơnràñ dê, mơ jòng ro sơnđan Kơnràñ, bơh Kơnràñ neh lơh ală bơta crih crài krơi is, la ală bơta neh lơh nền bơh yau òr, dô bă dòn song mơ song ngan.

² Kơnràñ neh lơh ƀòn dờng in gơlik gơs dô gơnru bơcah lề, ƀòn dờng kơ̆ cê in gơlik gơs ƀòn dờng tơrlah tơrlơm, gơlang làng bol bơdìh ò gam la dô nơm ƀòn dờng tai, gơ rơp ò gơs tŭ lơi geh bơt bơtào wơl.

³ Gen tàng dô nơm làng bol pràn kơldang rơp jòng ro Kơnràñ; ƀòn dờng ală làng bol iơh bơsak dê rơp rngòt di Kơnràñ.

⁴ Kơnràñ la tiah kìng crŭ ală cau rƀah lơòi in, dô bă tiah kìng crŭ ală cau siơ̆u siar in tòm tŭ bòl glar, dô bă tiah kìng crŭ klàs bơh càl rbut, mƀur klàs bơh di bơta duh trơàl. Tòm tŭ cau iơh bơsak khồm nhơm be càl rbut khồm druh di dơrñang.

⁵ Bơta nggồr nggàc cau lơgar bơdìh dê kung be bơta duh trơàl tòm tiah rañ rsơh; bơta duh trơàl neh gơhuc bơh mƀur ală mhwal dê, bơta đơs chò cau iơh bơsak dê neh dơh wơl.

⁶ Hơđang mơnơm do, Yàng Jehôwa Gơnap Gơnoar Dờng rơp rcang yò ală làng bol in dô bơta ñô sa dờng gơs oă phan sa bơkah, dô bơta ñô sa dờng gơs tơrnòm yau, gơs phan dơngi gơs khu mơ tơrnòm bơkah rlau jơh.

⁷ Mơ Kơnràñ rơp tơnroh hơđang mơnơm do, chèo jơm mat neh sơrbì hơđang jơh ală làng bol, ồi tơ̆ neh jơm hơđang jơh ală lơgar; Kơnràñ rơp loan bơta chơt jơl sùm sùm.

⁸ Gen Jehôwa Yàng Tom Trồ rơp jùt dà mat bơh di jơh ală mat, mơ bơta sền òsơp làng bol Kơnràñ dê rơp tă tơlik jơh bơh di plai ù, Yàng Jehôwa neh đơs behơ̆.

⁹ Tòm ngai hơ̆, bol khai rơp đơs lah: “Ngan do la Yàng Tom Trồ bol he dê; bol he neh kơp gơn Kơnràñ, gen tàng Kơnràñ neh dong klàs bol he. Do la Yàng Jehôwa ală cau lơi kơp gơn Kơnràñ; bol he hòn chò mơ chò hòp tĕ tòm bơta dong klàs Kơnràñ dê!”

¹⁰ Tê Yàng Jehôwa rơp ơn hơđang mơnơm do; Cau Môap rơp kong Kơnràñ jă trơm lề lac tòm tiah bol khai dê, kung be rhe kong jă lề tòm trồm ơn phan pơnđồm ù.

¹¹ Bulah bol khai dang tê bol khai dê digùl tiah hơ̆ kung be cau re dà dang tê nàng re; bơta pơnhừ să bol khai dê rơp kòl tơmù, bơta tòmlơh tòmdră bơh bơta pràn tê bol khai dê.

¹² Ală dơrñang jơnhoa kơ̆ cê khai dê rơp kòl tơrlơm liah tus di ù, tian gơs tus di kơmbuh ù.